ပလက်ဝနှင့် စစ်တွေအထိ လျှပ်စစ်မီးပေးနိုင်ရန် အိန္ဒိယ ဆန္ဒရှိနေဟုဆို

နိရဉ္စရာ၊ စက်တင်ဘာ ၁၄/ ၂၀၂၄

ချင်းပြည်နယ် ပလက်ဝနှင့် ရခိုင်ပြည်နယ် မြို့တော် စစ်တွေအထိ လျှပ်စစ်မီးပေးနိုင်ရန် အိန္ဒိယအနေဖြင့် ဆန္ဒရှိနေသည်ဟု မီဇိုရမ်အခြေစိုက် ခိုနူမ်းသုန်သတင်းက သတင်း ဖော်ပြသည်။

မီဇိုရမ်အစိုးရအဖွဲ့ သတင်းနှင့် ပြန်ကြားရေးဌာနက ထုတ်ပြန်ချက်ကို ကိုးကားပြီး သတင်းဖော်ပြရာတွင် အိန္ဒိယနိုင်ငံခြားရေးဝန်ကြီးဌာန တွဲဖက်အတွင်းရေးမှူး B.Shyam သည် မီဇိုရမ်ပြည်နယ်သို့ အလည်ရောက်ရှိနေစဉ်  ယခု ၁၂ ရက်နေ့က  မီဇိုရမ် ပြည်နယ်အစိုးရ လျှပ်စစ်ဝန်ကြီး Pu F. Rodingliana ကို သူ၏ ရုံးခန်းတွင်တွေ့ဆုံခဲ့ပြီး ထိုကဲ့သို့ပြောဆိုခဲ့ခြင်းဖြစ်သည်ဟု ဖော်ပြသည်။

အိန္ဒိယအစိုးရ  အိန္ဒိယနိုင်ငံခြားရေးဝန်ကြီးဌာန တွဲဖက်အတွင်းရေးမှူး B.Shyam သည် မီဇိုရမ် ပြည်နယ်သို့ ရောက်ရှိနေစဉ်  ပလက်ဝ နှင့် ရခိုင်ပြည်နယ် မြို့တော် စစ်တွေအထိ လျှပ်စစ်မီးပေးရန် ဆန္ဒရှိပြီး  ပူးပေါင်းဆောင်ရွက်ပေးရန် မီဇိုရမ်ပြည်နယ်အစိုးရ ကပြောကြားခဲ့ခြင်း ဖြစ်သည်ဟု ဆိုသည်။'

အိန္ဒိယအစိုးရအနေဖြင့် မြန်မာဘက်ခြမ်း ချင်းပြည်နယ် ပလက်ဝမြို့အထိ လျှပ်စစ်မီးဖြန့်ဝေပြီး ထိုမှတဆင့် ရခိုင်ပြည် နယ် စစ်တွေဆိပ်ကမ်းအထိ လျှပ်စစ်မီးပေးရန်ဆန္ဒရှိပြီး ယင်းအတွက် မီဇိုရမ်အစိုးရအနေဖြင့် ပူးပေါင်းဆောင်ရွက်ပေးရန် ဖိတ်ခေါ်ခဲ့သည်ဟု သတင်းတွင် ဖော်ပြသည်။ 

အိန္ဒိယနိုင်ငံခြားရေးဝန်ကြီးဌာန တွဲဖက်အတွင်းရေးမှူးနှင့် မီဇိုရမ်အစိုးရ လျှပ်စစ်ဝန်ကြီးတို့သည် မြန်မာနှင့် ဘင်္ဂလားဒေရှ့်နိုင်ငံတို့နှင့် ကုန်သွယ်ရေးစနစ်တကျဆောင်ရွက်နိုင်ရေးလည်း ဆွေးနွေး ခဲ့ကြသည်ဟု သိရသည်။

ထို့အပြင် ယခုလက်ရှိဖော်ဆောင်နေသော ကုလားတန်ဘက်စုံသယ်ယူပို့ဆောင်ရေး စီမံကိန်း အခြေအနေ နှင့် အခက်အခဲ စိန်ခေါ်မှုများဖြေရှင်းနိုင်ရေးနည်းလမ်းများကိုလည်း ဆွေးနွေးခဲ့ကြသည်ဟု သိရသည်။

ယခုကဲ့သို့ လျှပ်စစ်မီး ပေးနိုင်ရန် ပြောဆိုခြင်းသည် အာရက္ခတပ်တော် (AA)၏ နယ်မြေစိုးမိုးမှုနှင့် လက်ရှိ ပကတိ ဖြစ်တည်နေမှုအပေါ် အိန္ဒိယက လက်ခံနားလည်သည့် သဘောဖြစ်ပြီး အနာဂတ်တွင်  AA နှင့် ပိုမိုထိတွေ့ ဆက်ဆံမည့် အနေအထား သဘောဖြစ်ကြောင်း သုံးသပ်ရသည်။