အမ်းတွင် စစ်စခန်းတစ်ခု ဒရုန်းဖြင့်တိုက်ခိုက်ခံရပြီး အရာရှိများအပါအဝင် စစ်ကောင်စီတပ်သားများ သေဆုံး၊ ဒဏ်ရာရရှိမှုရှိခဲ့ဟုဆို

သဥ္ဇာနွယ်၊ နိရဥ္စရာ၊ စက်တင်ဘာ ၁၃/ ၂၀၂၄

ရခိုင်ပြည်၊ အမ်းမြို့နယ်၊ မဲ‌တောင်ဗျူဟာကုန်း စက်တင်ဘာ ၁၀ ရက်နေ့က ဒရုန်းဖြင့် တိုက်ခိုက်ခံရ၍ စစ်ကောင်စီ တပ်က အရာရှိများ အပါအဝင် သေဆုံးဒဏ်ရာရရှိသူ အများအပြား ရှိခဲ့တယ်လို့  သတင်းရရှိသည်။

စစ်ရေးသတင်းအရင်းအမြစ်တစ်ဦးက“ သူတို့က ညဖက်အချိန်အိပ်နေတဲ့အချိန်မှာ  ဒရုန်းနဲ့ တိုက်ခိုက် ခံရတာ ဖြစ်တယ်။  ၄ ကြိမ်လောက် တိုက်ခိုက်ခံရတယ်လို့ သိရတယ်။  စစ်ကောင်စီက ၈ ယောက် လောက် ကျသွားတယ်။ ဗိုလ်မှူးနဲ့ ဗိုလ်ကြီးအဆင့်တွေ ရော တပ်သားအဆင့် ရဲဖော်တွေ ၂၀ ထက် မနည်း ဒဏ်ရာရသွားတယ်” ဟု နိရဥ္စရာ သတင်းဌာနကို ပြောသည်။

၎င်းမဲတောင် ဗျူဟာကုန်းသည် အမ်းမြို့နှင့် ၁၀ မိုင်ခန့် အကွာတွင် တည်ရှိပြီး စက်တင်ဘာ ၁၀ ရက်နေ့ ည ၁၀နာရီခွဲခန့်က ဒရုန်းဖြင့် ၄ ကြိမ်ထက်မနည်း တိုက်ခိုက်ခံခဲ့ရသည်ဟု ဆိုသည်။

၎င်းည ၁၁ နာရီလောက်တွင်  အမ်းဆေးတပ်မှ စစ်ကောင်စီ အင်အား ၅၀ ခန့်သည် မဲတောင်ဗျူဟာ ကုန်းကို ရောက်ရှိလာပြီး ဒဏ်ရာရသူများကို ကားဖြင့် လာရောက်ခေါ်ဆောင်သွားခဲ့သည်ဟု ပြောသည်။

ဒဏ်ရာရသူများအား အမ်းမြို့ အနောက်ပိုင်းတိုင်း စစ်ဌာနချုပ် ဆေးတပ်တွင် ဆေးကုသမှု ပေးလျက်ရှိသည်ဟု ဒေသခံ တစ်ဦး နိရဥ္စရာ သတင်းဌာနကို ပြောသည်။

“ ကျွန်တော်တို့ သိရသလောက် အဲ့ဒီနေ့ ညကပဲ  ဒဏ်ရာရတဲ့စစ်သားတွေကို ဆေးတပ်က အရာရှိတွေနဲ့ ရဲဖော်တွေက ကားတွေနဲ့ဆိုင်ကယ်နဲ့လာခေါ်သွားတယ်။ အခုလက်ရှိတော့ ဆေးကုသမှုပေးနေရတယ်” ဟု ပြောသည်။

လက်ရှိတွင် အမ်းမြို့တွင် အာရက္ခတပ်တော်နှင့် စစ်ကောင်စီတို့အကြား စစ်ရေး အတင်းမာဆုံး အနေအထားကိုရောက်ရှိနေကြောင်း ဒေသခံများက ပြောသည်။

စစ်ကောင်စီတပ်ဖွဲ့ဝင်များသည် စစ်တပ်နှင့်သက်ဆိုင်သည့် နေရာများသာမက မသက်ဆိုင်သည့် နေရာများကိုပါ မြေမြှုပ်မိုင်းများ လိုက်လံထောင်နေသဖြင့် ဒေသခံများမှ အပြင်သို့ မသွားမလာရဲ ကြသဖြင့် စားဝတ်နေရေးအခက်အခဲနှင့် ကြုံနေရကြောင်း သိရသည်။

ယင်းအပြင် အမ်းနပခဌာနချုပ်နှင့် လက်နက်ကြီး အထိုင်စခန်းများ၊ ဂျင်တောင်ထိပ်တွင် ရှိသည့် လက်နက်ကြီးစခန်း၊ အမ်းမြို့အခြေစိုက် စစ်ကောင်စီ တပ်ရင်းများမှ မဲ‌တောင် အနီးတစ်ဝိုက်သို့ လက်နက်ကြီးကျည်များဖြင့် နေ့စဥ်ပစ်ခတ်လျက်ရှိကြောင်း ဒေသခံများက ပြောသည်။

ပြီးခဲ့သည် စက်တင်ဘာ ၈ ရက်နေ့က အမ်းမြို့နယ်၊ မအီနှင့် အမ်း ကားလမ်းမထက်၌ တည်ရှိသည့် ပဒဲကြောရွာစာသင်ကျောင်းကို စစ်ကောင်စီမှ လေကြောင်းဖြင့် ဗုံးကြဲခဲ့သေးသည်။

ယခုသတင်းနှင့် ပတ်သက်ပြီး အာရက္ခတပ်တော် ပြောခွင့်ရသူ ဦးခိုင်သုခအား ဆက်သွယ်မေးမြန်းနေဆဲ ဖြစ်ပါသည်။