ရန်ကုန်မှ စစ်တွေသို့ သယ်ဆောင်လာသည့် ကျပ်သိန်းထောင်ချီ တန်ဖိုးရှိသည့် ဆေးဝါးနှင့် လျှပ်စစ်ပစ္စည်းများ စစ်ကောင်စီနေဗီက ဖမ်းဆီး

Preview

ရန်ကုန်မှ စစ်တွေသို့ သယ်ဆောင်လာသည့် ကျပ်သိန်းထောင်ချီ တန်ဖိုးရှိသည့် ဆေးဝါးနှင့် လျှပ်စစ်ပစ္စည်းများ စစ်ကောင်စီနေဗီက ဖမ်းဆီး

သြဂုတ် ၀၃/ ၂၀၂၄ | ကြည့်ရှုသူ :10118

မောင်စာဂ၊နိရဥ္စရာ၊ သြဂုတ် ၃/၂၀၂၄

ရခိုင်ပြည်၊စစ်တွေမြို့သို့ ရန်ကုန်မှတဆင့် ပုဂ္ဂလိက သင်္ဘောတစ်စီးဖြင့်သယ်ဆောင်လာသည့် ကျပ်သိန်းထောင်နှင့်ချီ၍ တန်ဖိုးရှိသည့် ဆေးဝါးများနှင့်လျှပ်စစ်ပစ္စည်းများကို တရားမဝင် ကုန်ပစ္စည်းများဟုဆိုကာ စစ်ကောင်စီ နေဗီက စစ်တွေအဝင်တွင်ဖမ်းဆီးလိုက်သည်ဟု ဒေသခံများက ပြောသည်။

၎င်းကုန်ပစ္စည်းများမှာ မြန်မာ့ဆိပ်ကမ်းအာဏာပိုင်များကို ငွေကြေးပေးချေပြီး တရားဝင် သယ်ဆောင်လာသည့် ပစ္စည်းများဖြစ်ပြီး ယခုကဲ့သို့ဖမ်းဆီးခံလိုက်ရသဖြင့် ဆေးဆိုင်ပိုင်ရှင်များနှင့် လုပ်ငန်းရှင်များတွင် တစ်ဦးစီလျှင်ကျပ်သိန်းထောင်ချီ၍ ဆုံးရှုံးနစ်နာသွားကြောင်း၄င်းတို့နှင့်နီးစပ်သူတစ်ဦးက နိရဥ္စရာကိုပြောသည်။

" ပြီးခဲ့တဲ့ အပတ်က ဖမ်းဆီးလိုက်တာပါ။ နေဗီကဖမ်းပြီးမှ ဆိပ်ကမ်းကိုပို့လိုက်တာ။သင်္ဘောသားတွေကိုလည်း ဖမ်းထားတယ်လို့ သိရတယ်"ဟု ပြောသည်။

ဖမ်းဆီးခံလိုက်ရသည့်ဆေးဝါးများတွင်အင်္ဂလိပ်ဆေးအမျိုးမျိုးနှင့် တိုင်းရင်းဆေးအမျိုးမျိုး ပါဝင်သည်ဟုဆိုသည်။

အလားတူဖမ်းဆီးခံလိုက်ရသည့်လျှပ်စစ်ပစ္စည်းများတွင်လည်း ဆိုလာပြားများ၊ဘတ်ထရီအိုးများနှင့် အခြားလျှပ်စစ်သုံးပစ္စည်းများ အများအပြားပါဝင်ကြသည်ဟု သိ၇သည်။

ရခိုင်တွင်တကျော့ပြန်တိုက်ပွဲများပြန်လည်ဖြစ်ပွားပြီးနောက် စစ်ကောင်စီက ကုန်းလမ်းနှင့်ရေလမ်းတို့ကို တင်းတင်းကျပ်ကျပ်ပိတ်ထားသော်လည်း ရန်ကုန်နှင့် စစ်တွေသို့ကုန်ပစ္စည်းတင်ပို့သည့် ပုဂ္ဂလိက သင်္ဘောအချို့ကို စစ်ကောင်စီက တရားဝင်ပြေးဆွဲခွင့် ပြုပေးထားသည်။

အဆိုပါသင်္ဘောများပေါ်တွင်တင်ဆောင်မည့်ကုန်ပစ္စည်းများကိုလည်း ရန်ကုန်နှင့်စစ်တွေရှိ ဆိပ်ကမ်းအာဏာပိုင်များနှင့်စစ်ကောင်စီတပ်ဖွဲ့ဝင်များကအဆင့်ဆင့်စိစစ် စစ်ဆေးသလို ပိုက်ဆံများလိုသလောက်ကောက်ယူပြီးမှတင်ပို့ခွင့်ပြုကြောင်း သိရသည်။

သို့ရာတွင်ယင်းသို့ အဆင့်ဆင့်စိစစ်မှုကိုခံယူပြီးလမ်းကြောင်းရှင်းပြီးမှ သယ်ဆောင်လာသည့် ဆေးဝါးများနှင့်လျှပ်စစ်ပစ္စည်းများကို ယခုကဲ့သို့ တရားမဝင်ကုန်ပစ္စည်းများဟုဆိုကာ ရုတ်တရက်ဖမ်းဆီးလိုက်ခြင်းကြောင့်ဆေးဆိုင်ပိုင်ရှင်များနှင့် လုပ်ငန်းရှင်များတွင် ထိခိုက်နစ်နာသွားကြရသည်။

ယင်းသို့ဖမ်းဆီးလိုက်ပြီးနောက် စစ်တွေတွင် ဆေးနှင့်လျှပ်စစ်ပစ္စည်းများ အဝင်မရှိဘဲ ပြတ်လပ်နေသလို ယခင်ရှိထားသည့်ဆေးဝါးများနှင့်လျှပ်စစ်ပစ္စည်းများသည်လည်း ဈေးနှုန်းမြင့်တက်လျက်ရှိသည်ဟုမြို့ခံများက ပြောသည်။

ပြီးခဲ့သည့်ဇူလိုင်လအတွင်းကလည်း ဧရာ၀တီတိုင်းမှ ရခိုင်သို့စက်လှေများဖြင့် သယ်ဆောင်လာသည့် စားသောက်ကုန်များ၊ဆေးဝါး၊ လူသုံးကုန်ပစ္စည်းများနှင့်ငွေလွဲငွေထုတ်လုပ်ရန်ငွေသားကျပ်သိန်းသောင်းနှင့်ချီတို့ကိုလည်း တရားမဝင်ကုန်ပစ္စည်းဟုဆိုကာစစ်ကောင်စီ၏ တရားမဝင်ကုန်စည်တိုက်ဖျက်ရေးအဖွဲ့က ဧရာ၀တီတိုင်းချောင်းသာနှင့် ငပုတောမြို့နယ်တို့ရှိပင်လယ်ပြင်တို့တွင်ဖမ်းဆီးခဲ့သည့်ဖြစ်စဥ်အချို့လည်းရှိခဲ့သည်။

စက်လှေများနှင့်စက်လှေပေါ်ပါလာသူတို့သည်လည်း သက်ဆိုင်ရာနယ်မြေဒေသများတွင်ဖမ်းဆီးချုပ်နှောင်ခံနေရဆဲဖြစ်သည်။

ပြည်တွင်းတွင်တရားဝင်အသုံးပြုနေသည့် ကုန်ပစ္စည်းများနှင့် ငွေသားများကို ရခိုင်သို့ တင်ဆောင်ရာတွင်တရားမဝင် ကုန်ပစ္စည်းဟု စစ်ကောင်စီကသတ်မှတ်ပြီးဖမ်းဆီးခြင်းမှာ အလွန်ယုတ်ညံ့သည့်လုပ်ရပ်ဖြစ်သည်ဟုလည်းဒေသတွင်းပြောဆိုနေကြသည်။

ယခုကိစ္စနှင့်ပတ်သက်ပြီး ရခိုင်ပြည်နယ် စစ်ကောင်စီပြောခွင့်ရသူပြည်နယ်ဥပဒေချုပ် ဦးလှသိန်းကို နိရဥ္စရာကဆက်သွယ်ခဲ့သော်လည်း ဖုန်းလက်ခံဖြေကြားခြင်းမရှိခဲ့ပါ။

ဓာတ်ပုံ- ရန်ကုန်မှကုန်ပစ္စည်းများသယ်ဆောင်လာသည့်သင်္ဘောတစ်စီးစစ်တွေဆိပ်ကမ်းတွင်ရပ်နားထားသည်ကိုတွေ့၇စဉ်။ (Photo - သိကြားစေချင်ငွေသဇင်)

#ရန်ကုန်

မင်္ဂလာပါ လူကြီးမင်းတို့ခင်ဗျာ။ ကျနော်တို့မီဒီယာဆက်လက်ရပ်တည်ရှင်သန်ရေးအတွက် လူကြီးမင်းတို့ရဲ့ပူးပေါင်းဆောင်ရွက်မှုနဲ့ ကူညီမှုတွေကို အထူးလိုအပ်နေပါတယ်။

လှူရန်

ဆက်စပ် အကြောင်းအရာများ

တစ်နေ့တာ၏ အရေးကြီးဆုံး ပြည်တွင်းပြည်ပ သတင်းများနှင့် အဖြစ်အပျက်များကို လစဥ် လူကြီးမင်း၏ အီးမေလ်းထဲသို့ ရယူနိုင်ပါသည်

ဆက်စပ် အကြောင်းအရာများ

နောက်ဆုံးရသတင်းများ