နှင်းနွယ်နီ၊နိရဥ္စရာ၊ သြဂုတ် ၂၀/၂၀၂၄

ရခိုင်ပြည်မြို့တော်စစ်တွေမြို့ရှိ စစ်ဘေးရှောင်နေသူများ၏နေအိမ်များကို ဖောက်ထွင်း ခိုးယူသူများကိုရခိုင်ပြည်လွတ်မြောက်ရေးပါတီ (ALP) နှင့်ဆက်စပ်နေသူများဖြစ်၍စစ်ကောင်စီက ဖမ်းဆီးအရေးယူမှုမရှိကြောင်း မြို့ခံများကပြောကြသည်။

စစ်တွေမြို့မှပြည်သူအများစုသည် တိုက်ပွဲဖြစ်ပွားလာမည်ကိုစိုးရိမ်၍ ရန်ကုန်မြို့နှင့် အာရက္ခတပ်တော်(AA)ထိန်းချုပ်ရာနယ်မြေများသို့ တိမ်းရှောင်လျက်ရှိကြသည်။

မြို့နေပြည်သူအများစုမြို့ကိုစွန့်ခွာသွားကြသည့်အတွက်မြို့တွင်ကျန်ရစ်သူများမှာအလုပ်အကိုင်မဲ့ပြီး စားဝတ်နေရေးကျပ်တည်းလာကာ တချို့မှာ နေအိမ်များမှ ဖောက်ထွင်း ခိုးယူပြီးစားဝတ်နေရေးကို ဖြေရှင်းနေကြရကြောင်းမြို့ခံအမျိုးသမီးတစ်ဦးက ပြောသည်။

“အလုပ်မရှိ အကိုင်မရှိကြတော့ ခိုးတဲ့သူတွေမှာလည်း ခိုးကြတယ်။လူမနေတဲ့ အိမ်တွေကို ဖြိုပြီးတော့ ရောင်းစားသူတွေလည်းစားကြတယ်။ တချို့ဆို အိမ်ဖြိုထားတဲ့သစ်ပုံတွေကို ဝယ်ပြီးထင်းအဖြစ် ရောင်းစားကြတယ်” ဟုပြောသည်။

စစ်တွေမြို့ကိုစွန့်ခွာသွားကြသည့် နေအိမ်များမှညအချိန်မဟုတ်ဘဲ နေ့အချိန်ပင် အကြောက်အလန့်မရှိ ခိုးယူနေကြသည့်အတွက် စိုးရိမ်မိသည်ဟုမြို့ခံ အမျိုးသားတစ်ဦးက ပြောသည်။

“ခိုးကြတယ်ဆိုတာမှာ နေ့ခင်းကြောင်တောင်တက်ခိုးတယ်။ကျနော်တို့အိမ်နားမှာဆို အိမ်ပေါ်မှာမူးယစ်ဆေးပါသုံးကြသေးတယ်။ ဒါကိုမြင်လို့ သွားတားမယ်ဆိုရင် ကိုယ့်ကို အသက်အန္တရာယ်ပြုနိုင်လို့ မပြောရဲဘူး” ဟုပြောသည်။

ခိုးယူသူများများပြားနေကြသော်လည်း ခိုးယူသူများကိုစစ်ကောင်စီက မဖမ်းဆီးခြင်းမှာ စစ်ကောင်စီနှင့်နီးစပ်သည့် ဒေါ်စောမြရာဇာလင်းဦးဆောင်သော ALP ပါတီနှင့် ဆက်စပ်နေသူများဖြစ်၍ မဖမ်းဆီးခြင်းဖြစ်နိုင်သည်ဟု သူကဆက်ပြောသည်။

“အခုက ခိုးတဲ့သူတွေက ALP ကို ဝင်ထားကြတယ်။ ခိုးလို့ ရဲစခန်းမှာအဖမ်းခံရရင် ALP က သူတို့အဖွဲ့မှာ ဝင်ဖို့ ခေါ်ပြီးအာမခံနဲ့ထုတ်ပေးတယ်လို့ကြားတယ်။ ဒါကြောင့် နာဇီရွာတို့၊ ရွှေပြားတို့ဘက်က တချို့ဆို ALP ထဲ မနည်းဝင်သွားကြတယ် ကြားမိတယ်။ဒီလောက် နေ့ခင်းကြောင်တောင်အိမ်တွေက ပေါ်တင်ခိုးရဲတယ်။အိမ်ပေါ်မှာ တက်နေရဲတယ် ဆိုကလည်းကစဥ်းစားကြည့်လေ။ နောက်က အဖွဲ့အစည်းတစ်ခုရှိနေတယ်ဆိုတာ သေချာနေတာပဲ မဟုတ်ဘူးလား” ဟုပြောသည်။

ALP သည် စစ်တွေမြို့တွင် ယခင်ကတည်းကခိုးဆိုးလုယက်သူများကို သူတို့အဖွဲ့ဝင်အဖြစ် လက်သပ်မွေးထားကြောင်းစစ်တွေမြို့ခံများက ပြောကြသည်။

ယခုကိစ္စနှင့်ပတ်သက်ပြီး  ခိုးဆိုးလုယက်သူများမှာ နီးစပ်မှုရှိ/မရှိALP တာဝန်ရှိသူများကိုနိရဥ္စရာအနေဖြင့် မေးမြန်း၍ မရသဖြင့် သီးခြားအတည်ပြုနိုင်ခြင်းမရှိသေးပါ။

ယခုကဲ့သို့ စစ်တွေမြို့တွင် ခိုးဆိုးလုယက်သူများကနေအိမ်များကို ဖောက်ထွင်းခိုးယူခြင်းများ အပြင်နေအိမ်ပေါ်ကို တက်ရောက်ပြီး မူးယစ်ဆေးသုံးစွဲခြင်းနှင့်မီးရှို့ခြင်းများ ရှိနေသော်လည်း စစ်တွေမြို့ကိုအုပ်ချုပ်နေသည့် ဦးထိန်လင်း၏ ပြည်နယ်စစ်ကောင်စီက အရေးယူဆောင်ရွက်ခြင်းများမရှိဟု ပြည်သူများက ပြောကြသည်။

ထို့ကြောင့်မြို့နေပြည်သူများမှာ ညအချိန်ရောက်လျှင်မလုံခြုံမှုများကို ခံစားနေကြရပြီး ဆွေမျိုးအချင်းချင်း စုနေမည်ဆိုလျှင်လည်း စစ်ကောင်စီကဧည့်စာရင်းစစ်ဆေးကာ ဖမ်းဆီးခြင်းများရှိနေသည့်အတွက်ပိုပြီး အခက်အခဲဖြစ်နေကြရသည်ဟု သိရသည်။

စစ်တွေတွင်လူမနေသည့်အိမ်များကို ဖောက်ထွင်းခိုးယူခြင်းနှင့်ဖြိုဖျက်ရောင်းစားပြီး စားဝတ်နေရေးကို ဖြေရှင်းနေကြသူများရှိသော်လည်းတစ်ဘက်တွင် လမ်းဘေးမှ အသီးအရွက်များကို ခူးယူစားသောက်သူ၊တောင်းရမ်းစားသောက်သူ၊ ဆိုက္ကားနင်းသူ၊ ရေအိုင်နှင့်ချောင်းမြောင်းများမှငါးဖမ်းပြီး ရောင်းစားသူ အစရှိသကဲ့သို့ ရိုးရိုးသားသားလုပ်ကိုင်စားသောက်နေကြသူများလည်း ရှိကြောင်း မြို့ခံများက ပြောကြသည်။

ဓာတ်ပုံ - စစ်တွေရှိ လူမနေသည့်အိမ်များကိုဖောက်ထွင်းပြီး နေအိမ်တံခါးများအားဖြိုဖျက်ကာထင်းအဖြစ်ရောင်းစားနေမှုအား တွေ့၇စဥ်။ (Photo-CJ)