နောင်မင်းသူ၊နိရဉ္စရာ၊ ဩဂုတ် ၉ /၂၀၂၄

ရခိုင်ပြည်၊မောင်တောမြို့တွင်းအား အာရက္ခတပ်တော်က ဝင်စီးပြီး ပိတ်မိနေကြသည့် ဒေသခံရခိုင်၊ မွတ်ဆလင်၊ ဟိန္ဒူစသည့် သောင်းချီရှိနေသော ပြည်သူများကို အာရက္ခတပ်တော်(AA) က ကယ်ထုတ်နေကြောင်းကယ်ထုတ်ခံနေ၇သူများက ပြောသည်။

အာရက္ခတပ်တော် တပ်ဖွဲ့ဝင်များသည် ယနေ့ ဩဂုတ်လ၉ ရက်နံနက်တွင်လည်း ဒေသခံပြည်သူများကို ကယ်ထုတ်ခဲ့သည်ဟု  မောင်တော၌ပိတ်မိပြီး AA ကယ်ထုတ်ရာတွင် ပါလာသည့်ဒေသခံတစ်ဦးက နိရဉ္စရာကို ပြောသည်။ 

"ဒီနေ့မနက်မှာ မောင်တောမြို့ကို AA ဘက်ကဝင်စီးလိုက်ပြီ။မောင်တောမှာပိတ်မိနေတဲ့ ၇ခိုင်၊ မွတ်ဆလင်၊ဟိန္ဒူမိသားစုသောင်းနဲ့ချီပြီး AA ဘက်ကကယ်ထုတ်ပေးခဲ့ကြတယ်။ တိုက်ပွဲက ပြင်းထန်နေတယ်။ လေကြောင်းနဲ့ဆက်ပြီးဗုံးကြဲနေတယ်"ဟု၎င်းက ပြောဆိုသည်။

မောင်တောမြို့နှင့် နခခ(၅)အား AA က စစ်မျက်နှာ ၅ ခုအထိဖွင့်လှစ်ပြီးထိုးစစ်ဆင် တိုက်ခိုက်နေကာ လက်ရှိတွင် မြို့တွင်းအထိ စီးနင်းဝင်ရောက်လျက်ရှိနေကြပြီဖြစ်သည်။

မြို့သိမ်းတိုက်ပွဲများမှာလည်းအလွန်ပြင်းထန်စွာဖြစ်ပွားလျက်ရှိနေကြကြောင်း ဒေသံများထံမှ သိ၇သည်။

ကယ်ထုတ်ခံလာရသည့် ဒေသခံမွတ်ဆလင်တစ်ဦးကလည်း"မြို့မှာဘယ်လိုမှ နေလို့ မရတော့ပါဘူး။AA က မြို့ကိုသိမ်းတော့မယ်။ နယ်ခြားစောင့်တွေရာချီပြီး မြို့တွင်းက  လူနေအိမ်တွေကိုဝင်လာကြတယ်။နယ်ခြားစောင့်တွေကတော့ပြောပါတယ်။ကျွန်တော်တို့ ဘာမှမလုပ်ဘူး။နေလို့ရပါတယ်တဲ့။ ဒါပေမဲ့ AA ဘက်က မြို့ထဲကို ဝင်လာနေကြပြီ။တိုက်ပွဲဖြစ်လာရင်ကြားညှပ်သွားကြမယ်။ အဲ့ဒါကြောင့်မြို့က ထွက်ပြေးလာကြရတယ်။ AA ဘက်က ရဲဘော်တွေလည်း အကူအညီပေးကြပါတယ်။ လမ်းမလျှောက်နိုင်တဲ့ လူအိုတွေ၊ နေထိုင် မကောင်းသူတွေကိုဆိုင်ကယ်တွေနဲ့လိုက်ပို့ကြတယ်။ မသယ်ယူနိုင်တော့တဲ့အိတ်တွေကိုကူညီပြီးသယ်ပေးကြပါတယ်"ဟု ပြောဆိုသည်။

မောင်တောမြို့နှင့်နခခ(၅)တပ်ရင်းအား ဩဂုတ်လ ၃ ရက်မှစပြီး AA ဘက်ကထိုးစစ်အရှိန် မြှင့်တိုက်ခိုက်လာနေတာဖြစ်သည်။

ဩဂုတ်လ ၈ ရက်နှင့် ၉ ရက်တိုက်ပွဲတို့မှာအလွန်ပြင်းထန်ပြီး စစ်ကောင်စီဘက်ကလည်းနခခ(၅)တပ်ရင်းနှင့်မြို့မကျစေရန် ဂျက်တိုက်လေယာဉ်များဖြင့် အပြင်းအထန် ဗုံးကြဲ ခုခံကာကွယ်လျက်ရှိနေကြသည်။

ဓာတ်ပုံ- မောင်တောမြို့တွင်းပိတ်မိပြည်သူများကို AA ကသြဂုတ် ၉ ရက်တွင် ကယ်ထုတ်ပေးခဲ့စဉ်။