ကံ့ကော်နီနီ၊နိရဉ္စရာ၊ စက်တင်ဘာ ၁၉ / ၂၀၂၄

စစ်ကောင်စီက၄င်းလက်လွှတ်ထားရသည့် ရခိုင်ပြည်၊တောင်ကုတ်မြို့နယ်ရှိ ရခိုင်ရိုးမပေါ်မှ နေပူတောင်ကျောက်ထုတ်လုပ်ရေးစီမံကိန်းကို ဗုံးကြဲတိုက်ခိုက်၍ အလုပ်သမား တန်းလျားတွင် နေထိုင်သည့်အမျိုးသမီးတစ်ဦး သေဆုံးသွားကြောင်းသတင်းရရှိသည်။

သေဆုံးသွားသူမှာ နေပူတောင်စီမံကိန်းအနီးပိန္နဲစမ်းကျေးရွာမှ ဒေါ်တင်တင်လှ (၄၅) နှစ်ဖြစ်ပြီး စီမံကိန်းအလုပ်သမားတန်းလျားတွင်နေထိုင်သူဖြစ်ကြောင်းသိ၇သည်။

ယနေ့စက်တင်ဘာလ ၁၉ ရက်၊ မနက်အစောကြီး ၂ နာရီဝန်းကျင်တွင် စစ်ကောင်စီ ဂျက်ဖိုက်တာဖြင့်နေပူတောင်စီမံကိန်းသို့ဗုံးကြဲတိုက်ခိုက်ခဲ့ခြင်းဖြစ်ကြောင်း ဒေသခံတစ်ဦးကပြောသည်။

"ဒီနေ့မနက်အစောကြီးမှာ ဂျက်တိုက်လေယာဥ်နဲ့ ဗုံးကြဲချခဲ့တာ။အမျိုးသမီးတစ်ယောက် သေတယ်။သူက အလုပ်သမားတန်းလျားမှာနေတဲ့မိသားစုကပါ" ဟု ပြောသည်။

သေဆုံးသူအမျိုးသမီးမှာဗုံးစထိမှန်၍ မျက်နှာနှင့် ဝမ်းဗိုက်မှာ ဒဏ်ရာအပြင်းအထန် ရရှိကာ သေဆုံးသွားခြင်းဖြစ်ကြောင်းသိရှိ၇သည်။

ပြီးခဲ့သည့်ဇွန်လ ၂၀ ရက်က နေပူတောင်စီမံကိန်းအနီး အာရက္ခတပ်တော် (AA) နှင့် စစ်ကောင်စီ တပ်တို့တိုက်ပွဲပြင်းထန်ဖြစ်ပွားခဲ့ပြီးစစ်ကောင်စီဗိုလ်ကြီးကျော်မင်းသူအပါအဝင် တပ်ဖွဲ့ဝင် ၆၀ ကျော်ခန့်သေဆုံးခဲ့သည်။

အဆိုပါတိုက်ပွဲဖြစ်ပွားပြီးနောက်AA သည် နေပူတောင်အပါအဝင်တောင်ကုတ်မြို့နယ်အတွင်း ရခိုင်ရိုးမ ပန်းတောင်း-တောင်ကုတ်လမ်းပိုင်းနေရာအတော်အများကိုထိန်းချုပ်ထားပြီး ပဲခူးတိုင်းမှ စစ်ကောင်စီ၏စစ်ကူလမ်းကြောင်းကိုဖြတ်တောက်ထားခဲ့သည်။

တောင်ကုတ်မြို့နယ်တွင် စစ်ဆင်ရေးကွပ်ကဲမှုဌာနချုပ်စကခ(၅)အခြေစိုက်ထားပြီး တောင်ကုတ်တပ်မစကခ(၅)နှင့် လက်အောက်ခံ ခမ၇ (၃၄၆)၊ ခမ၇ (၅၄၄) တပ်ရင်းတို့ရှိပြီး အဆိုပါ တပ်စခန်းများ ဝင်တိုက်ခိုက်ခံရမည်ကို စိုးရိမ်ပြီး စစ်ကောင်စီက အေအေရှိနိုင်သည်ဟုယူဆသည့် နေရာများကို နေ့စဉ် ရက်ဆက် ဗုံးကြဲတိုက်ခိုက်နေကြောင်း သိ၇သည်။  

၎င်းတိုက်ခိုက်မှုများကို စစ်ကောင်စီကဩဂုတ်လဆန်းပိုင်းစ၍ ပြုလုပ်လာခဲ့ခြင်းဖြစ်သည်။

ဩဂုတ်လ၃၁ ရက်ကလည်း တောင်ကုတ်မြို့နယ်၊ ခရိုင်ကျေးရွာကို စစ်ကောင်စီက ဗုံးကြဲတိုက်ခိုက်၍ဆယ်ကျော်သက်လူငယ်တစ်ဦးသေဆုံးပြီး ၄ ဦးထက်မနည်း ဒဏ်ရာရရှိခဲ့သည်။

ဩဂုတ်လ၂၂ ရက်ကလည်း တောင်ကုတ်မြို့နှင့်အနီးတဝိုက်ကျေးရွာများကို စစ်ကောင်စီကဗုံးကြဲတိုက်ခိုက်၍မိကျောင်းထိုးကျေးရွာမှ မွေးကင်းစကလေးမိခင် ဒေါ်ခင်ယုနန္ဒာထွန်းပွဲချင်းပြီးသေဆုံးခဲ့သည်။

ဓာတ်ပုံ- ယခင်က နေပူတောင်စီမံကိန်းမြင်ကွင်းအားတွေ့၇စဥ်။ (Photo-CJ)