သံတွဲမြို့နယ် ဂျိတ္တောတိုက်ပွဲတွင် AA နှင့် ရင်ဆိုင်တိုက်ခိုက်နေရသည့် ရေတပ်သားများ စစ်မြေပြင် အတွေ့အကြုံမရှိရာမှ ကျဆုံးမှုများပြားနေ

လူထက်နိုင်( ဒွါရာမြီ)၊နိရဥ္စရာ၊ ဇူလိုင် ၁၈ / ၂၀၂၄

ရခိုင်ပြည်၊ သံတွဲမြို့နယ် ဂျိတ္တောဘက်တွင် အာရက္ခတပ်တော် (AA) နှင့် တိုက်ပွဲဖြစ်ပွားနေသည့် စစ်ကောင်စီ ရေတပ်သားများမှာ မြေပြင်စစ်ရေး အတွေ့အကြုံမရှိ၍ အကျအဆုံးများနေပြီး တချို့လည်း ထွက်ပြေးနေကြသည်ဟု သိရသည်။

ရေတပ်နှင့် နီးစပ်သူ ဒေသခံ တစ်ဦးက “ ကွင်းဝိုင်းရေတပ်က ဗိုလ်ကြီးတစ်ယောက်ပျောက်နေတယ်။ တပ်ကြပ်ကြီးတစ်ယောက် သေသွားတယ်။ နာမည်ကပြောင်ကြီးလို့ခေါ်တယ်။ နောက်သေတာတွေ အများကြီးပဲ။ ကွင်းဝိုင်း ရေတပ်ကလူတွေက စစ်တိုက်ဖို့မတတ်ဘူး။ အဲဒီတော့ အေအေနဲ့တိုက်တဲ့အခါ အကျအဆုံးများတယ်။ ဂျိ​တ္တောဘက်မှာအကျအဆုံးများနေတယ်။ ကွင်းဝိုင်းတပ်က မိုင်းခွဲဖို့ တတ်တယ်။ ရေငုတ်ဖို့တတ်တယ်။ စစ်မတိုက်တတ်ဘူး”ဟု ပြောသည်။

ထိုသို့ အကျအဆုံးများနေသဖြင့် ရေတပ်သားများအား ပြန်ခေါ်ရန် ၎င်းတို့၏ ကွင်းဝိုင်းရေတပ်စခန်း တပ်မှူးသို့ အကြောင်းကြားသော်လည်း ပြန်မခေါ်သဖြင့် အများစုမှာ စိတ်ဓာတ်ကျနေကြသည်ဟု ဆိုသည်။

“ တပ်မှူးကို ဆက်သွယ်ကြတယ်။ သူတို့ကိုပြန်လာခေါ်ပါလို့။ တပ်မမှူးပြောင်းသွားပြီး။ ကျော်ကျော်ဦး ဆိုတဲ့ တပ်မမှူးက ရန်ကုန်ရောက်သွားပြီ။ အထက်အမိန့်ကြောင့် သူတို့ကို စစ်မြေပြင် လွှတ်ရတော့ အခုပြန် မခေါ်တော့ဘူး” ဟု ၎င်းက ပြောသည်။

စစ်ကောင်စီတပ်သားများသည် ငပလီကမ်းခြေမြို့၏ တောင်ဘက်အစွန်ဆုံး ရှိ ဂျိတ္တောရွာရှိ ပုလဲကျောင်းနှင့် ဂျိတ္တောကျောင်းကြီးတွင် လည်းကောင်း၊ မြပြင်ရပ်ကွက် မြတောင်တွင်လည်းကောင်း အသီးသီးတပ်စွဲထားပြီး အေအေအား ခုခံကာကွယ်တိုက်ခိုက်နေသည်ဟု သိရသည်။

“ တပ်တွေက တချို့ က ခုခံတယ်။ တချို့က ကွင်းဝိုင်းရေတပ်သို့ ဆုတ်ခွာတယ်လို့လည်း သိရတယ်။ အခု အေအေနဲ့ တိုက်နေတဲ့အထဲမှာ ပခုက္ကူ အခြေစိုက် တပ်မ ၁၀၁ရဲ့ လက်အောက်ခံတပ်တွေရှိတယ်။ ပဒါန်းဖက်က တပ်သားတွေ။ တချို့က အခုမှစစ်မှုထမ်းတဲ့ ကလေးတွေ။ သူတို့က စစ်ရေးနားမလည်တော့​ အကျအဆုံး များတယ်” ဟု ပြောသည်။

တိုက်ပွဲအတွင်း ဒဏ်ရာရသူများ၊ သေဆုံး အလောင်းများအားလည်း ကွင်းဝိုင်းရေတပ်ကို ပြန်ယူ လာသည်ဟု ဆိုသည်။

“ဂျိတ္တော ကနေ ကွင်းဝိုင်းရေတပ်ကို တပ်ဆုတ်တယ်။ နာလာတဲ့သူကို ကွင်းဝိုင်းရေတပ်ကိုယူလာတယ်၊ ကွင်းဝိုင်းမှာသဂြိုလ်တယ်။ ဟောင်ဝေဇာ အမြောက်တစ်လက်ကို သပြူချိုင်ဆိပ်ကမ်းမှာချထားတယ်။ အခြေအနေမဟန်ရင် တပ်ဆုတ်ဖို့ အသင့်ပြင်ထားတယ်။ ကွင်းဝိုင်းရေတပ်ကနေ ရန်ကုန်ကို စစ်ရေယာဉ်တွေနဲ့ တိုက်ရိုက် သွားလို့ရတယ်။”

အာရက္ခတပ်တော်(အေအေ)ထံတွင် မဇင်လေဆိပ်၊ ခမရ ၅၆၆၊ ခလရ ၅၅နှင့် အဏ္ဏဝါရိပ်သာတို့ကို ဆုံးရှုံးလိုက်ရသည့် စစ်ကောင်စီတပ်များမှ တပ်သားများသည် အေအေထံတွင် လက်နက်နှင့် အလင်းဝင်ခြင်း၊ လက်နက်စွန့်ခွာထွက်ပြေးခြင်းများ ပြုလုပ်နေကြောင်း သိရသည်။