ကျောက်မဲ၊ မိုးကုတ်နှင့် မိုးမိတ်မြို့များတွင် တိုက်ပွဲများဆက်လက်ဖြစ်ပွားနေပြီး စစ်သုံ့ပန်းများနှင့် အတူလက်နက်ခဲယမ်းများ သိမ်းဆည်းရမိနေ

နိရဉ္စရာ၊ ဇူလိုင် ၂၉/၂၀၂၄

ကျောက်မဲ၊ မိုးကုတ်နှင့် မိုးမိတ်မြို့များတွင် တိုက်ပွဲများဆက်လက်ဖြစ်ပွားနေပြီး စစ်သုံ့ပန်း (၂၀) ဦးကို လက်ရဖမ်းမိကာ လက်နက်ခဲယမ်း (၇၀)ကျော်သိမ်းဆည်းရမိကြောင်း တအာင်းတပ်မတော် (TNLA) က ယနေ့ ဇူလိုင် ၂၉ ရက်နေ့တွင် သတင်းထုတ်ပြန်သည်။

ထုတ်ပြန်ချက်ထဲတွင် တအာင်း တပ်မဟာ (၂)နယ်မြေ မိုးကုတ်မြို့ အနောက်ပိုင်းရှိ ဖြူရောင်ကုန်းမှ ထွက်ပြေးလွတ်မြောက်သွားသည့် စစ်ကောင်စီတပ်သားများအား တအာင်းတပ်မတော် TNLA မှ လိုက်လံရှင်းလင်းရာ စစ်သုံ့ပန်း (၂၀)ဦး ဖမ်းဆီးရမိထားပြီး လက်နက်ခဲယမ်း (၂၃) လက် သိမ်းဆည်း ရမိခဲ့သည်ဟု ဖော်ပြထားသည်။

၎င်းပြင် ကျောက်မဲမြို့တွင် တအာင်းတပ်မတော် TNLA နှင့် စစ်ကောင်စီတပ်တို့အကြား တိုက်ပွဲ ပြင်းထန်ဖြစ်ပွားပြီး တပ်မ (၁၁)၊ ခမရ (၅၀၁) တပ်စခန်းတို့၌ စစ် ကောင်စီထံမှ လက်နက် (၃၇)လက်နှင့် စစ်အသုံးအဆောင်ပစ္စည်းများ သိမ်းဆည်းရမိခဲ့သည်။

စစ်ကောင်စီထံမှ သိမ်းဆည်းရမိထားသည့် လက်နက်များမှာ  MA1 (၉)လက်၊ MA2 (၂)လက်၊ MA3 (၁၅)လက်၊ MA11 (၆)လက်၊ M22 (၁)လက်၊ RPG (၁)လက်၊ ၄၅ မမ (၁)လက်၊ ၆၀မမ (၁)လက်၊ Pistol (၁)လက်အပြင် စကားပြောစက်၊ ကျည်ဆံနှင့် စစ်အသုံးအဆောင်ပစ္စည်းများ ဖြစ်ကြောင်း ဆက်လက်ဖော်ပြသည်။

တပ်မဟာ (၃) နယ်မြေ မိုးမိတ်မြို့တွင်လည်း လက်ကျန်စစ်ကောင်စီတပ်စခန်းများအား တအာင်း တပ်မတော် TNLA မှ လိုက်လံရှင်းလင်းရာ စစ်ကောင်စီတပ်၏ လုံခြုံရေးကုန်းမှ သေနတ်(၈)လက်၊ RPG (၁)လက်၊ ငါးကျည်းမြှီး (၁)လက်၊ ၆၀မမ ပြောင်းတို (၁)လက်၊ ၆၀မမ ပြောင်းရှည် (၁)လက်၊ ၈၁ မမ နောက်ပွင့် (၁)လက် စုစုပေါင်း (၁၃)လက် သိမ်းဆည်းရမိထားသည်ဟု ဆိုသည်။