ဧရာဝတီတိုင်း ကျုံပျော်မြို့နယ်တွင်းသို့ AA ဝင်ရောက်လာသည်ဟု အကြောင်းပြချက်ဖြင့် ရခိုင်များအပေါ် အစစ်အဆေးကြမ်း

လူထက်နိုင်(ဒွါရာမြီ)၊ နိရဥ္စရာ၊ စက်တင်ဘာ ၃  / ၂၀၂၄

ဧရာဝတီတိုင်း ကျုံပျော်မြို့နယ်တွင်းသို့ အာရက္ခတပ်တော် ( AA)  ဝင်ရောက်လာသည်ဟု  အကြောင်း ပြချက်ဖြင့် ရခိုင်စစ်ဘေးရှောင်များအပါအဝင် ရခိုင်လူမျိုးများ အပေါ် ဖမ်းဆီးစစ်ဆေးမှု အပြင်းအထန် ပြုလုပ်နေသည်ဟု သတင်းရရှိသည်။ 

ဧရာဝတီတိုင်း ကျုံပျော်မြို့နယ်တွင် လက်ရှိရခိုင်ပြည်နယ် သံတွဲမြို့မှ အစိုးရဝန်ထမ်းရုံးတချို့အား ပြောင်းရွှေ့ထားပြီး ရခိုင်တောင်ပိုင်းမှ စစ်ရှောင်တချို့လည်း နေထိုင်ကြရသောကြောင့် စစ်ကောင်စီ တပ်မှ  စိတ်ကြိုက်ဖမ်းဆီးစစ်ဆေးကာ ငွေများတောင်းခံနေကြောင်း ရခိုင်စစ်ရှောင်များ ကဆိုသည်။

ရခိုင်ပြည်နယ်သံတွဲမြို့စစ်ရှောင်ဝန်ထမ်းတစ်ဦးက” ပုသိမ်တို့ချောင်းသာတို့ဘက်မှာ ဧည့်စာရင်းတွေ အစစ်အဆေးများတာနေ အခုကျုံပျော်မှာပါ စစ်ရှောင်ရခိုင်ကဆိုရင် စစ်ဆေးတော့တာပဲ ဝန်ထမ်းတွေ ဆိုလည်း မရ။ အထက်အရာရှိ ထောက်ခံစာကအစ ပြရတယ်။ နောက်အေးဆေး နေချင်တဲ့စစ်ရှောင် တွေကိုလဲ စစ်တာသွားတဲ့နေရာ အဲ့ဒီထောက်ခံစာ တစ်ထုတ်ကြီး ယူသွားနေရတယ်။ ရခိုင်က စစ်ရှောင် ဆိုရင်သူတို့အတွက် အခုအချိန်ဂွင်ပဲလေ။ အေအေဆိုပြီး ပစ်သတ်လိုက်လို့ရတယ်လို့ကို ပေါ်တင် ပြောတာ။ ပြောတဲ့စကား ရခိုင်မြောက်ပိုင်း အသံထွက်လို့ကတော့ ငွေမဟုတ်ရင် လူအဖမ်းခံဘဲ။  ရှည်ရှည်ဝေးဝေးပြောမနေဘူး။ စစ်တပ်က အဲ့လိုလုပ်တာ” ဟုပြောသည်။

ဧရာဝတီတိုင်း၊ ပုသိမ်ခရိုင်၊ ကျုံပျော်မြို့နယ်၊ ကုန်းမယ်ဇလီကျေးရွာအုပ်စုရှိ ဖိုးဆိတ်ကျေးရွာ၊ ပန်းမြိုင်ကုန်းရွာ၊ ဇီးကုန်းရွာ၊ ကုန်းမယ်ဇလီရွာ ကျေးရွာများသို့ စက်တင်ဘာ (၂ )ရက်နေ့ နံနက် ၉ နာရီခန့်တွင် စစ်သားအင်အား (၄၀)ကျော်ခန့်က အိမ်စီးကားများဖြင့် လျှပ်တစ်ပြက် ဝင်ရောက်လာပြီး   အေအေ ဝင်ရောက်လာကြောင်း  သတင်းရသည်ဟုဆိုကာ နေအိမ်များအား ဝင်ရောက် စစ်ဆေးခဲ့ကြောင်း ဒေသခံတို့က ပြောဆိုသည်။ ‌

ထိုသို့စစ်ဆေးရာတွင် ရခိုင်စစ်ရှောင်များကိုသာမက ဒေသခံလူငယ်များကိုပါဖမ်းဆီးစစ်ဆေးခဲ့သည်ဟု ဆိုသည်။

၎င်းပြင်  အဆိုပါ စစ်ကြောင်းတွင် စစ်မှုထမ်း တပ်သားသစ်များစွာပါဝင်နေပြီး လက်နက်ကြီး (၆၀) မမ များအပါအဝင် လက်နက်အပြည့်အစုံဖြင့် အင်အားပြကာ ဖိုးဆိတ်ကျေးရွာတွင် အချိန်ကြာပြီး ကင်းပုန်းဝပ်ခဲ့သည်ဟု ဆိုသည်။

၎င်းနောက် စစ်ကောင်စီတပ်သားတစ်ချို့သည် ကျုံပျော်မြို့နယ် တောကြီးအုပ်စုဘက်ရှိ ရခိုင်စစ်ရှောင်များကို စစ်ဆေးရန် ဆက်လက်ထွက်သွားကြောင်းသိရပြီး သိရှိရသည်။

ဧရာဝတီတိုင်း၊ ပုသိမ်ခရိုင်၊ ကျုံပျော်မြို့ပေါ် နေရာ တချို့နှင့် ခဲပေါင်၊ ကျုံပျော် သပြေကွင်းဆုံရာ နေရာ တွင်လည်း နေ့စဉ် ဆိုင်ကယ်၊ သုံးဘီး၊ ကားများပေါ်တွင် လိုက်ပါလာသည့် ရခိုင်လူမျိုးများနှင့် ဒေသခံ လူငယ်များကို တားဆီးစစ်ဆေး ငွေတောင်းရမ်းနေကြောင်း သိရှိရသည်။

ကျုံပျော်ဒေသခံ အမျိုးသမီးတစ်ဦးက“ ရခိုင်လေးတွေ အခုသနားဖို့ကောင်းတယ်။ အလုပ် လုပ်စားလို့မှ မရတော့တာ။ စစ်တာဆေးတာများနေတယ်လေ။ အေအေဝင်လာမှာကို ကြောက်နေတယ်။ ဒေသခံတွေလည်း ကြောက်တယ်။ စစ်တပ်လည်း ကြောက်တယ်။ သူတို့ ရခိုင်တချို့က အစကထဲက ဒီမှာ နေလာတာလေ။ အခုပြောင်းလာတဲ့သူက နည်းပေမယ့် စစ်တာကြမ်းတယ်။ ခက်တာက အုပ်ချုပ်ရေးမှူးတွေ ကိုယ်တိုင်က စစ်တပ်ကိုသတင်ပို့ပြီး ပေါင်းစားနေတာပါပဲ” ဟုပြောသည်။

ထို့အပြင်ရခိုင်ပြည်နယ် ဂွမြို့-ငါးသိုင်းချောင်းလမ်း ဗေဒါဂိတ်နှင့်ဂွကြား ဒေါင်းချောင်းမှ ဝင်ရသည့် ဆင်ဝိုင်းရွာတွင် PDFနှင့် AA တပ်များခိုအောင်းသည်ဟုဆိုကာ ဩဂုတ်လ (၆)ရက်နေ့တွင် နေအိမ်များကို ဖျက်ဆီးခဲ့ပြီး မကြာခဏ စစ်အင်အားအများအပြားဖြင့် စစ်ကြောင်း ထိုးနေကြောင်း သိရသည်။

ဆင်ဝိုင်းရွာသည် သာပေါင်းမြို့နှင့် မိုင်(၃၀)ခန့်အကွာတွင် တည်ရှိကာ ပုသိမ်မြို့နယ် ဘောမိဘက်ထိ ဂွမြို့နှင့် ဆက်စပ်နေသည့် နယ်စပ်လမ်းပိုင်းဖြစ်သဖြင့် စစ်ကောင်စီ အထူးသတိထားနေရသည့် နေရာတစ်ခုဟု သိရသည်။

ဧရာဝတီနှင့် ရခိုင်ဘက်သို့စစ်ကောင်စီ စစ်ကြောင်းများသည် အိမ်စီးကား‌များဖြင့်လက်ရှိ သွားနေကြကာ ရခိုင်မှ ဧရာဝတီတိုင်းသို့အဝင်အထွက်အား အထူးကြပ်မတ်နေကြောင်းသိရသည်။

ဓာတ်ပုံ-ကျုံပျော်သတင်း