စောရှင်မေ၊နိရဉ္စရာ၊ဇူလိုင် ၂၅/ ၂၀၂၄

ရခိုင်ပြည်မြို့တော်စစ်တွေရှိ နေအိမ်များကို ဖောက်ထွင်း ခိုးယူမှုများကို စစ်ကောင်စီ တပ်သားများကိုယ်တိုင် ၎င်းတို့၏ အပေါင်းအပါများနှင့်အတူ ကျူးလွန်နေကြောင်း စုံစမ်းသိရှိရသည်။

လက်ရှိစစ်တွေမြို့တွင်  အရပ်သားပြည်သူများအားစစ်ကောင်စီတပ်က ဖမ်းဆီး ညှဉ်းပမ်းနှိပ်စက်မှုများကြောင့်ပြည်သူများစစ်ဘေးရှောင်နေခြင်း၊ မိမိအိုးအိမ်ကို စောင့်ရှောက်ရန် ကျန်နေခဲ့သည့်ပြည်သူအများစုမှာလည်း တဖြည်းဖြည်းနှင့် မြို့ကိုစွန့်ခွာနေကြရသည်။

ယခုကဲ့သို့ပြည်သူများထွက်ပြေးတိမ်းရှောင်နေရစဉ် စစ်ကောင်စီတပ်သားများသည်ပြည်သူများပိုင်ဆိုင်သည့် အိုးအိမ်ဥစ္စာပစ္စည်းများအား မစောင့်ရှောက်နိုင်သည့် အပြင် သူတို့ကိုယ်တိုင်ဦးဆောင်ကာ မင်းမဲ့စရိုက်ဆန်ဆန်ဖြင့် နေအိမ်များအား ဖောက်ထွင်းမှုများကိုကျူးလွန်နေကြသည်ဟု ဒေသခံများက ပြောသည်။

ယင်းအပြင်စစ်တွေမြို့ရှိ အရပ်သားပိုင်ကုမ္ပဏီများမှဝန်ထမ်းများကို ဖမ်းဆီးကာ ကုမ္ပဏီရှိပစ္စည်းများကိုပါဖောက်ထွင်းယူဆောင်နေကြသည်ဟုလည်း သိရသည်။

စစ်တွေမြို့မှအမည်မဖော်လိုသည့် ကုမ္ပဏီပိုင်ရှင်တစ်ဦးက ၄င်းတို့၏လုပ်ငန်းပိုင်ပစ္စည်းများကို စစ်ကောင်စီတပ်သားများကိုယ်တိုင်လက်နက်အားကိုးဖြင့် ဝင်ရောက်ခိုးယူဖောက်ထွင်းသွား၍ကုမ္ပဏီပိုင်ပစ္စည်းများမှာလည်း မရေတွက်နိုင်အောင်ဆုံးရှုံးသွားခဲ့သည်ဟု နိရဉ္စရာကို ပြောသည်။

ကုမ္ပဏီအတွင်းကျန်ရှိနေသည့်ပစ္စည်းများကိုပင် လုံခြုံရေးဝန်ထမ်းမရှိဘဲ မျက်ကွယ် ပြုထားရသည်ဟုလည်းပြောသည်။

"စစ်ကောင်စီတပ်ဖွဲ့ဝင်တွေ သူတို့ ကိုယ်တိုင်ပဲ ဖောက်ထွင်းနေတာပဲလေ။ဒါတွေက ဘယ်လိုပြောလို့ရမလဲ။ ကုမ္ပဏီကလည်ပတ်လို့လည်းမရတော့ဘူး။ ရပ်ထားရတယ်။ သီခြား လုပ်ငန်းကပိုင်ဆိုင်မှုတွေတော့တခြား နေရာမှာရှိသေးတာပေါ့။ ဖောက်ထွင်းမခံရသေးဘူး။ဒါတွေကို စိုးရိမ်နေရတယ်။ အဲ့ပစ္စည်းတွေကို ဖြစ်ချင်ရာဖြစ်ပစ်ထားရတာပေါ့။ ဝန်ထမ်းတွေလည်း ဘယ်သူမှ မလုပ်ရဲကြတော့။ အကုန်ပျက်စီးတာပေါ့။ တန်ဖိုးအခြေအနေကိုတွက်လို့တောင်မ၇တော့ဘူး" ဟုပြောသည်။

ထို့အပြင်ပြီးခဲ့သည့် ဇူလိုင် ၂၂ ရက်၊ညဥ့် ၁ နာရီကျော်ခန့်ကလည်း စစ်တွေရှိ စက်ရုံနှစ်ခုတွင် လုံခြုံရေးစောင့်နေသည့်လုံခြုံရေးဝန်ထမ်း အမျိုးသား၂ ဦးအား စစ်ကောင်စီ တပ်ဖွဲ့ဝင်များသည် စစ်ကား ၃ စီးဖြင့် ဖမ်းဆီးသွားခဲ့သည်ဟု နိရဉ္စရာသတင်းဌာနမှစုံစမ်းသိရှိရသည်။

ဖမ်းဆီးခံ၇သူ၂ ဦးမှာ မင်းဒြားချိတ်ရွာဟောင်းကျော်ဇံဆားကြိတ်စက်ရုံတွင် လုံခြုံရေး လုပ်နေသည့် အသက် ၄၃ နှစ်အရွယ် ဦးဆန်းမောင်နှင့်ဗျိုင်းဖြူရွာကုတိုးဆိပ်အနီး မီလျံနာဖြိုးဆန်စက်တွင်လုံခြုံရေးလုပ်နေသည့် အသက် ၃၈ နှစ်အရွယ် ကိုမိုးအေးကိုကို တို့ဖြစ်ကြသည်။

ထို့သို့လုံခြုံရေးစောင့် စက်ရုံဝန်ထမ်းများကိုပါ ဖမ်းဆီးနေသည့်အတွက် တခြားစက်ရုံများတွင်လုံခြုံရေးတာဝန်ယူထားသည့် ပြည်သူများလည်းအလုပ်မဆင်းရဲဖြစ်နေကြပြီး ဝမ်းရေးအတွက် ထိခိုက်မှုများပါ ရှိလာနေသည်ဟု ဝန်ထမ်းတစ်ဦးက ပြောသည်။

"လုံခြုံရေးတွေကိုလည်း ဖမ်းနေကြတော့ ကျွန်တော်တို့လည်းစိုးရိမ်မှုတွေရှိပါတယ်။ အလုပ်ထွက်ရမလိုဖြစ်နေပြီ။အလုပ်ရှားရတဲ့ကြားထဲ့ ဒါကိုမှီခိုပြီးစားသောက်နေရတာ"ဟုပြောသည်။

ထိုလုံခြုံရေးဝန်ထမ်းများကို ဖမ်းသွားသည့်အချိန်တွင်လည်းစစ်ကောင်စီတပ်သားများသည် ကျော်ဇံဆားကြိတ် စက်ရုံကိုပိတ်ထားသည့်သော့ခလောက်များကိုဖျက်ဆီးပြီး အထဲသို့ဝင်ရောက်ကာ ပစ္စည်းများကိုမွှေနှောက်ဖျက်ဆီးခဲ့သည်ဟု သိရသည်။

ထို့အတူမီလျံနာဖြိုးဆန်စက်ရုံကိုပိတ်ထားသည့် သော့ခလောက်များကိုလည်း ဖျက်ဆီးပြီးဝင်ရောက်ကာ ပစ္စည်းများကိုဖျက်ဆီးသွားသည့်အပြင် စက်ရုံတွင်ထားရှိသည့် ဆိုင်ကယ် ၅စီးနှင့် စားသုံးဆီများကိုလည်း ယူဆောင်သွားကြောင်း နီးစပ်သူများကပြောသည်။ 

ရခိုင်တွင်တကျော့ပြန်တိုက်ပွဲပြန်ဖြစ်ပြီးနောက်စစ်တွေတွင်နေရပ်စွန့်ခွာသွားသူတို့၏ နေအိမ်အဆောက်အအုံများသည် နေ့စဥ်နှင့်အမျှ ဖောက်ထွင်းပြီးနေအိမ်ရှိ ပစ္စည်းများကို ခိုးယူခံနေရသည်ဟု သိရသည်။

ယင်းအပြင်နေအိမ်များကိုပါဖျက်ဆီးပြီး သွပ်၊ သံ၊ သစ်သားများကိုလည်း ခိုးယူ ရောင်းချနေကြသည်ဟုလည်းမြို့ခံများက ပြောသည်။

ယခုကဲ့သို့တရားဥပဒေမဲ့သည့်လုပ်ရပ်များကို စစ်ကောင်စီက အရေးယူဆောင်ရွက်ခြင်းမရှိဘဲလစ်လျူရှုထားသည်ဟု သိ၇သည်။

ဓာတ်ပုံ- စစ်တွေမြို့တွင် လှည့်လည်သွားလာနေသည့်စစ်ကောင်စီ တင့်ကား (ပုံဟောင်း)