နောင်မင်းသူ၊နိရဉ္စရာ၊ ဩဂုတ် ၁၃/၂၀၂၄

၇ခိုင်ပြည်၊မောင်တောဒေသမှ နယ်ခြားစောင့်တပ်ဖွဲ့ဝင်၆၀၀ ကျော်ခန့်သည် မော်တော်ဘုတ်အစီး ၂၀ ကျော်ဖြင့်ယနေ့ သြဂုတ်လ ၁၃ ရက်၊မွန်းတည့်ပိုင်း၌ ပင်လယ်ဘက်သို့ ထွက်ပြေး သွားခဲ့ကြကြောင်း နယ်ခြားစောင့်နှင့် နီးစပ်သည့် သတင်းရင်းမြစ်အရ သိရသည်။ 

မျက်မြင်ဒေသခံ သတင်းရင်းမြစ်တစ်ဦးက "ဒီနေ့မနက်မှာမောင်တောဘုတ်ဆိပ် POE ဝင်/ထွက် စခန်းနဲ့ မောင်တော သင်္ချိုင်းတွေမှာစခန်းချ ခုခံနေကြတဲ့ နယ်ခြားစောင့်တွေ စက်လှေတွေနဲ့ပင်လယ်ဘက်ကိုထွက်ပြေးနေကြတာတွေ့ရတယ်။ POEကိုတော့AA ဘက်က ဝင်မစီးသေးပါဘူး။ဝင်စီးလာမှာကို ကြောက်လို့ ထွက်ပြေးကြတာ။ တိုက်ပွဲက နီးလာနေပြီလေ" ဟုပြောသည်။

အာရက္ခတပ်တော်(AA)က မောင်တောမြို့အားဩဂုတ်လ ၉ ရက်မှစပြီး စီးနင်းဝင်ရောက်လာကြ၍စစ်ကောင်စီတပ်နှင့် နှစ်ဖက်တိုက်ပွဲများပြင်းထန်စွာဖြစ်ခဲ့ကြသည်။

ယင်းနောက်မြို့ပတ်လည်တွင်စခန်းချနေရာယူထားကြသည့် နယ်ခြားစောင့်တပ်ဖွဲ့များမှာလူနေအိမ်များ၌ ဝင်ရောက်ခိုလှုံခဲ့ကြပြီး ယင်းမှတဆင့်  ဘုတ်ဆိပ် POE ဝင်/ထွက်စခန်းနှင့်မောင်တောသင်္ချိုင်းဇရပ်သို့ နောက်ဆုတ်ခုခံနေခဲ့ကြသည်ဟုလည်း သိရသည်။

လက်ရှိတွင်အဆိုပါနယ်ခြားစောင့်တပ်ဖွဲ့များမှာ ဆက်လက်မနေရဲတော့ဘဲ ယနေ့တွင်နေဗီများရှိရာ ဘင်္ဂလားပင်လယ်အော်ဘက်သို့ စတင်ထွက်ပြေးကြခြင်းလည်းဖြစ်သည်ဟု ဒေသခံများကလည်း မျက်မြင်ဒေသခံများက ပြောသည်။

ကျောက်ပန်းန္ဒူကျေးရွာဒေသခံတစ်ဦးကလည်း "ဒီနေ့ မွန်းတည့်ပိုင်းမှာ ပင်လယ်ပြင်မှာမော်တော်ဘုတ်အကြီးအငယ် အစီး ၂၀ ကျော်လောက်မောင်တောဖက်က ထွက်လာပြီး ပင်လယ်၀ဘက်ကိုသွားနေကြတာတွေ့ရတယ်။ အဲဒီအချိန်မှာပင်လယ်ဖက်က စစ်နေဗီနှစ်စီးက အမြောက်တွေ မောင်တောမြို့နဲ့နယ်ဖက်တွေကိုလှမ်းပစ်နေတာတွေ့၇တယ်"ဟု ပြောဆိုသည်။

ထိုသို့ပစ်ခတ်သည့်အမြောက်ဆံများမှာ နခခ(၅)ဝန်းကျင်အပြင်ကံပြင်သာစည် ကျေးရွာအနီး တစ်လုံးကျရောက်ခဲ့ပြီးမေယုတောင်ကြောနှင့် မြင်းလွှတ်ရွာဟောင်းအနီး အလယ်သံကျော် အနီးပုစွန်ကန်များ၌ကျရောက်ခဲ့ကြောင်း ဒေသခံများထံမှ သိ၇သည်။

ဓါတ်ပုံ-မောင်တောဘုတ်ဆိပ်POE ဝင်/ထွက်စခန်းရှိဓည၀တီရေတပ်မှ ရေကျွဲ တိုက်ခိုက်ရေးရေယာဉ်များအားတွေ့၇စဉ်။