ဂွမြို့နယ် ကုလားပြင်ကျေးရွာသင်္ချိုင်း၌ စစ်ကောင်စီအလောင်းအများအပြားကို ဒေသခံများ၏ အကူအညီဖြင့် မြေမြှုပ်သင်္ဂြိုလ်

မင်းသျှင်စော၊ နိရဉ္စရာ၊သြဂုတ် ၂၉ ၊ ၂၀၂၄

ရခိုင်ပြည်၊ ဂွမြို့နယ်၊ ကုလားပြင်ကျေးရွာသင်္ချိုင်း၌  စစ်ကောင်စီဘက်က သေဆုံးသွားခဲ့သည့် အလောင်းအများအပြားကို ပြည်သူ့စစ်နှင့် စစ်တပ် ထောက်ခံ သူများကိုခေါ်ယူပြီး မြေမြှုပ်သင်္ဂြိုလ်ခဲ့သည်ဟု  ခိုင်လုံသည့် ဒေသသတင်းရင်းမြစ် အရ သိရှိရသည်။

ဒေသခံ သတင်းရင်းမြစ်က " သြဂုတ် ၂၇ ညနေအချိန်မှာ ကုလားပြင်ပြည်သူ့စစ်တွေက တဆင့်နီးစပ်ရာ လူတွေကိုခေါ်ပြီးကုလားပြင်သုသာန်မှာ မြေမြှုပ်ခိုင်းတယ်။ တချို့ဆို ပုပ်စော်နံနေပြီ။  အကုန်လုံးက လက်နက်ကြီး ထိတာများတယ်။ တချို့အလောင်းတွေကို အချိန်မရတဲ့အတွက် နည်းနည်လေး မြေတူးပြီး  သစ်ကိုင်းသစ်ရွက်တွေ ဖုံးအုပ်ပြီးထားခဲ့တယ်။ ခန့်မှန်းခြေအရေအတွက်က လေးဆယ်ကျော်လို့ သိရပါတယ်။ နောက်ထပ်ဒဏ်ရာရထားသူ အများအပြားလည်း ရှိတယ်"ဟု ပြောကြားသည်။

ကျိန္တလီမြို့မှတပ်ဆုတ်လာသည့် စစ်ကောင်စီတပ်သည် ကုလားပြင်ရှိ စစ်တပ်နှင့် ပူးပေါင်းကာ အာရက္ခတပ်တော်၏ ထိုးစစ်ကိုခုခံစဉ် နှစ်ဖက်တိုက်ပွဲပြင်းထန်ခဲ့ပြီး စစ်ကောင်စီဘက်က အကျအဆုံးများခဲ့သည်ဟု ဒေခံများက ပြောကြားသည်။

“ တိုက်ပွဲက  ဂွမြို့နယ် ကုလားပြင်နဲ့ ကျောက်တံခါးကျေးရွာနားတွေမှာ ဖြစ်တယ်။ စစ်ကောင်စီ တပ်ဖက်မှ တိုက်ရည်ခိုက်ရည်နဲ့ နယ်မြေဒေသ မကျွမ်းတော့ အကျအရှုံးများပြားတယ်လို့ သိရပါတယ်” ဟု ပြောသည်။

စစ်ကောင်စီသည် ထိုသို့ အကျအဆုံးများသဖြင့် တင့်ကားများကို အထိုင်ချပြီး ပစ်ကူ​ပေးခြင်း၊ အမြောက်တပ်က လက်နက်ကြီး ပစ်ကူခြင်း၊ ရေတပ်စစ်ရေယာဉ်များမှ လက်နက်ကြီးဖြင့် ပစ်ကူပေးခြင်းနှင့် လေယဉ်ပစ်ကူပေးခြင်းတို့ကို ကြေး၊ရေ၊လေကို အသုံးပြုပြီး အာရက္ခတပ်တော်၏ ထိုးစစ်ကို အပြင်းအထန်ခုခံနေသည်။

တိုက်ပွဲဖြစ်ပွားနေသော အနီးဝန်းကျင် ကျေးရွာများမှ ပြည်သူများမှာ အိုးအိမ်များကို စွန့်ခွာပြီး  ဘေးလွှတ်ရာသောထွက်ပြေးတိမ်းရှောင်နေကြောင်း သိရှိရသည်။