တောင်ကုတ်တွင် လစာထုတ်၍ ပြန်လာသည့် သူနာပြုနှစ်ဦးနှင့် ကျောင်းဆရာမသားမိ စစ်ကောင်စီဖမ်းဆီး

ကံ့ကော်နီနီ

နိရဉ္စရာ၊ ဩဂုတ် ၃ / ၂၀၂၄

ရခိုင်ပြည်၊ တောင်ကုတ်မြို့သို့ လစာထုတ်၍ ပြန်လာသည့် သူနာပြုဆရာမ ၂ ဦး၊ ကျောင်းဆရာမတစ်ဦးနှင့် အရွယ်မရောက်သေးသည့် ကလေးငယ်တစ်ဦးတို့ကိုစစ်ကောင်စီတပ်က ဖမ်းဆီးထားကြောင်း သတင်းရရှိသည်။

ဖမ်းဆီးခံရသူများမှာ တောင်ကုတ်မြို့နယ်၊ နတ်မော်ကျေးရွာမှ ဂျီပြင်ကျေးရွာတွင်တာဝန်ကျနေသည့် သူနာပြု မမိုးစန္ဒာ(၂၄)နှစ်နှင့် သူနာပြု ဒေါ်သီသီလွင်၊ကျောင်းဆရာမတစ်ဦးနှင့် ၄င်း၏ ကလေးငယ်တို့ဖြစ်ကြောင်း သိရသည်။

၄င်းတို့ကို ဇူလိုင်လ ၃၁ ရက်၊ ညနေပိုင်းက တောင်ကုတ်မြို့တွင် လစာထုတ်ပြီး တာဝန်ကျရာကျေးရွာသို့ပြန်ရာတွင် တောင်ကုတ်မြို့၊ ခမရ(၃၄၆) တပ်ရင်းထွက်ဝ ဖုန်ညိုတံတားစစ်ဆေးဂိတ်တွင် စစ်ကောင်စီတပ်ကဖမ်းဆီးခဲ့ခြင်းဖြစ်ကြောင်း သူနာပြုများနှင့် နီးစပ်သည့်အသိုင်းအဝိုင်းမှ မြို့ခံတစ်ဦးက နိရဉ္စရာသို့ ပြောသည်။

"လစာထုတ်ပြီးအပြန်မှာ ဖုန်ညိုစစ်ဆေးရေးဂိတ်မှာဖမ်းထားတယ်လို့ သိရတယ်။ သူနာပြုတစ်ယောက်နာမည်ကတော့ မိုးစန္ဒာတဲ့။ ဂျီပြင်ရွာမှာတာဝန်ကျနေတာ။ သူနဲ့အတူ နောက်ထပ်သူနာပြုတစ်ယောက်၊ကျောင်းဆရာမတစ်ယောက်နဲ့ ကလေးလေးတစ်ယောက်ကိုပါ ဖမ်းဆီးထားတယ်" ဟု ပြောသည်။

ဖမ်းဆီးခံရသည့်ထဲမှ ကလေးငယ်မှာ ကျောင်းဆရာမ၏ ကလေးငယ်ဖြစ်ကြောင်း ၄င်းက ဆက်ပြောသည်။

"ဆရာမကလည်း ဂျီပြင်ကပဲလို့ သိရတယ်။ ကလေးလေးကတော့ ဆရာမရဲ့ကလေးလေးပါ" ဟု ပြောသည်။

လက်ရှိတွင် စစ်ကောင်စီတပ်က ဖမ်းဆီးထားသူများကို ခမရ (၅၄၄)တပ်ရင်းထဲတွင်ထိန်းသိမ်းထားပြီး ယနေ့ ဩဂုတ်လ ၃ ရက်၊ နေ့လယ်ပိုင်းထိပြန်လွှတ်ပေးခြင်းမရှိသေးကြောင်း သိရသည်။

ပြီးခဲ့သည့် ဇူလိုင် ၇ ရက်၊ နေ့လယ်ပိုင်းကလည်း တောင်ကုတ်မြို့နယ်၊ ဝက်ကျိတ်အုပ်စု၊ သာယာအေးကျေးရွာမှ ဦးဘလူးချေ(ခ)ကိုကျော်ဝင်းနိုင်(၃၂)နှစ်နှင့် တောင်ကုတ်မြို့မတိုက်နယ်၊ ဝဲကြီးရွာမှ ဦးကျောက်ဖြူ (၄၀)နှစ်တို့ကို စစ်ကောင်စီ၏တပ်ရင်းတစ်ခုဖြစ်သည့် တောင်ကုတ် ခမရ (၅၄၄)က တောင်ကုတ်မြို့နယ်၊ ဝဲကြီးရွာရှိ ဦးကျောက်ဖြူ၏နေအိမ်အတွင်း ဝင်ရောက်ဖမ်းဆီးသွားခဲ့သည်။ 

သူတို့နှစ်ဦးနှင့် တစ်လခန့်ကြာသည်အထိ မိသားစုဝင်များ အဆက်အသွယ်မရဖြစ်နေကြောင်း သိရသည်။

ရခိုင်တွင် စစ်ရှုံးနေသည့်စစ်ကောင်စီသည် အရပ်သားပြည်သူများအပြင် ၄င်း၏ပညာရေးဝန်ထမ်းများအပါအဝင် ဌာနဆိုင်ရာဝန်ထမ်းများကိုပါ မထင်လျှင် မထင်သလို ဖမ်းဆီးမှုများရှိလာနေသည်။

ဇူလိုင်လ ၂၃ ရက်ကလည်း အမ်းမြို့၊ အမှတ် (၃)ရပ်ကွက်တွင် ဘော်ဒါဆောင်ဖွင့်လှစ်သင်ကြားနေသည့် အလယ်တန်းပြကျောင်းဆရာတစ်ဦးကို စစ်ကောင်စီကဖမ်းဆီးပြီး နှိပ်စက်ညှဥ်းပန်း၍ စစ်ဆေးရုံတွင်တင်ထားရကြောင်း မြို့ခံများထံမှ သိရှိရသည်။

ဓာတ်ပုံ - တောင်ကုတ်မြို့တွင်းတစ်နေရာအား ၂၀၂၄ ခုနှစ်၊ ဇူလိုင်လနောက်ဆုံးပတ်က တွေ့ရစဥ်။