လားရှိုးမြို့သိမ်းတိုက်ပွဲအတွင်း သံတွဲဇာတိ ဗိုလ်မှူးတစ်ဦး စနိုက်ပါထိမှန်သေဆုံးဟု သတင်းထွက်လာ

ကံ့ကော်နီနီ၊ နိရဉ္စရာ၊ ဇူလိုင် ၂၈ / ၂၀၂၄

ရှမ်းပြည်နယ်မြောက်ပိုင်း လားရှိုးမြို့သိမ်းတိုက်ပွဲအတွင်း ရခိုင်ပြည်၊ သံတွဲဇာတိ ဗိုလ်မှူးတစ်ဦး မဟာမိတ်တပ်များ၏ စနိုက်ပါကျည်ထိမှန်သေဆုံးသွားကြောင်း သတင်းထွက်ပေါ်နေသည်။

သေဆုံးသွားသည့် ဗိုလ်မှူးမှာ ရခိုင်ပြည်၊ သံတွဲမြို့မှ ဦးဇော်သိန်းနှင့် ဒေါ်တင်အေးတို့၏ သားဖြစ်သူ ဗိုလ်မှူးအောင်ထွန်းလင်း(ခ)ဖိုးသာထူး ဟု အဆိုပါသတင်းများက ဖော်ပြထားသည်။

၄င်းသည် ဇူလိုင်လ ၂၅ ရက်၊ ညအချိန် လားရှိုးမြို့သိမ်းတိုက်ပွဲအတွင်း စနိုက်ပါကျည်ထိမှန် သေဆုံးသွားခဲ့ကြောင်း သတင်းများတွင် ဖော်ပြထားသည်။

အဆိုပါဗိုလ်မှူးကျဆုံးသည့်သတင်းနှင့်ပတ်သက်၍ စစ်တပ်အသိုင်းအဝိုင်းက အတည်ပြု ထားပြီး ဇူလိုင် ၂၅ ရက်နေ့ ညနေ ၇ နာရီခန့်တွင် လားရှိုးမြို့တွင် တာဝန်ထမ်းဆောင်ရင်း အသက်ပေးလှူသွားခဲ့သည်ဟု ဖော်ပြထားသည်။

စစ်လော်ဘီ ပို့စ်တစ်ခုကလည်း “ ကောင်းရာသုဂတိလားပါစေ၊ နောင်ဘ၀ ငြိမ်းချမ်းတဲ့တိုင်းပြည်မှာ လူပြန်ဖြစ်ပါစေ” ဟုလည်း ရေးသားထားသည်။

ရှမ်းပြည်နယ်၊ မြောက်ပိုင်း၊ လားရှိုးမြို့ရှိ စစ်ကောင်စီ၏ အရှေ့မြောက်တိုင်း စစ်ဌာနချုပ်ကို ဇူလိုင် ၂၅ ရက်၊ နံနက် ၄ နာရီတွင် လုံးဝ သိမ်းပိုက်နိုင်ခဲ့ပြီး လားရှိုးမြို့သည် လုံး၀ လွတ်မြောက်သွားပြီဟု မြန်မာအမျိုးသားဒီမိုကရက်တစ်မဟာမိတ်တပ်မတော်(MNDAA)က ယင်းနေ့တွင် သတင်းထုတ်ပြန်ခဲ့သည်။

ဇူလိုင်လ၂၆ ရက်၊ ညနေ ၆ နာရီ ၁၅ မိနစ်တွင် MNDAA တပ်၏ အမြောက်တပ်ရင်းများ ပူးပေါင်း၍ လားရှိုးမြို့ ဟိုပိတ် တိုးဂိတ်၌ ကျန်ရှိနေသော စစ်ကောင်စီတပ်ဖွဲ့ဝင်များကို စတင်တိုက်ခိုက်ခဲ့ပြီး ညနေ ၇ နာရီခွဲတွင် တိုးဂိတ်ကို အောင်မြင်စွာ သိမ်းပိုက်နိုင်ခဲ့သည်ဟုလည်း ထုတ်ပြန်ထားသည်။

ဓာတ်ပုံ - စစ်အုပ်စုသတင်းရင်းမြစ်များထံမှထွက်ပေါ်နေသည့် ဗိုလ်မှူးအောင်ထွန်းလင်းပုံ။