စောရှင်မေ၊နိရဉ္စရာ၊ ဇူလိုင် ၁၇/၂၀၂၄

ရခိုင်တွင်ငွေလွှဲငွေထုတ်လုပ်ရန်သယ်ဆောင်လာသည့် ငွေစက္ကူကျပ်သိန်းပေါင်း ၆ သောင်း ကျော်ကို ပြီးခဲ့သည့် ဇူလိုင်လပထမအပတ်တွင် စစ်ကောင်စီတပ်ကချောင်းသာ ကမ်းခြေအနီး ဖမ်းဆီးလိုက်ကြောင်း ဖမ်းဆီးခံရသည့်မိသားစုဝင်များနှင့် နီးစပ်သူများကနိရဉ္စရာသို့ ပြောသည်။

အဆိုပါငွေများကို ရန်ကုန်ဘက်မှထုတ်ယူပြီးဧရာ၀တီဘက်မှတစ်ဆင့် စက်လှေဖြင့် လူ ၂၀ ဦးခန့်က ရခိုင်ဘက်သို့ သယ်ယူလာခြင်းဖြစ်ကာချောင်းသာဘက်တွင် ဖမ်းဆီးခံ၇ခြင်း ဖြစ်သည်ဟုမိသားစုဝင်များနှင့် နီးစပ်သူတစ်ဦးက ပြောသည်။

"ငွေလွှဲငွေထုတ်လုပ်မလို့ ယူလာတဲ့ ငွေကျပ် သိန်း ၆ သောင်းကျော်၊ ၇သောင်းနီးပါး တင်လာတာပါ။ ငွေထုတ်ကအထုတ် ၁၇ ထုတ်ပါတယ်။ တစ်ထုတ်မှာသိန်း ၄၀၀၀ ပါတယ်။ ဧရာ၀တီဘက်က နေပြီးတော့ ချောင်းသာဘက်ကိုလာတာ။ ချောင်းသာကိုရောက်တော့ ငွေထုတ်တွေကိုစက်လှေတစ်စီးကနေ တစ်စီးကိုကဲ့ယူတယ်။ပြီးတာနဲ့ပြန်ထွက်လာတယ်။ငွေထုတ်ကိုစစ်ဆေးတဲ့အချိန် တစ်ထုတ် ကျန်ခဲ့လို့ ပြန်လှည့်ပြီး သွားယူတဲ့အခါ ကမ်းပေါ်ကစစ်ကောင်စီရဲတွေက ဖမ်းလိုက်တာပါ"ဟုပြောသည်။

ဖမ်းဆီးခံလိုက်ရသည့်အကြောင်းကို ဖမ်းဆီးခံရသူများထဲမှတစ်ဦးကသူအဖမ်းခံရကြောင်း သူငယ်ချင်းတစ်ဦးထံဖုန်းဆက်အကြောင်းကြားခဲ့ရာမှမိသားစုဝင်များက သိရှိခဲ့ရကြောင်း၊ စက်လှေနှင့်အတူဖမ်းဆီးခံထားရသူများတွင် မင်းပြားမြို့နယ်ရှိ သစ်ပုတ်တောင်နှင့် ကျောက်ခုတ်ကျေးရွာသား၂ ဦးပါဝင်ကြောင်း ၎င်းက ပြောသည်။ 

ဖမ်းဆီးခံရသူများကိုလည်းမည်သည့်နေရာတွင် ထိန်းသိမ်းထားသည်ကို နိရဉ္စရာက စုံစမ်းနေဆဲဖြစ်သည်။

လက်ရှိရခိုင်ပြည်တွင် ဘဏ်လုပ်ငန်းများမလည်ပတ်တော့သည့်အတွက် ငွေသားများ ရှားပါးလာပြီးငွေသားများထုတ်ယူနိုင်ရန် မလွယ်ကူတော့သဖြင့် ၎င်းငွေများကို ရန်ကုန်ကနေ ရခိုင်သို့ ယူဆောင်လာကြခြင်းဖြစ်ကြောင်းသိ၇သည်။ 

ရခိုင်တွင် ငွေသားရှားပါး၍ ငွေလွှဲငွေထုတ်လုပ်ကိုင်သည့်အချို့ဆိုင်များမှာ ပိတ်ထား၇သည်ဟု ဒေသခံများက ပြောသည်။

သို့သော်ရှားရှားပါးပါး ငွေသားထုတ်ယူ၍ရရှိနိုင်သည့်ဆိုင်များတွင်လည်း Kpay မှ ငွေသားတစ်သိန်းထုတ်လျှင် ၁ရရာခိုင်နှုန်းအထိပေးဆောင်ကာ ထုတ်ယူနေ၇သည်။

ထို့အတွက်ကြောင့်ကုန်သည်များမှာ ပြည်မဘက်မှကုန်ပစ္စည်းများသွားရောက် တင်ဆောင်ကြသည့် အပြင် ငွေစက္ကူများကိုလည်းသယ်ဆောင်လာကြခြင်းဖြစ်သည်။

ယခုလိုစစ်ကောင်စီက ဖမ်းဆီးလိုက်သည့်အတွက် ရခိုင်ပြည်သူများမှာ အလွန်တရာ အခက်အခဲများနှင့်ကြုံနေရကြောင်းဖမ်းဆီးခံလိုက်ရသူများနှင့်နီးစပ်သူက ဆက်ပြောသည်။

"ရခိုင်မှာ ငွေထုတ်လို့မရတော့ ဗမာပြည်ကိုသွားယူကြတာပေါ့။ ဒါကိုကိုယ့်ပြည်ကို မရောက်ဘဲ စစ်ကောင်စီကဖမ်းလိုက်တော့ရခိုင်ပြည်သူတွေက အရမ်းအခက်အခဲနဲ့ ကြုံနေရတယ်။ ဒီလိုသာဆို ပိုပြီးဆင်းရဲတွင်းထဲကျရောက်သွားနိုင်တယ်။ ဒီအတိုင်းဆိုရင် ULA က ကိုယ်ပိုင်ငွေထုတ်ပြီး သုံးစွဲဖို့ထိ လုပ်ရမယ့် အနေအထားရောက်လာပြီ" ဟုပြောသည်။

လက်ရှိမြန်မာပြည်တွင်းတွင်သုံးစွဲနေသည့် ငွေစက္ကူများကိုရခိုင်ပြည်သူများမှာ တရားဝင် သယ်ဆောင်ခွင့်ရှိပြီး စစ်ကောင်စီက ယခုလိုဖမ်းဆီးခြင်းသည်ကားရခိုင်ပြည်သူများ၏ လူ့အခွင့်အရေးကိုချိုးဖောက်နေခြင်းဖြစ်ကြောင်းနောက်ထပ်နီးစပ်တစ်ဦးက ဝေဖန်ပြောဆိုသည်။

"လူ့အခွင့်အရေးကို ပြည့်ပြည့်၀၀လိုချင်တဲ့စိတ်ဓာတ်နဲ့ပြောမယ်ဆိုရင် မြန်မာပြည်ထဲမှာ ငွေမဲကို ငွေဖြူသွားလုပ်တာလည်း မဟုတ်။ပြည်တွင်းထဲမှာ တစ်ပြည်လုံးသုံးနေတဲ့မြန်မာပိုက်ဆံကိုသွားယူတာကဘာအပြစ်မှမရှိဘူးလေ။ ဒါပေမဲ့ တခြားနိုင်ငံကို ယူတယ်ဆိုရင် ဥပဒေအရ အရေးယူတာကအပြစ်မပြောပါဘူး။ ကျွန်တော်တို့ ရခိုင်ပြည်သူတွေကဒီလိုကုန်ရောင်းကုန်ဝယ်တာတွေကို တော်တော်သတိဝိရိယထား၇မယ်လို့ပြောချင်ပါတယ်"ဟုပြောသည်။

စစ်ကောင်စီသည်ပြီးခဲ့သည့် ၂၀၂၃ ခုနှစ်၊နိုဝင်ဘာလကပင် ရခိုင်ပြည်တွင် ကုန်သွယ်ရေး၊ ဆက်သွယ်ရေး မပြုလုပ်နိုင်အောင် ကားလမ်း၊ရေလမ်းများကို ပိတ်ဆို့ပြီး အပြစ်မဲ့ရခိုင်ပြည်သူများအားအတိဒုက္ခရောက်ကာ အငတ်ဘေး ကျရောက်အောင် အစီအစဉ်ရှိရှိ ပိတ်ဆို့ဆောင်ရွက်ထားသည်။

ထို့အတွက်ကြောင့်ရမ်းဗြဲ၊ မာန်အောင်၊တောင်ကုတ်၊ မင်းပြား၊ သံတွဲနှင့် ကျောက်ဖြူဘက်တို့မှ ကုန်သည်တို့သည် ဧရာ၀တီဘက်သို့အရဲစွန့်ကာ လူသုံးကုန်ပစ္စည်းများတင်ဆောင်သည့်အပြင် လက်ရှိရခိုင်ပြည်တွင်ငွေသားများရှားပါးလာသည့်အတွက် ငွေစက္ကူများလည်း သယ်ဆောင် လာကြရသည်။

ပြီးခဲ့သည့်ဇွန်လ နောက်ဆုံးအပတ်ကလည်း ဧရာ၀တီတိုင်းမှ လူသုံးကုန်ပစ္စည်းများ တင်ဆောင်လာသည့် ရမ်းဗြဲမြို့နယ်၊ကျောက်နီမော်ကျေးရွာနှင့် မာန်အောင်မြို့နယ်တို့မှ စက်လှေ ၅ စီးကို မာန်အောင်မြို့နယ်၊ရဲကျွန်း၊ တိုက်ကျွန်းနှင့် မကျည်းကျွန်းကြားတွင်စစ်ကောင်စီနေဗီတစ်စီးက ဖမ်းဆီးခဲ့သည်။

ဓာတ်ပုံ- ရခိုင်ရှိ ကုန်စက်လှေတစ်စီးအား တွေ့၇စဉ်။