ဧရာ၀တီ-ရခိုင် ကားလမ်းပေါ်တွင် AA သံသယဖြင့် ခရီးသွားလူငယ်များကို အတင်းအကျပ် စစ်ဆေးမှုများရှိနေ

Preview

ဧရာ၀တီ-ရခိုင် ကားလမ်းပေါ်တွင် AA သံသယဖြင့် ခရီးသွားလူငယ်များကို အတင်းအကျပ် စစ်ဆေးမှုများရှိနေ

သြဂုတ် ၁၀/ ၂၀၂၄ | ကြည့်ရှုသူ :3036

စောရှင်မေ၊နိရဉ္စရာ၊ ဩဂုတ် ၁၀/၂၀၂၄

အာရက္ခတပ်တော်(AA) က ဧရာ၀တီတိုင်းသို့ ဝင်ရောက်လာမည်ဆိုသည့် ကောလာဟလ ပျံ့နှံ့နေသည့် သတင်းများကြောင့်ဧရာ၀တီတိုင်းနှင့် ရခိုင်ပြည်အကြား ဆက်သွယ်ထားသည့်ကားလမ်းပေါ်တွင် စစ်ကောင်စီ တပ်မှ စစ်တပ်အရာရှိကြီးများကိုယ်တိုင်ခရီးသွား ပြည်သူများကို အာရက္ခတပ်တော် (AA) သံသယဖြင့်အတင်းအကျပ် စစ်ဆေးမှုများ ရှိနေသည်ဟုခရီးသွားလာသူများက နိရဉ္စရာသို့ ပြောသည်။

ကိုယ်တိုင် စစ်ဆေးခံခဲ့ရသူ ဒေသခံခရီးသွားလာသူတစ်ဦးက "လက်ဝါးဖြန့်ပြီး ကိုင်ကြည့်တယ်။ ပွတ်ကြည့်တယ်။ အသားမာတက်နေလားပေါ့။ ပုဆိုးတွေ၊ ဘောင်ဘီတွေကို လှန်ပြီးဒူးခေါင်းတွေကို လှန်ကြည့်တယ်။ ပခုံးတွေကိုကြည့်တယ်။ အေအေ စစ်သင်တန်းဆင်း ထားတာလား။ အဲဒါကိုကြည့်တာနေမှာပေါ့။ အရာရှိတွေ ကိုယ်တိုင် စစ်တာလေ။ ဒီရက်ပိုင်းတွေ ပိုပြီးတော့စစ်စစ်ပေါက်ပေါက်တွေ စစ်လာတယ်။ ရခိုင်ပြည်ကိုအဝင်တွေကပိုအစစ်ခံ၇တယ်" ဟုပြောသည်။

ထိုသို့ စစ်ဆေးရာတွင် အသက် ၂၀ ဝန်းကျင် မိန်းကလေးနှင့် ယောကျာ်းလေးများအားအဓိကထားစစ်ဆေးသည်ဟု သိ၇သည်။

“ စစ်တာက ဒီလ ဩဂုတ်လဆန်းကတည်းက စစ်တာ။ တပ်ရင်းနံပတ်တော့ မသိဘူး။ ဧရာ၀တီတိုင်းဘက်က အမြောက်တပ်စစ်ဆေးရေးဂိတ်မှာ စစ်ဆေးခံခဲ့၇တာ။ လက်ဝါးပြင်၊ ဒူးခေါင်း၊ ပခုံးစသည့် ကိုယ်လက် အကုန်လုံးကို စစ်ဆေးတယ်” ဟု ပြောသည်။

ရခိုင်ပြည်သို့အဝင် အထွက် ခရီးသည်များ စစ်ဆေးရာတွင် မှတ်ပုံတင်၊ ထောက်ခံစာနှင့် ကိုယ်ခန္ဓာအနှံ့ စစ်ဆေးသည့်အပြင်တည်းခိုမည့်နေရာ၊ သွားရောက်မည့်နေရာ၊သွားရောက်မည့်အကြောင်းတို့ကိုလည်း စစ်ကောင်စီ တပ်သားများက စစ်စစ်ပေါက်ပေါက် စစ်ဆေးမေးမြန်းကြောင်းလည်း သိရသည်။

နောက်ထပ်ဒေသခံခရီးသွားတစ်ဦးက "ရခိုင်ကို ဘာလုပ်ဖို့ ပြန်တာလဲ။ဒီလောက်တိုက်ပွဲတွေ ဖြစ်နေတာလို့မေးတယ်။ တစ်ယောက်နဲ့ တစ်ယောက်အမေးခံရတာမတူဘူး။ ရခိုင်ကနေ ပြည်မဘက်ကိုသွားတဲ့သူတွေကိုလည်း အကုန်မေးတာ။ ဘာလုပ်ဖို့လဲ။ဘယ်သွားမလဲ။ ဘယ်မှာတည်းမလဲ။ လိပ်စာကအစအကုန်ရေးမှတ်ထားလိုက်တာ"ဟုပြောသည်။

ထိုသို့ စစ်ဆေးမေးမြန်းမှုရှိနေသော်လည်းလက်ရှိတွင် ခရီးသည်များအား အဖမ်းအဆီး တစ်စုံတရာရှိသည်ဟု မကြားရသေးကြောင်းလည်း ဒေသခံခရီးသွားများကပြောသည်။

ထို့အပြင်ပြီးခဲ့သည့် ဩဂုတ်လဆန်းပိုင်းတွင်လည်းသံတွဲမှတ်ပုံတင် သတန (နိုင်) ကိုင်ဆောင်သူများကို ရန်ကုန်နှင့် ဧရာ၀တီတိုင်းဘက်ကနေသံတွဲမြို့သို့ ပြန်လည် ဝင်ရောက်ခွင့်ကို စစ်ကောင်စီက ပိတ်ပင်ထားကြောင်း သိရသည်။

ဧရာ၀တီတိုင်းနှင့်ရခိုင်ပြည်အကြား လမ်းပေါ်ရှိ ရေနံ့သာလမ်းဆုံနှင့် ဂွတောင်ကြားလမ်း အဆင်း ရခိုင်ပြည်ဘက်ခြမ်းရှိဂွမြို့အဝင်စစ်ဆေးရေးဂိတ်များတွင် ထိုသို့ အဆင့်ဆင့် တင်းကျပ်ကန့်သတ်ထားခြင်းဖြစ်ကြောင်း သိ၇သည်။

သံတွဲမြို့သည် ဂွမြို့၏ မြောက်ဘက် မိုင် ၈၀ ကျော်အကွာတွင်တည်ရှိပြီးဂွမြို့ကို ဖြတ်သန်းပြီးမှသာ သံတွဲမြို့သို့ ဆက်လက် သွားရောက်နိုင်မည်ဖြစ်သည်။

စစ်ကောင်စီသည်သံတွဲမှတ်ပုံတင်ကိုင်ဆောင်ထားသူများကိုသာ ရခိုင်ပြည်သို့ ပြန်ဝင်ခွင့်ကန့်သတ် ထားခြင်းဖြစ်ပြီး ဂွနှင့် ကျိန္တလီမှတ်ပုံတင်နှင့် အခြားဒေသ မှတ်ပုံတင် ကိုင်ဆောင်ထားသူများကိုထောက်ခံစာအဆင့်ဆင့်ဖြင့် ဝင်ထွက်ခွင့်ပြုထားကြောင်း သိရသည်။

ရခိုင်ပြည်တွင်ဖြစ်ပွားလာသည့် တိုက်ပွဲများသည် ဂွမြို့နယ်အထိ ကျယ်ပြန့်လာနေပြီး ရခိုင်ပြည်တောင်ပိုင်းနှင့် ထိစပ်နေသည့် ဧရာ၀တီတိုင်းအတွင်းသို့ AA ဝင်ရောက်လာ မည်ကို စိုးရိမ်သောကြောင့် လုံခြုံရေးတိုးမြှင့်ထားပြီးရခိုင်မှလူအဝင်အထွက်များအား တင်ကျပ်စွာ ပိတ်ဆို့စစ်ဆေးနေခြင်းဖြစ်ကြောင်း သိ၇သည်။

ဓာတ်ပုံ- ရခိုင်ပြည်တွင်း ခရီးသွားပြည်များအား စစ်ကောင်စီတပ်သားများက စစ်ဆေးရာတွင်တွေ့၇စဥ်။ (ပုံဟောင်း)

မင်္ဂလာပါ လူကြီးမင်းတို့ခင်ဗျာ။ ကျနော်တို့မီဒီယာဆက်လက်ရပ်တည်ရှင်သန်ရေးအတွက် လူကြီးမင်းတို့ရဲ့ပူးပေါင်းဆောင်ရွက်မှုနဲ့ ကူညီမှုတွေကို အထူးလိုအပ်နေပါတယ်။

လှူရန်

ဆက်စပ် အကြောင်းအရာများ

တစ်နေ့တာ၏ အရေးကြီးဆုံး ပြည်တွင်းပြည်ပ သတင်းများနှင့် အဖြစ်အပျက်များကို လစဥ် လူကြီးမင်း၏ အီးမေလ်းထဲသို့ ရယူနိုင်ပါသည်

ဧရာ၀တီ-ရခိုင် ကားလမ်းပေါ်တွင် AA သံသယဖြင့် ခရီးသွားလူငယ်များကို အတင်းအကျပ် စစ်ဆေးမှုများရှိနေ

ဆက်စပ် အကြောင်းအရာများ

နောက်ဆုံးရသတင်းများ