စစ်ကောင်စီ နေဗီကပစ်ခတ်၍ ပေါက်တောမှ ငါးဖမ်းသမားနှစ်ဦး ပြင်းထန်ဒဏ်ရာရ

သဉ္ဇာနွယ်

နိရဉ္စရာ၊ ဩဂုတ် ၃၀/၂၀၂၄

စစ်ကောင်စီ၏ နေဗီက ပစ်ခတ်မှုကြောင့် ရခိုင်ပြည်၊ ပေါက်တောမြို့နယ်မှ ငါးဖမ်းသမားနှစ်ဦးတွင် ပြင်းထန်ဒဏ်ရာရရှိသွားကြောင်း သိရသည်။

ပြင်းထန်ဒဏ်ရာရရှိသွားသူများမှာ ပေါက်တောမြို့နယ်၊ ကြိမ်ခွေမော်ကျေးရွာမှ ဦးဝင်းဝင်း (၄၂)နှစ်နှင့် ဦးလှယဉ် (၅၈)နှစ်ဖြစ်သည်။

၎င်းတို့သည် ယမန်နေ့ ဩဂုတ် ၂၉ ရက်၊ ည ၁၁ နာရီခန့်က စစ်တွေမြစ်အတွင်း ငါးဖမ်းနေစဥ် စစ်တွေပင်လယ်ပြင်တွင် ရပ်နားထားသည့် စစ်ကောင်စီနေဗီက လက်နက်ကြီးဖြင့်လှမ်းပစ်ခဲ့သည်ဟု ကြိမ်ခွေမော်ကျေးရွာသားတစ်ဦးက နိရဉ္စရာသတင်းဌာနကိုပြောသည်။

"ကြိမ်ခွေမော်တို့၊ ဆင်တက်မော်တို့ဘက်ကဒေသခံတွေက ရေလုပ်ငန်းလုပ်ကိုင်ကြတယ်။ ပိုက်တွေဘာတွေချတယ်။ အဲလိုငါးဖမ်းထွက်တုန်း စစ်တွေပင်လယ်ပြင်မှာရပ်ထားတဲ့နေဗီက လှမ်းပစ်လိုက်တာပါ"ဟုပြောသည်။

လက်နက်ကြီးကျည်ကြောင့် ၎င်းတို့နှစ်ဦးမှာ ခန္ဓာကိုယ်အနှံ့အပြားဒဏ်ရာပြင်းထန်စွာရရှိခဲ့ပြီး အရေးပေါ်ဆေးကုသမှုခံယူနေရသည်ဟု နောက်ထပ် ဒေသခံတစ်ဦးက နိရဉ္စရာကိုပြောသည်။

"သူတို့နှစ်ယောက်မှာ ပေါင်တို့၊ ကျောကုန်းတို့မှာ ကျည်စတွေထိသွားတော့ ဒဏ်ရာက ပြင်းတယ်" ဟုပြောသည်။

ပေါက်တောမြို့ကို အာရက္ခတပ်တော်(AA) က ပြီးခဲ့သည့် ဇန်နဝါရီအတွင်းက သိမ်းပိုက်ထားသည်။

ပြီးခဲ့သည့် ဇွန်လအတွင်းကလည်း ပေါက်တောမြို့နယ်ရှိ ကြိမ်ခွေမော်၊ တောင်ဦးမော်၊ ဆင်တက်မော်၊ သဲခုံစသည့် အနည်းဆုံးကျေးရွာ ၄ ရွာကို စစ်ကောင်စီဘက်က Y-12 ထောက်ပို့လေယာဉ်ဖြင့် ဗုံးကြဲတိုက်ခိုက်ခဲ့သဖြင့် အရပ်သား သုံးဦးထက်မနည်းထိခိုက်ဒဏ်ရာရရှိခဲ့ကြောင်း သိရသည်။

စစ်ကောင်စီသည် ပေါက်တောမြို့နယ်အပါအဝင် AA က သိမ်းပိုက်ထားသည့်မြို့နယ်များကို လေကြောင်းနှင့်ရေကြောင်းတို့မှ ဗုံးကြဲတိုက်ခိုက်နေသလို စစ်တွေရှိ စစ်ကောင်စီတပ်ရင်းအချို့နှင့် စစ်တွေပင်လယ်ပြင်ရှိ နေဗီပေါ်မှလည်း လက်နက်ကြီးကျည်များမကြာခဏလှမ်းပစ်ခတ်ခြင်းများကို လုပ်ဆောင်လျက်ရှိနေကြောင်း ဒေသခံများကပြောသည်။