ဂွမြို့နယ် ကုလားပြင်ဂိတ်အကျော်တွင် စစ်ကောင်စီတပ်ဖွဲ့ဝင် အချင်းချင်းပစ်ခတ်မှုဖြစ်ပွားပြီး ၄ဦး သေဆုံးသွားဟုဆို

မင်းသျှင်စော၊ နိရဉ္စရာ ၊စက်တင်ဘာ ၂၀/၂၀၂၄

ရခိုင်ပြည်၊ ဂွမြို့နယ် ၊ကုလားပြင် (ရတနာမြိုင်)ဂိတ် တံတားအကျော်တွင် စစ်တိုက်ရန် မသွားလို၍ ထွက်ပြေးကြသည့် စစ်သားများနှင့် ၎င်းတို့အား လိုက်လံတိုက်ခိုက်သည့် စစ်သားများအကြား ပစ်ခတ်မှု ဖြစ်ပွားပြီး ၄ ဦးသေဆုံးသွားကြောင်း ခိုင်လုံသည့် စစ်ရေး သတင်းမြစ်အရ သိရသည်။

" သူတို့က စက်တင်ဘာ ၄ ရက်ကစလို့ တိုက်ပွဲ ပြင်းခဲ့တဲ့ ဂန့်ဂေါ်တောင်ဆည်ဖက်ကနေ တချို့ ဒဏ်ရာ ရလို့ နောက်ဆုတ်လာတဲ့ စစ်တပ်ကို  နောက်ထပ် ဂန့်ဂေါ်တောင်ဖက်ကို ပြန်ပို့တယ်လို့ ကြားတယ်။ အဲဒီမှာ သူတို့ မသွားရဲလို့ ထွက်ပြေးကြတာ။ ထွက်ပြေးသူ အရေအတွက်က ၁၀ ယောက်ထက် မနည်းဘူးလို့ သိရတယ်။ စက်တင်ဘာ ၁၆ ရက်နေ့က ထွက်ပြေးတဲ့သူတွေနဲ့ ကုလားပြင်စခန်းက တပ်ဖွဲ့ဝင်တွေ ကုလားပြင်တံတားအကျော်မှာ ပစ်ခတ်ကြတယ်။ ထွက်ပြေးတဲ့ စစ်သားတွေအထဲက ၃ယောက် သေတယ်။ ပေါင်ကိုထိပြီး  တစ်ယောက်ဒဏ်ရာရတယ်။ သူ့ကိုလည်း ညနေပိုင် စခန်းမှာ ပစ်သတ် လိုက်တယ်လို့  သိရပါတယ်"ဟု ၄င်းသတင်းရင်းမြစ်က ပြောသည်။

သေဆုံးသွားသည့် စစ်ကောင်စီ အလောင်းများကို စက်တင်ဘာ ၁၇ ရက်နေ့ ကုလားပြင်ကျေးရွာ သုဿန်၌ မြေမြှုပ်ခဲ့သည်ဟုဆိုသည်။

အာရက္ခတပ်တော်နှင့် စစ်ကောင်စီတပ်တို့အကြား ကျိန္တလီမြို့ အနီးရှိ  ကုလားပြင်ကျေးရွာ အနီး ဝန်းကျင်တွင် တိုက်ပွဲ ဖြစ်ပွားနေပြီး ဂန့်ဂေါ်တောင်ဆည်တွင် တပ်စွဲထားသည့် စစ်သားများမှာလည်း တိုက်ပွဲ ဖြစ်ပွားပြီးနောက် အကျအဆုံးအများအပြားဖြင့်  ကုလားပြင်သို့ တပ်ဆုတ်လာခဲ့ရသည်ဟု ၎င်း သတင်းရင်းမြစ်က ပြောဆိုသည်။

“ ကုလားပြင်ကနေ  ထွက်ပြေးသွားတဲ့ လက်နက်နဲ့ စစ်သားတွေကိုတော့ အေအေဘက်ကလည်း ရှာနေတယ်လို့တော့ ကြားတယ်။ ထွက်ပြေးကြတာ တစ်ဆယ်ကျော်ဆိုတော့ နောက်ထပ် တပ်စိတ် တစ်စိတ်လောက်တော့ ကျန်အုံးမယ်ထင်ပါတယ်” ၎င်းက ဆက်လက်ပြောကြားသည်။

စက်တင်ဘာ ၄ ရက်နေ့ကစပြီး ဂန့်ဂေါ်တော်ဆည်တွင် အာရက္ခတပ်တော်နှင့် စစ်ကောင်စီတပ်တို့ အကြား တိုက်ပွဲပြင်းထန်စွာဖြစ်ပွားခဲ့ပြီး စစ်ကောင်စီဖက်မှ အကျအဆုံးများသဖြင့် လေကြောင်းနှင့် ရေကြောင်းကပါ စစ်ကူတိုက်ခိုက်ပေးခဲ့သည်ဟု သိရသည်။

ထိုသို့ ပစ်ကူပေးခဲ့သော်လည်း မြေပြင်တွင် စစ်ကောင်စီတပ်သားများအကြား စိတ်ဓာတ်ကျဆင်းနေပြီး အချင်းချင်းကြားတွင်လည်း မကျေလည်မှုများ ရှိနေသဖြင့် AA ၏ ထိုးစစ်ကို မခုခံမကာကွယ်နိုင်ဘဲ ဖြစ်နေ​ကြောင်း ဒေသအတွင်းက စစ်တပ်အကြောင်းကို သိသူများက ပြောဆိုသည်။

ယခုသတင်းနှင့် ပတ်သက်ပြီး စစ်ကောင်စီဘက်ကို မေးမြန်းရန် အခက်အခဲရှိနေသဖြင့် သီးခြားအတည်ပြုချက် ရယူနိုင်ခြင်းတော့ မရှိသေးပါ။ (ဓာတ်ပုံ- ပုံဟောင်းသာ)