ယခုနောက်ပိုင်း သံတွဲမြို့သို့ စစ်ကူလာသူများစစ်သင်တန်းဆင်း ပြည်သူစစ်များဖြစ်ပြီး စစ်ရေးမကျွမ်းသဖြင့် အစုလိုက်အပြုံလိုက်သေဆုံးကာ အလောင်းများပြန့်ကြဲနေဟု ဒေသခံများဆို

( အလောင်းများမှာ ရေထဲမျောပါနေ၍ မြို့သူမြို့သားများ ငါးကိုမစားတော့ဟုဆို)

လူထက်နိုင်( ဒွါရာမြီ)၊နိရဥ္စရာ၊ သြဂုတ် ၂ / ၂၀၂၄

ရခိုင်ပြည် သံတွဲမြို့စစ်ပွဲသို့ နောက်ပိုင်းတွင်လာရောက်သည့် စစ်ကောင်စီစစ်ကူများမှာ  စစ်သင်တန်းဆင်း ပြည်သူ့စစ်များဖြစ်ပြီး တိုက်ခိုက်ရာတွင် စစ်ရေးမကျွမ်းသဖြင့်  အစုလိုက် အပြုံလိုက်သေဆုံးကာ အလောင်းများ ချောင်းအတွင်း ပြန့်ကျဲနေကြောင်း မြို့ခံစစ်မှုထမ်း ဟောင်းများထံမှသိရသည်။

“ နောက်ပိုင်း စစ်ကူလာတဲ့ စစ်ကောင်စီတပ်သားတွေက ပြည်သူ့စစ်တွေချည်းပဲလေ။ နယ်မြေလဲ မကျမ်းကျင်ရတဲ့အထဲသေနတ်တောင်ကောင်းကောင်းမပစ်တတ်ဘူး၊သေလိုက်ကြတာမြင်မကောင်းဘူ။  အခုလက်ရှိအခြေအနေကိုပြောရမယ်ဆိုရင် ဂျိတ္တောက ပင်လယ်ထွက်တဲ့ ချောင်းလက်တက် တွေမှာ အလောင်းတွေ ပုတ်ပွပြီး အနံ့တောင်မခံနိုင်ဘူး။ ဒေသခံတွေ အခုငါးကိုဘယ်သူမှမစား တော့ဘူး။ ငါးမစားဆိုတာက အလောင်း တွေကို ငါးကစားတယ်ဆိုပြီး မစားကြတာ။  စစ်ရှောင်တွေကလည်း မစားတော့ကျွေးမွေး နေရသူတွေအခက်တွေ့နေပြီလေ” ဟု စစ်မှုထမ်း ဟောင်း တစ်ဦး ကပြောသည်။

သံတွဲမြို့ရှိ သူဌေးချောင်း၊ ပြည့်ဝချောင်း၊ သံတွဲချောင်းတို့ရှိ ချောင်းလက်တက်တချို့တွင် စစ်ကောင်စီ အလောင်းများပျံနှံ့ ပုတ်ပွနေပြီး လက်ရှိ ဂျိတ္တောကျေးရွာအနီးတွင်း စစ်ကောင်စီ အလောင်းများသည် အနံ့ဆိုးများထွက်နေပြီး တိုက်ပွဲတချို့ရှိနေသေးသဖြင့် မသင်္ဂြိုလ်နိုင်ဘဲ ဒီအတိုင်း ပစ်ထားရသည်ဟု    ဒေသခံများက ပြောသည်။

စစ်ကောင်စီသည် သံတွဲမြို့ တိုက်ပွဲသို့ ဇွန်လမှစတင်ကာ စစ်ကူများပေးပို့ခဲ့ရာ ဧရာဝတီ-ဂွ လမ်းပိုင်းမှ အိမ်စီးကားများ၊စစ်ကားများဖြင့်လည်းကောင်း၊ ရေတပ် သင်္ဘောများဖြင့်လည်းကောင်း  အဖြတ်လိုက် ပို့ဆောင်ခဲ့ရာ ဧရာဝတီတိုင်း ပုသိမ်၊ကြံခင်း၊ မြန်အောင်မြို့များမှ ပြည်သူ့စစ်များပါဝင်ခဲ့ကြောင်း ဒေသခံများကဆိုသည်။

စစ်ကောင်စီတပ်သားများနှင့် ပြည်သူ့စစ်များ အစုလိုက်အပြုံလိုက်သေဆုံးခဲ့ရသည် တိုက်ပွဲများမှာ သူးဌေး ရေအားလျှပ်စစ်တိုက်ပွဲ၊ လင်းသီတိုက်ပွဲ၊ ခရမ်းမော်တောင်ပေါက်နှင့် ဆိပ်ကြီးရွာတိုက်ပွဲ၊ ဂျိတ္တောတိုက်ပွဲ၊ မှိုဟင်းပြင် တိုက်ပွဲတို့ဖြစ်ကြောင်းဒေသခံများထံမှသိရသည်။

“စစ်တပ်ကတော်တော်ကြောက်နေပြီ။ အေအေအသံကြားရင်ခွေးပြေးဝက်ပြေးပြေးတာ။ အခုက သူတို့က ိုယ်တိုင်တံတား တွေချိုးထားတော့ပိတ်မိသွားပြီ။ ရေကြောင်းက အရာရှိတွေဘဲ။ ဆုတ် ရင်ခေါ်သွားမယ်။ အဲ့ဒီပြည်သူ့စစ်တွေနဲ့ ရဲဘော်အဆင့်တွေ ကိုမခေါ်ဘူး။ အလံဖြူထောင်လက်နက် မချရင်အသေခံပေါ့။ သံတွဲမှာ  စစ်တပ်လက်နက်အင်အား လူအင်အားအများကြီးသုံးပစ်လိုက်တာ။ နိုင်ငံတော်အဆင့် တိုက်တာဆိုတော့ တကယ်ပြောတာ ဗုံးအလုံးရေထောင်နဲ့ချီပြီး ရှိတယ်။ ချတာတစ်ညနေကို အလုံး ၂ ရာ ကျော် ချသွားတဲ့နေ့ရှိခဲ့တယ်ဘယ်လွယ်မလဲ။ အေအေကတော့  ဒီလောက်တိုက်တာ ထမင်းတစ်ရက်လည်းမငတ်။ ထောက်ပို့ကထမင်းထုပ်အချိန်မှန်ပို့ပြီးသား အစစအရာရာ သာလွန်တယ်”ဟု နောက်ထပ် စစ်မှုထမ်း ဟောင်းတစ်ဦးကပြောသည်။

စစ်ကောင်စီသည် ဇူလိုင်လတွင် စစ်ကူများအား ရေလမ်းခရီးဖြင့်ကွင်းဝိုင်းရေတပ်သို့ ပို့ဆောင်ခဲ့ပြီး ထိုမှတဆင့် တပ်စိတ်လိုက်ဖြန့်ခွဲကာ တိုက်ပွဲသို့   စေလွတ်ခဲ့ရာ  အကျအဆုံး အလွန်များပြားနေကြောင်း သိရသည်။