ကံ့ကော်နီနီ

နိရဉ္စရာ၊ ဩဂုတ် ၅ / ၂၀၂၄

ရခိုင်ပြည်တောင်ဘက်စစ်ရေးပြင်းထန်နေသည့် သံတွဲနှင့် ဂွမြို့နယ်တို့မှ စစ်ဘေးရှောင်ကြသည့်ဒေသခံများမှာဧရာ၀တီတိုင်း စစ်ဆေးရေးဂိတ်တွင် လ၀ကမှူးကိုယ်တိုင်ဦးစီး၍ငွေညှစ်တောင်းခံမှုများကို ကြုံတွေ့နေကြရကြောင်း နိရဥ္စရာသတင်းဌာနသို့ ပြောသည်။

ရေကြည်မြို့နယ်၊ရေနံ့သာစစ်ဆေးရေးဂိတ်တွင် လူဝင်မှုကြီးကြပ်ရေးဦးစီးမှူး ဦးမျိုးသန်းဦးစီး၍ရခိုင်ပြည်ဘက်မှ စစ်ရှောင်များတင်ဆောင်လာသည့် ယာဥ်များကိုဖြတ်သန်းသွားလာခွင့်အတွက်ငွေညှစ်ကောက်ခံနေခြင်းဖြစ်ကြောင်း စစ်ရှောင်များကပြောသည်။

"ရေကြည်မြို့နယ်ရေနံ့သာစစ်ဆေးရေးဂိတ်မှာ လ၀ကမှူးနဲ့အဖွဲ့က စစ်ရှောင်တွေဆီကနေ ငွေတောင်းနေတာ။ငွေပေးမှ ဖြတ်သန်းခွင့်ရတယ်။ စစ်ဘေးရှောင်တွေလိုက်လာတဲ့ကားတွေကိုတောင်းတာ" ဟုအဆိုပါစစ်ဆေးရေးဂိတ်မှဖြတ်သန်းခဲ့ရသည့် သံတွဲမြို့နယ်မှစစ်ရှောင်အမျိုးသားတစ်ဦးကနိရဥ္စရာသတင်းဌာနသို့ ပြောသည်။

အဆိုပါစစ်ဆေးရေးဂိတ်တွင်စစ်ဘေးရှောင်များလိုက်ပါလာသည့် ကားတစ်စီးကို အနည်းဆုံး ၅၀၀၀ ကျပ်မှ ၅၀၀၀၀ကျပ်အထိတောင်းခံနေကြောင်း သိရှိ၇သည်။

စစ်ဘေးရှောင်များမှာစစ်ဆေးရေးဂိတ်ဖြတ်သန်းခွင့်မရ၍ လိုရာခရီးမရောက်မည်ကိုစိုးရိမ်ကာ၄င်းတို့ငွေညှစ်ကောက်ခံသမျှ ပေးနေရကြောင်း အဆိုပါစစ်ရှောင်အမျိုးသားက ပြောသည်။

"စစ်ရှောင်တွေမှာလည်းဒီဘက်မှာတိုက်ပွဲပြင်းထန်နေလို့ အသက်အန္တရာယ်ကလွတ်ရာလွတ်ကြောင်းထွက်ပြေးကြရတာ။သူတို့တောင်းတာမပေးရင် ကားတွေပြန်လှည့်ခိုင်းမှာကိုစိုးတာနဲ့တောင်းသမျှပေးနေကြရပါတယ်" ဟု နိရဥ္စရာသတင်းဌာနသို့ ပြောသည်။

သံတွဲမြို့အပါအဝင်ခမ၇(၅၆၆)၊ ခလ၇(၅၅) ၊ သံတွဲလေဆိပ်၊ အဏ္ဏဝါရိပ်သာနှင့်စစ်ကောင်စီတပ်စခန်းငယ်များအားလုံးကို အာရက္ခတပ်တော်(AA)က သိမ်းပိုက်ထိန်းချုပ်ထားပြီးသံတွဲမြို့နယ်မှနောက်ဆုံးကျန်ရှိနေသည့် ကွင်းဝိုင်းရေတပ်စခန်းကိုဆက်လက်ထိုးစစ်ဆင်နေခြင်းဖြစ်သည်။

အာရက္ခတပ်တော်၏သံတွဲဒေသတစ်ခုလုံးသိမ်းပိုက်နိုင်ရေးထိုးစစ်နှင့်အတူစစ်ရေးအရှိန်ပိုမိုပြင်းထန်လာ၍ သံတွဲ၊ ကျိန္တလီ၊ဂွမြို့နယ်တို့မှဒေသခံပြည်သူများမှာ ဧရာ၀တီတိုင်းနှင့် ရန်ကုန်ဘက်သို့အိုးအိမ်စွန့်ခွာ စစ်ဘေးရှောင်နေကြ၇ခြင်းပင်ဖြစ်သည်။

ဓာတ်ပုံ -ပုံဟောင်း