တရုတ်နှင့်ဆက်ဆံရေးကို ဗိုလ်ချုပ်ထွန်းမြတ်နိုင်အနေဖြင့် အကောင်းနိုင်ဆုံးလုပ်ကိုင်နိုင်လိမ့်မည်ဟု ယုံကြည်ကြောင်း တရုတ်အရေးကျွမ်းကျင်သူပြော

လူထက်နိုင်(ဒွါရာမြီ)၊ နိရဥ္စရာ၊ စက်တင်ဘာ ၂၀  / ၂၀၂၄

တရုတ်နှင့် ဆက်ဆံရေးကို အာရက္ခတပ်တော် (AA) စစ်ဦးစီးချုပ် ဗိုလ်ချုပ်ထွန်းမြတ်နိုင်အနေဖြင့် အကောင်းနိုင်ဆုံးလုပ်ကိုင်နိုင်လိမ့်မည်ဟု ယုံကြည်ကြောင်း တရုတ်အရေး ကျွမ်းကျင်သူ ဒေါက်တာ လှကျော်ဇောက ပြောဆိုလိုက်သည်။

မြန်မာပြည်မြောက်ပိုင်းမှ တိုင်းရင်းသားလက်နက်ကိုင်အဖွဲ့များအပေါ် တရုတ်အစိုးရ၏ ဖိအားများလာပြီး နောက်ပိုင်း ရက္ခိုင်အမျိုးသားအဖွဲ့ချုပ် /အာရက္ခတပ်တော်(ULA/AA)နှင့် တရုတ် ဆက်ဆံရေး အခြေအနေအပေါ်  ဒေါက်တာလှကျော်ဇောအား နိရဉ္စရာက မေးမြန်းစဉ် ထိုသို့ သုံးသပ် ပြောဆို သွားခြင်း ဖြစ်သည်။

“တရုတ်က အေအေနဲ့လည်း ဆက် ဆံနေတယ်။ အကုန်လုံး နဲ့ဆက်ဆံနေတာဘဲ။ တောက်လျှောက်လည်း ပြောနေတာဘဲ။ ဒီလိုရှိတယ်ဗျ။ တရုတ်ပြောတိုင်းလည်း အေအေက လိုက် မလုပ်နိုင်ဘူးလေ။ လိုက်မလုပ်နိုင်ပေမယ့် ဆက်ဆံရေးလည်း မပျက်အောင်ပေါ့ဗျာ။ ပျော့ပျော့ ပျောင်းပျောင်းနဲ့ ဆက်ဆံနေကြတာတွေ့ပါတယ်။  ဗိုလ်ချုပ်ထွန်းမြတ်နိုင်က တော်တော်ကိုပျော့ပျော့ ပျောင်းပျောင်းနဲ့ လုပ်တတ်ကိုင်တတ်နေပါပြီး။ သူ့ရဲ့ အင်တာဗျူးမှာကြည့်တာ” လို့ ဒေါက်တာ လှကျော်ဇောပြောသည်။ 

တရုတ်နှင့် ဆက်ဆံရေးခက်သော်လည်း တော်လှန်ရေး အဖွဲ့များ အနေဖြင့်နည်းလမ်းပေါင်းစုံနှင့် ရအောင်ဆက်ဆံရမည်ဖြစ်ပြီး လုပ်ရင်းကိုင်ရင်းနှင့် အရည်အသွေး ပြည့်၀လာမည်ဖြစ်ကြောင်း ပြောကြားသည်။

“ သူတို့  တရုတ်နဲ့ဆက်ဆံရတာ ခက်ပေမယ့် သူတို့ ( AA) အနေနဲ့ ရအောင် နည်းလမ်း ပေါင်းစုံနဲ့ ဆက်ဆံနေပါတယ်ဗျ။ နိုင်ငံရေးသမားတွေ တော်လှန်ရေးသမားတွေဆိုတာ တဖြည်းဖြည်း လုပ်ရင်ကိုင်ရင်း နဲ့ ပြည်ဝလာရမယ်။ အားလုံးနဲ့ဆက်ဆံရေးကောင်းအောင်လုပ်ရမှာပါဘဲ” ဟု ပြောသည်။

​၎င်းပြင် ရခိုင်၏ အိမ်နီးချင်း နိုင်ငံများနှင့်လည်း မည်သို့အခြေအနေဖြစ်စေ ဆက်ဆံရမည်ဖြစ်သဖြင့် တရုတ်နှင့်ဆက်ဆံရေးကတဆင့် လုပ်တတ်ကိုင်တတ်သွားမည်ဟု သုံးသပ်ပြောဆိုသည်။

“ ခင်ဗျားတို့ ရခိုင်က ဘင်္ဂလားဒေ့ရှ်၊ အိန္ဒိယနဲ့လည်း ဆက်ဆံရမှာပဲ။ တရုတ်နဲ့လည်း ဆက်ဆံရမှာဘဲ။ ဒီကတဆင့် လုပ်တတ်ကိုင်တတ်သွားမှာပါ” ဟု ပြောသည်။

၎င်းပြင် ဒေါက်တာ လှကျော်ဇော်က “ အေအေက တော့တော်တော်လေးခိုင်ခိုင်မာမာတော့ ရှေ့ကို ရောက်နေပါပြီ။  ဗိုလ်ချုပ်ထွန်းမြတ်နိုင်နဲ့ ဧရာဝတီက အင်တာဗျူးမှာတော့ စစ်ကောင်စီ ရေတပ်က ရှေ့ရောက်နေသလိုတော့ ဖြစ်တာပေါ့ နော်။ အဲ့ဒါကြောင့်သူတို့ ရှေ့တိုးရတော့ အခက်အခဲရှိနိုင်တာပေါ့။ ဒါပေမယ့်ကြည့်ရတာမဆိုးပါဘူး။ အေအေက မှန်မှန်မှန်မှန် လေးတော့ ရှေ့တိုးခိုင်မာအောင်လုပ်လာ တာတွေ့ရပါတယ်” ဟုလည်း ဒေါက်တာလှကျော်ဇောက အေအေကို ချီးကျူးပြောဆိုသွားသည်။

အာရက္ခတပ်တော် (AA)၏ အဓိက တိုက်ပွဲဖော်ဆောင်နေသော တော်လှန်ရေး နယ်မြေမှာ တရုတ် နယ်စပ်အနီးတွင် မဟုတ်ဘဲ နယ်မြေဒေသခြားနားနေသဖြင့် တရုတ်၏ ဖိအားကို အတိုင်းထက် အလွန် စိုးရိမ်စရာ မရှိသော်လည်း တရုတ်စီမံကိန်းအများအပြားမှာ ရခိုင်ပြည်တွင် တည်ရှိသဖြင့် တရုတ်နှင့် အာရက္ခတပ်တော် ( AA) ဆက်ဆံရေးမှာ တစ်နည်းမဟုတ်တစ်နည်း ဆက်စပ်ပတ်သက်နေမည် ဖြစ်သည်။

အာရက္ခတပ်တော်သည် ရခိုင်ပြည်အတွင်းရှိ တရုတ်စီမံကိန်းများနှင့် တရုတ်ဝန်ထမ်းများအား မထိခိုက်အောင် ထိန်းသိမ်းကာကွယ်သွားမည်ဟု အာမခံချက်ပေးထားသော်လည်း တရုတ် စီမံကိန်းကြီးများတည်းရှိရာ ကျောက်ဖြူမြို့နှင့် ဓည၀တီရေတပ်တို့အား ဆက်လက်တိုက်ခိုက် သွားမည်ဟု တရားဝင် ထုတ်ပြန် ထားသည်။

တရုတ်အစိုးရအနေဖြင့် မြန်မာပြည်တွင်းရေးကို ဝင်ရောက် မစွက်ဖက်ဟု ပြောဆိုထားသော်လည်း  တစ်ခြားတစ်ဖက်တွင် မြန်မာစစ်အစိုးရ မပြုတ်ကျရေးအတွက် နောက်ကွယ်ကနေ ကျားကန် ပေးနေပြီး လက်ကိုင်တော်လှန်ရေး တပ်ဖွဲ့များကိုလည်း နည်းမျိုးစုံဖြင့် ဖိအားပေးနေသဖြင့် တရုတ်ဆန့်ကျင်ရေး ဆန္ဒပြမှုမျာလည်း နိုင်ငံအများအပြားတွင် ဖြစ်ပေါ်နေကြောင်း သိရှိရသည်။ ( ဆန္ဒပြဓာတ်ပုံ- မစ္ဈိမ)