လူထက်နိုင်(ဒွါရာမြီ)၊ နိရဥ္စရာ၊ စက်တင်ဘာ ၂  / ၂၀၂၄

မြောက်ပိုင်းညီနောင်မဟာမိတ် (၃) ဖွဲ့ ဖြစ်ကြသည့်မြန်မာအမျိုးသားဒီမိုကရက်တစ်မဟာမိတ်တပ်မတော် (MNDAA)၊ တအာင်းအမျိုးသားလွတ်မြောက်ရေးတပ်မတော်(TNLA)နှင့် ရက္ခိုင်အမျိုးသားအဖွဲ့ချုပ်/အာရက္ခတပ်တော် (ULA/ AA) တို့ကို အကြမ်းဖက်အဖွဲ့အဖြစ်သတ်မှတ်ကြောင်း အကြမ်းဖက် စစ်ကောင်စီမှ  ကြေညာလိုက်သည်။

MNDAA နှင့် TNLA တို့အား အမိန့်ကြော်ငြာစာ(၁ /၂၀၂၄)ဖြင့်လည်းကောင်း၊ ULA/AA ကို အမိန့်ကြော်ငြာစာ (၂/၂၀၂၄)တို့ဖြင့်လည်းကောင်းစစ်ကောင်စီ အကြမ်းဖက်မှုတိုက်ဖျက်ရေးဗဟိုအဖွဲ့မှ စက်တင်ဘာလ(၂)ရက်ညနေပိုင်းတွင် ထုတ်ပြန်ခဲ့ခြင်းဖြစ်သည်။

MNDAA နှင့်TNLA တို့သည်အများပြည်သူ၏လုံခြုံရေးကိုဖြစ်စေ၊အသက်အိုးအိမ်စည်းစိမ်ကိုဖြစ်စေ၊အများပြည်သူသို့မဟုတ်တစ်ဦးတစ်ယောက်အတွက်အရေးကြီးသောအခြေခံအဆောက်အအုံများကိုဖြစ်စေ၊ နိုင်ငံပိုင် အဆောက်အအုံ၊ ယာဉ်၊စက်ပစ္စည်းကိရိယာနှင့်အသုံးအဆောင်ပစ္စည်းများကိုဖြစ်စေပြင်းထန်စွာထိခိုက်ဆုံးရှုံးစေရန်ပြုလုပ်မှုများလုပ်ဆောင်လျက်ရှိကြောင်း စစ်ကောင်စီ၏ အကြမ်းဖက်မှုတိုက်ဖျက်ရေးဗဟိုအဖွဲ့၏) ကြေညာချက်တွင်ဖော်ပြထားသည်။

ထို့ပြင်အများပြည်သူအသုံးပြုလျက်ရှိသည့်လမ်း၊တံတားများကိုမိုင်းထောင်ဖောက်ခွဲဖျက်ဆီးခြင်း၊လျှပ်စစ်တာဝါတိုင်များကိုဖောက်ခွဲဖျက်ဆီးခြင်း၊လူနေထူထပ်သည့်မြို့ရွာများကိုအဝေးမှနေ၍လက်နက်ကြီးများဖြင့်ပစ်ခတ်တိုက်ခိုက်ခြင်း၊Drop Bomb များချ၍တိုက်ခိုက်ခြင်း၊အပြစ်မဲ့ ပြည်သူများကိုသတ်ဖြတ်ခြင်း၊အတင်းအဓမ္မလူသစ်စုဆောင်းခြင်း၊နိုင်ငံတော်ပိုင်အဆောက်အအုံ၊ယာဉ်၊စက်ပစ္စည်းကိရိယာနှင့်အသုံးအဆောင်ပစ္စည်းများကိုဖျက်ဆီးခြင်းစသည့်အကြမ်းဖက် လုပ်ရပ်များကိုကျူးလွန်လျက်ရှိ သော ကြောင့် ၎င်းအဖွဲ့(၂)ဖွဲ့အားအကြမ်းဖက်အဖွဲ့များအဖြစ်ကြေညာလိုက်ကြောင်းဖော်ပြထားသည်။

အလားတူရက္ခိုင်အမျိုးသားအဖွဲ့ချုပ်/ အာရက္ခတပ်တော်(ULA/AA) တို့ အနေဖြင့်လည်းနိုင်ငံတော် စီမံအုပ်ချုပ်ရေးကောင်စီကချမှတ်ထားသည့်ရှေ့လုပ်ငန်းစဉ်(၅)ရပ်နှင့်ဦးတည်ချက်(၉)ရပ်တို့နှင့်အညီတစ်နိုင်ငံလုံးထာ၀ရငြိမ်းချမ်းရေးရရှိရေးတည်ဆောက်နိုင်ရန်အတွက်အကြမ်းဖက်မှုတိုက်ဖျက်ရေးဗဟိုအဖွဲ့က၂၀၂၁ခုနှစ်မတ်လ(၁၁)ရက်တွင်အကြမ်းဖက်အဖွဲ့အဖြစ်မှကြေညာထားခြင်းမှပြန်လည် ရုပ်သိမ်းပေးထားသော်လည်း လက်ရှိတွင် အများပြည်သူ၏ လုံခြုံရေးကိုဖြစ်စေ၊အသက်အိုးအိမ်စည်းစိမ်ကို ဖြစ်စေ၊ အများပြည်သူ သို့မဟုတ် တစ်ဦးတစ်ယောက်အတွက်အရေးကြီးသောအခြေခံ အဆောက်အအုံများကိုဖြစ်စေ၊ နိုင်ငံပိုင် အဆောက်အအုံ၊ ယာဉ်၊စက်ပစ္စည်းကိရိယာနှင့်အသုံးအဆောင်ပစ္စည်းများကိုဖြစ်စေပြင်းထန်စွာထိခိုက်ဆုံးရှုံးစေရန်ပြုလုပ်မှုများဖြစ်သည့်အကြမ်းဖက်မှုလုပ်ရပ်များကိုကျူးလွန်ဆောင်ရွက်လျက်ရှိကြောင်းစစ်ကောင်စီ၏ အကြမ်းဖက်မှုတိုက်ဖျက်ရေးဗဟိုအဖွဲ့ကကြေညာထားသည်။

ယင်းကဲ့သို့ဆောင်ရွက်နေမှုများကြောင့်အကြမ်းဖက်မှုတိုက်ဖျက်ရေးဗဟိုအဖွဲ့၏၂၀၂၁ခုနှစ်မတ်လ(၁၁)ရက်ရက်စွဲပါအမိန့်ကြော်ငြာစာအမှတ်၊(၁/၂၀၂၁)ဖြင့်ယင်းအဖွဲ့အားအကြမ်းဖက်အုပ်စုအဖြစ်ကြေညာထားခြင်းမှပြန်လည်ရုပ်သိမ်းပေးခြင်းကိုပယ်ဖျက်၍အကြမ်းဖက်အုပ်စုအဖြစ်ကြေညာ လိုက်ကြောင်းထုတ်ပြန်ထားသည်။