အစိုးရဝန်ထမ်းများ အမ်းမြို့ကနေ ပြင်ပထွက်ခွင့်ကို စစ်ကောင်စီမှ ခွင့်မပြုတော့ဟုဆို

သဉ္ဇာနွယ်၊ နိရဉ္စရာ၊ ဇူလိုင် ၉/၂၀၂၄

ရခိုင်ပြည်၊ အမ်းမြို့က စစ်ကောင်စီဝန်ထမ်းများအား  မြို့ပြင်သို့ ထွက်သွားခွင့်ကို စစ်ကောင်စီမှ ခွင့်မပြုတော့ဘဲ ပိတ်ပင်ထားကြောင်း သတင်းရရှိသည်။

အမ်းမြို့နယ်မှ ပညာရေးဝန်ထမ်းအမျိုးသမီးတစ်ဦးက  "ဝန်ထမ်းတွေကို အမ်းမြို့ကနေထွက်မယ်ဆိုရင် ထောက်ခံစာလုပ်မပေးဘူး။ အရင်က မြို့ကနေ ထွက်ခွာမယ်ဆိုရင် မယက၊ ရပ်ကွက်၊ ရဲထောက်ခံစာ၊ ပညာရေးဝန်ထမ်းဆိုရင် မြို့နယ်ပညာရေးမှူးထောက်ခံချက်လဲလိုတယ်တဲ့။ ဒါပေမယ့် အခု ‌ထုတ်မပေးဘူး။ အဓိက အခုလက်ရှိသွားလို့ရတဲ့လမ်းက အမ်း-မင်းဘူးလမ်းတစ်လမ်းဘဲ ဖွင့်တယ်။ သာမာန်အရပ်သားဆိုရင်တော့ ဆေးထောက်ခံစာတွေနဲ့သက်ဆိုင်ရာထောက်ခံစာပါရင်တော့ သွားခွင့်ပြုတယ်။ ဝန်ထမ်းတွေကိုကျ ဘာထောက်ခံစာမှ မလုပ်ပေးဘူး။ ဘာကြောင့်လို့လဲ မပြောဘူး " ဟု နိရဉ္စရာ သတင်းဌာနကို ပြောသည်။

အမ်းမြို့တွင် ပြည်မဘက်သို့သွားနိုင်သည့် အမ်း-ပဒါန်း-မင်းဘူးလမ်းတစ်လမ်းသာဖွင့်ထားပြီး မြို့ပေါ်သို့ တိုက်ပွဲနီးကပ်လာသဖြင့် မြို့ခံတချို့မှာ ပြည်မဖက်သို့ သွားမည်ဆိုပါက ဆေးရုံမှ ဆေးထောက်ခံစာ၊ မယက ထောက်ခံစာနှင့် ရပ်ကွက်အုပ်ချုပ်ရေးမှူးရုံးထောက်ခံစာများပါမှသာ သွားလာခွင့်ပြုသည်ဟု နောက်ထထပ် အမ်းမြို့ခံ အမျိုးသမီးတစ်ဦးက နိရဉ္စရာ သတင်းဌာန ကိုပြောသည်။

" အခုလက်ရှိကတော့ မြို့ခံတွေက ပိုပြီးထွက်ကြတယ်။ သွားရမယ့်နေရာကလည်း ပြည်မလမ်းဘဲ ဖွင့်ထားတာဆိုတော့ ဆွေမျိုးရှိတဲ့သူတွေ၊ ငွေကြေးတတ်နိုင်တဲ့သူတွေက ထွက်နေကြတာပဲ။ ဝန်ထမ်းတွေက လွှဲရင် ပြည်သူတွေကို သူတို့တောင်းတဲ့ ထောက်ခံချက်အပြည့်အစုံပါရင်တော့ သွားခွင့်ပြုတယ်။ လက်ရှိအချိန်ထိပေါ့" ဟုပြောသည်။

အမ်းမြို့ခံများမှာ နယ်ဖက်သို့သွားမည့်လမ်းကို စစ်ကောင်စီမှ ပိတ်ထားသဖြင့် မြို့‌ ပေါ် တိုက်ပွဲဖြစ်လာပါက ပြည်မမှလွှဲ၍ အနီးအနားကျေးရွာများကို တိမ်းရှောင်လို့မရနိုင်သည့် အခြေအနေများကြောင့် ငွေကြေး မတတ်နိုင်သူများမှာ မြို့ပေါ်တွင်သာ တောင့်ခံနေရသည်ဟု ၎င်းအမျိုးသမီးကဆက်ပြောသည်။

အမ်းမြို့က အနောက်ပိုင်းတိုင်း စစ်ဌာနချုပ်(နပခ)ကို အာရက္ခတပ်တော်မှ ဇူလိုင်လ (၆)ရက်နေ့ကနေ စတင်ထိုးစစ်ဆင်တနုက်ခိုက်နေပြီး ယမန်နေ့ ညအထိတိုက်ပွဲမှာပြင်းထန်ခဲ့သည်ဟု မြို့ခံများက ပြောသည်။

လက်ရှိတွင် အမ်းမြို့နယ် အမ်း-စစ်တွေကားလမ်းအနီးရှိ မဲလက်မောင်းကျေးရွာအနီးက မဲတောင် တောကြောရှိ စစ်ကောင်စီ၏ ကာကင်းစခန်းများကို အာရက္ခတပ်တော်မှ ထိုးစစ်ဆင် တိုက်ခိုက်နေသဖြင့် တိုက်ပွဲမှာပြင်းထန်လျက်ရှိပြီး ကာကင်းစခန်း တချို့ကိုလည်း အာရက္ခတပ်တော်မှ သိမ်းထားသည့် သတင်းလည်းထွက်နေကြောင်း ဒေသခံများကပြောသည်။ (ဓာတ်ပုံ- ပုံဟောင်းသာ)

Photo- MNP