တစ်ခြားစစ်မြေပြင်နှင့်မတူဘဲ ကြည်း၊ ရေ၊ လေ ဘက်ပေါင်းစုံဖြင့် တိုက်ခိုက်နေသည့်ကြားက တွန်းလှန်နိုင်သည့် AA ၏ သတ္တိနှင့်တိုက်ရည်ခိုက်ရည်ကို KIO ချီးကျူး

လူထက်နိုင်(ဒွါရာမြီ)၊ နိရဥ္စရာ၊ သြဂုတ် ၁၀ / ၂၀၂၄

စစ်ကောင်စီက ကြည်း၊ ရေ၊ လေ ဘက်ပေါင်းစုံဖြင့်တိုက်ခိုက်နေသည့်ကြားက အဆိုပါ တိုက်ခိုက်မှုများကို တွန်းလှန်နိုင်သည့်အပြင် မြို့အတော်များများကို သိမ်းပိုက်ထားနိုင်သည့် အာရက္ခတပ်တော်(AA)၏ သတ္တိနှင့် တိုက်ရည်ခိုက်ရည်ကို လေးစားချီးကျူးကြောင်း ကချင်လွတ်လပ်ရေးအဖွဲ့ (KIO) ပြောခွင့်ရပုဂ္ဂိုလ် ဗိုလ်မှူးကြီးနော်ဘူက ပြောကြားသည်။

နိရဥ္စရာသတင်းဌာနက အာရက္ခတပ်တော် ( AA)နှင့် ပတ်သက်ပြီး ဗိုလ်မှူးကြီးနော်ဘူ၏ အမြင်ကို မေးမြန်းစဉ် ထိုသို့ ပြောကြားသွားခြင်းဖြစ်သည်။

“အေအေကတော့ အင်မတန်ကြိုးစားတာကိုတွေ့ရပါတယ်။ ရခိုင်ပြည်နယ်ဘက်မှာကတော့ ထူးခြားတာကတော့ ကြည်း၊ ရေ၊ လေအားလုံး စစ်တပ်က တို့ထိုးစစ်ဆင်နေတာဖြစ်ပါတယ်။ တခြားနေရာတွေကို ရေကြောင်းနဲ့ တိုက်ခိုက်တာကတော့ မရှိသလောက်ပါဘဲ။ ဒါပေမဲ့ ရခိုင်မှာ ကတော့ ကြည်း၊ ရေ၊လေ အားလုံးပေါင်းစုံနဲ့ တိုက်ခိုက်တာဖြစ်ပါတယ်။ အဲဒါကိုခုခံနိုင်တယ်။ တွန်းလှန်နိုင်တဲ့ အေအေရဲ့သတ္တိနဲ့ တိုက်ရည်ခိုက်ရည်ကို ချီးကျူးပါတယ်” ဟု ပြောသည်။

လက်ရှိစစ်ရေးအခြေအနေအရ ရခိုင်ပြည်ကို အာရက္ခတပ်တော်က ထိန်းချုပ်နိုင်ရန် အလားအလာ ကောင်းများကို မြင်တွေ့နေရသည်ဟု ပြောသည်။

ဗိုလ်မှူးကြီးနော်ဘူက “ လူထု ထောက်ခံမှုက အဓိကကျတယ်။ အခုဆို နယ်မြေ တော်တော်များများကိုတော့ အေအေက သိမ်းပိုက်ပြီး ထိန်းချုပ်နိုင်တယ်။ ရှေ့မှာလည်း ထိန်းချုပ်သွားနိုင်လိမ့်လို့ မြင်ပါတယ်ခင်ဗျာ”ဟု ပြောကြားသည်။  

တော်လှန်ရေးတွင် ပြည်သူများ၏ ထောက်ခံမှု အရေးကြီးကြောင်း၊ ပြည်သူများ အနေဖြင့်လည်း တော်လှန်ရေးနှင့် အတူ တိုက်ပွဲပြီးဆုံးအောင်ထိ ပူးပေါင်းပါဝင်ကြဖို့လည်း လိုအပ်ကြောင်း ဗိုလ်မှူးကြီးနော်ဘူက ပြောသည်။

“ ကျွန်တော်တို့ တော်လှန်ရေး အောင်မြင် ပြီးဆုံးအောင်ဆင်နွှဲကြမယ့်နေရာမှာ ပြည်သူလူထုရဲ့ အင်အားကတော့ အဓိကဖြစ်ပါတယ်။ အဲ့ဒါကြောင့်ပြည်သူလူထုတွေလည်း နိုင်ငံရေး၊ စစ်ရေး အခြေအနေကို အမြဲတမ်းနားစွင့်စေချင်တယ်။ တော်လှန်ရေးထဲမှာ ပူးပေါင်း ပါဝင်ကြဖို့၊ လူထုအနေနဲ့ တိုက်တွန်းကြဖို့၊ အားပေးကြဖို့ ပြည်သူလူထုကို အားကိုးတကြီးနဲ့ ပြောလို ပါတယ်ခင်ဗျ” ဟု ဆက်ပြောသည်။

AA သည် ရခိုင်ပြည်ရှိ ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ ပေါက်တော၊ မြေပုံ၊ ရမ်းဗြဲ၊ ရသေ့တောင်၊ ဘူးသီးတောင်၊ တောင်ပြို၊ မအီ၊ သံတွဲ စသည့်မြို့များအပါအဝင်  ချင်းပြည်နယ်မှပလက်ဝ စသော မြို့များကိုသိမ်းပိုက်ထားပြီး ကျန်ရှိနေသည့်မြို့များ၏ ကျေးလက်ဒေသ အတော်များများကို သိမ်းပိုက်ထားသည်။

ထို့အပြင် သံတွဲမြို့အား သိမ်းပိုက်ထားပြီး သံတွဲမြို့နယ်မှ တစ်ခုတည်းသာကျန်ရှိနေသည့်  စစ်ကောင်စီ၏ မောင်ရွှေလေး ရေတပ်ကို ထိုးစစ်ဆင် တိုက်ခိုက်နေသည်။  အလားတူ မောင်တောမြို့အားလည်း ထိုးစစ်ဆင် တိုက်ခိုက်နေပြီး ယနေ့လား၊ မနက်ဖြန်လား သိမ်းပိုက် နိုင်တော့မည့် အနေအထားတွင် ရှိနေကြောင်း သိရသည်။

ရခိုင်ပြည်တွင် ဖြစ်ပွားနေသည့် တိုက်ပွဲများသည် လက်ရှိ ဧရာ၀တီတိုင်းနှင့် နယ်စပ်ချင်း ထိစပ်နေသည့်  ဂွမြို့နယ်အထိ ကျယ်ပြန့်လာနေပြီဖြစ်သည်။

ဧရာဝတီတိုင်းတွင်လည်း  AA ဝင်ရောက်လာမည်ကို စိုးရိမ်သောကြောင့် စစ်ကောင်စီက စစ်အင်အားနှင့် လုံခြုံရေးတိုးမြှင့်ထားပြီး ခံကတုတ်များ၊ ဗုံးကျင်းများတူးကာ စစ်ရေး ပြင်ဆင်နေကြောင်း သိရသည်။