အကြမ်းဖက်စစ်အုပ်စုကြောင့် ယခုနှစ် ၈ လကျော်ကာလအတွင်း ရခိုင်ပြည်နယ်မှ အရပ်သား (၃၁၁) ဦးသေဆုံးခဲ့

နိရဉ္စရာ၊ စက်တင်ဘာ ၁၃/ ၂၀၂၄

၂၀၂၄ ခုနှစ်၊ ဇန်နဝါရီလ ၁ ရက်နေ့မှ စက်တင်ဘာလ ၁၂ ရက်နေ့အထိ အကြမ်းဖက် စစ်အုပ်စုကြောင့် ရခိုင်ပြည်နယ်တွင် သေဆုံးခဲ့ရသူ  (၃၁၁) ဦး အထိရှိကြောင်း နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က စက်တင်ဘာ(၁၂)ရက်က သတင်းထုတ်ပြန်ရာတွင် ဖော်ပြသည်။

မြန်မာတစ်နိုင်လုံးတွင် သေဆုံးခဲ့ရသူ စုစုပေါင်း  (၁၃၆၂) ဦးရှိခဲ့ရာ ထိုအထဲ၌ ရခိုင်က  ၃၁၁ ဦး သေဆုံးခဲ့သည်ဟု  AAPP ကသတင်းထုတ်ပြန်ချက်၌ ဖော်ပြထားသည်။

ရခိုင်ပြည်နယ်မှ (၃၁၁) ဦး ပါဝင်ပြီး သေဆုံးရသည့် အကြောင်းအရင်းအနေဖြင့် (၁၀၈) ဦးမှာ စစ်အုပ်စု၏ လေကြောင်းတိုက်ခိုက်မှုကြောင့် အများဆုံးသေဆုံးခဲ့ပြီး (၉၉) ဦးမှာ လက်နက်ကြီးဖြင့် ပစ်ခတ်တိုက်ခိုက်မှုကြောင့် ဒုတိယ အများဆုံးသေဆုံးခဲ့သည်။

တစ်ခြားသေဆုံးရသည့် အကြောင်းအရင်းများထဲတွင် စစ်တွေဗျိုင်းဖြူရွာကဲ့သို့ အစုလိုက် အပြုံလိုက် သတ်ဖြတ်မှုများလည်းပါဝင်ကြောင်း နိရဉ္စရာက စုံစမ်းသိရှိရသည်။

စက်တင်ဘာလ ၈ ရက်နေ့၊ ညနေ ၆ နာရီ ၅၀ မိနစ်နှင့် ၅၅ မိနစ်တို့တွင် အကြမ်းဖက် စစ်အုပ်စုက ရခိုင်ပြည်နယ်၊ ပေါက်တောမြို့နယ်၊ ရှင်ရွာကျေးရွာရှိ အာရက္ခတပ်တော်(AA)က စစ်သုံ့ပန်းများနှင့် အကျဉ်းသားများအား ဆေးကုသပေးနေသည့် နေရာအား ဂျက်တိုက်လေယာဉ်ဖြင့် နှစ်ကြိမ် ဗုံးကြဲချတိုက်ခိုက်ခဲ့ခြင်းကြောင့်  လူ ၁၇ ဦးသေဆုံးပြီး ၁၀ ဦး ဒဏ်ရာရရှိခဲ့သည်။

သေဆုံးသူများအထဲတွင် ဦးစောသန်းမောင်၊ မလှစောခင်၊ ဦးစောညီညီ (ခ) တောင်မင်း၊ ဦးကျော်သာမောင်၊ ကိုဘုန်းမြတ်ပိုင်၊ ကိုမောင်သိန်းထွန်း (ခ) ငမဲခေါင်၊ ဦးသိန်းထွန်းအောင်၊ ဦးကျော်ဝင်းမောင်၊ အသက် ၁၄ နှစ်အရွယ် မောင်ဝေယံဖြိုး၊ အသက် ၁၇ နှစ်အရွယ် မောင်စိုးမင်းအောင်တို့နှင့်အတူ စစ်သုံ့ပန်း ၇ ဦးအပါအဝစုစုပေါင်း (၁၇) ဦး သေဆုံးခဲ့ပြီး (၁၀) ဦး ဒဏ်ရာရရှိခဲ့သည်ကြောင်း AAPP ထုတ်ပြန်ချက်တွင် ဖော်ပြထားသည်။

မြန်မာတစ်နိုင်လုံးတွင် သေဆုံးသူ  စုစုပေါင်း (၁၃၆၂) ဦး၌  အမျိုးသမီး (၄၅၁) ဦးနှင့် အမျိုးသား (၉၁၁) ဦး သေဆုံးခဲ့သည်ကို အမည်နှင့်တကွ အတည်ပြုနိုင်ခဲ့သည်ဟုဖော်ပြထားသည်။

ယင်းတို့တွင် အသက် ၁၈ နှစ်အောက် သေဆုံးသူ (၁၇၉) ဦးနှင့် အသက် ၆၀ နှစ်အထက် သေဆုံးသူ (၁၆၅) ဦး ပါဝင်သည်။  Source/AAPP

(ဓာတ်ပုံ- ၂၀၂၄ ခုနှစ်မတ်လအတွင်းက ရခိုင်က သေဆုံး၊ ဒဏ်ရာရရှိခဲ့သူများ)