မောင်စာဂ၊နိရဥ္စရာ၊ သြဂုတ် ၃၀/၂၀၂၄

ရခိုင်ပြည်၊အမ်းမြို့နယ်ဘက်သို့ ဦးတည်ထွက်ခွာလာသည့် စစ်ကောင်စီတပ်ကို လူထုတော်လှန်ရေးမဟာမိတ်အင်အားစု(PRA-Magway)က ကြားဖြတ်တိုက်ခိုက်၍ဗိုလ်ကြီးတစ်ဦးအပါအဝင် ၁၅ဦးခန့် သေဆုံးသွားကြောင်း သိ၇သည်။

ယမန်နေ့ဩဂုတ် ၂၉ ရက်၊ နံနက် ၅ နာရီကျော်တွင် ပဒါန်းအခြေစိုက်အမြောက်စစ်ဆင်ရေးကွပ်ကဲမှုဌာနချုပ်(မစခ-၉၀၅)မှ ထွက်လာသည့် အင်အား ၆၀ ခန့်ပါစစ်ကောင်စီယာဉ် ၂ စီးကို မကွေးတိုင်း၊ ငဖဲမြို့နယ်ရှိပဒါန်း-အမ်း လမ်းပိုင်းစပ်စီကျေးရွာ အထက် မီတာ ၂၀၀၀ ခန့်အကွာတွင် စောင့်ကြို မိုင်းဆွဲတိုက်ခိုက်ခဲ့သည်ဟုPRA က ထုတ်ပြန်ထားသည်။

မိုင်းဆွဲပြီးနောက်လက်နက်ငယ်များဖြင့် အပြန်အလှန်ပစ်ခတ်မှု နာရီဝက်နီးပါး ကြာမြင့်ခဲ့သည်ဟု ဆိုသည်။

ယင်းနောက် စစ်ကောင်စီတပ်က သေဆုံးထိခိုက်သူများကိုသယ်ဆောင်ကာ ပဒါန်းဘက်သို့ ပြန်ဆင်းလာစဥ်စပ်စီကျေးရွာအထက်ဘက် မီတာ ၁၀၀၀ ခန့်အကွာသို့အရောက် နံနက် ၁၀ နာရီခန့်တွင်လည်းထပ်မံမိုင်းဆွဲတိုက်ခိုက်ခဲ့သည်ဟု ထုတ်ပြန်ထားသည်။

တိုက်ပွဲအတွင်းကပစ(၁၄)မှ ဗိုလ်ကြီး မျိုးကျော်သူ အပါအဝင် စစ်ကောင်စီတပ်ဖွဲ့ဝင် ၁၅ ဦးခန့်ထိခိုက်သေဆုံးခဲ့သည်ဟု PRA-Magway၏စစ်ဦးစီးချုပ် နောင်သူရိန်က နိရဥ္စရာကို အတည်ပြုပြောသည်။

"တိုက်ပွဲထဲမှာတော့ ကျနော်တို့ဘက်ကထိခိုက်ဒဏ်ရာရတာတွေမရှိခဲ့ဘူး။ စစ်ကောင်စီရဲ့ ထိခိုက်သေဆုံးမှုကတော့ဒီတက်လာတဲ့လူနာတင်ကားတွေရဲ့အခြေအနေအ၇တော့ ၁၅ ယောက်လောက်ရှိနိုင်တယ်လို့ကျနော်တို့ခန့်မှန်းရတယ်ပေါ့နော်"ဟုပြောသည်။

ယင်းအပြင်စစ်ကောင်စီဘက်မှ ကားတစ်စီးလည်း သုံး၍မရအောင် အထိ ထိခိုက်ပျက်စီးသွားခဲ့သည်ဟုဆိုသည်။

သေဆုံးသွားသည့်ဗိုလ်ကြီးမျိုးကျော်သူသည် ငဖဲမြို့ရှိ စစ်မှုထမ်းကိစ္စများနှင့်ပတ်သက်ပြီးတာဝန်ယူထားသူဖြစ်သည်ဟုလည်း PRA ၏ထုတ်ပြန်ချက်တွင်ဖော်ပြထားသည်။

ယခုတိုက်ပွဲအတွင်း အခြေအနေအမျိုးမျိုးကြောင့် ရှင်းလင်းရေးမလုပ်နိုင်ခဲ့၍ စစ်ကောင်စီထံမှ လက်နက်ခဲယမ်းများသိမ်းဆည်းရရှိမှု မရှိခဲ့ဟုလည်း ထုတ်ပြန်ထားသည်။

ယခုတိုက်ပွဲကိုဖော်ဆောင်ခဲ့သည့်PRA သည်မင်းဘူးခရိုင်အတွင်းအခြေပြုလှုပ်ရှားပြီး ပဒါန်း-အမ်းလမ်းပိုင်းကို ထိန်းချုပ်နိုင်ရေးစစ်ရေးဖော်ဆောင်လျက်ရှိသည့် အဖွဲ့ဖြစ်သည်ဟု သိ၇သည်။

ယခုတိုက်ပွဲဖြစ်ပွားခဲ့သည့်ပဒါန်း-အမ်းလမ်းပိုင်းသည် ရခိုင်ပြည်အတွင်း အဝင်အထွက် လမ်းပေါက်များထဲမှတစ်ခုဖြစ်သည်။

အာရက္ခတပ်တော်(AA)က အမ်းရှိအနောက်ပိုင်းတိုင်းစစ်ဌာနချုပ်(နပခ)ကို ထိုးစစ်ဆင် တိုက်ခိုက်လာပါကနပခ ထွက်ပြေးလာနိုင်သည့် လမ်းကြောင်းဖြစ်သည်ဟုလည်း သိ၇သည်။

မကွေးတိုင်း၊ငဖဲမြို့နယ်ရှိ မင်းဘူး- အမ်းကားလမ်းမပေါ်တွင်လည်း အင်အား ၂၀ ခန့်ပါကင်းရှည်ထွက်လာသည့် စစ်ကောင်စီစစ်ကြောင်းနှင့် အရှိုချင်းကာကွယ်ရေးတပ်(ACDF)အပါအဝင်တော်လှန်ရေးပူးပေါင်းတပ်တို့သည် ဩဂုတ်လ၁၉ ရက်၊ နံနက် ၁၁ နာရီခွဲခန့်က ထိတွေ့တိုက်ပွဲဖြစ်ပွားခဲ့သေးသည်။

အဆိုပါတိုက်ပွဲအတွင်းစစ်ကောင်စီတပ်ဖွဲ့ဝင် ၂ ဦး သေဆုံးပြီး အများအပြား ထိခိုက်ဒဏ်ရာ၇သွားသည်ဟုACDF က ထုတ်ပြန်ထားသည်။

ဓာတ်ပုံ- PRA(Magway)