ရခိုင်တွင် ငှက်ဖျားရောဂါနှင့် သွေးလွန်တုပ်ကွေးရောဂါ အဖြစ်များနေ

ဆလိုင်းမိုးအောင်၊နိရဉ္စရာ၊ စက်တင်ဘာ ၂၁ /၂၀၂၄

ယခုနှစ် မိုးရာသီအတွင်း ရခိုင်တွင် ငှက်ဖျားရောဂါနှင့်သွေးလွန်တုပ်ကွေးရောဂါဖြစ်ပွားမှု များပြားနေသည်ဟု ဒေသခံများက ပြောသည်။

ပုဏ္ဏားကျွန်း၊ကျောက်တော်၊ မြောက်ဦး၊မင်းပြားစသည့်မြို့နယ်များရှိ ကျေးရွာ အများအပြားတွင်မိုးရာသီ ခြင်ကိုက်ခြင်းကြောင့်ငှက်ဖျားရောဂါနှင့် သွေးလွန်တုပ်ကွေး ရောဂါဖြစ်ပွားမှုများပြားလာနေခြင်းဖြစ်သည်ဟု သိရသည်။

ပုဏ္ဏားကျွန်းမြို့နယ်တွင်ပြီးခဲ့သည့် မေလမှစတင်ကာ တောဖျားချောင်းဒေသရှိ ဆင်သီ၊ သြရမ၊ တွင်းဆင်သီ၊ တိပ္ပ၊လွမ်ပိုး၊ ဆင်သီဖျား၊ ပိုးရွီပြင်၊ကွမ်းတောင်နှင့်သက်တိုင်တောစသည့် ရွာများ အပါအဝင်ကျေးရွာပေါင်း ၁၃ ရွာတွင် မိုးရာသီကာလခြုံနွယ်ထူထပ်ခြင်းကြောင့် ခြင်ပေါက်ဖွားမှုများပြား၍ ငှက်ဖျားရောဂါနှင့်သွေးလွန်တုပ်ကွေးရာဂါ ဖြစ်ပွားနေသည်ဟုသိရသည်။

"ငှက်ဖျားနဲ့တုပ်ကွေးတွေဖြစ်နေကြတယ်။ ခြင်အရမ်းကိုက်တယ်လေ။ ခြင်ထောင်ထောင်အိပ်ပေမဲ့လည်း အစုပ်အပြဲဆိုတော့မလုံတာမျိုးလည်းရှိမှာပေါ့။ပြီးတော့ ဒီနှစ်ဆို နေ့ဘက်တွေလည်း ခြင်အရမ်းကိုက်တယ်။အဲ့ကြောင့် တုပ်ကွေးအဖြစ်များကြတယ်"ဟု ပုဏ္ဏားကျွန်းမြို့နယ်၊ပိုးရွှီပြင်ကျေးရွာမှ ဒေသခံတစ်ဦးက ပြောသည်။

ထို့အတူကျောက်တော်မြို့နယ်ရှိ မျောက်တောင်၊သာစည်၊ မာလာ၊ တင်းမကြီး၊ တင်းမသစ်၊ ပြိုင်းတိုင်း စသည့် ကျေးရွာများတွင်လည်း မိုးရာသီခြင်ကိုက်ခြင်းကြောင့် ငှက်ဖျားနှင့်သွေးလွန် တုပ်ကွေးဖြစ်ပွားမှုနှုန်းမြင့်တက်နေသည်ဟုသိရသည်။

ပြိုင်းတိုင်းရွာတွင်ဆိုလျှင် သြဂုတ်လနောက်ဆုံးအပတ်က ငှက်ဖျားကြောင့်ကလေးငယ် ၁ ဦး အပါအဝင်သေဆုံးသူ ၄ ဦးအထိရှိခဲ့ကြောင်းလည်းဒေသခံများက ပြောသည်။

ယင်းအပြင်မြောက်ဦးနှင့် မင်းပြားမြို့နယ်မှကျေးရွာအချို့တွင်လည်း ပြီးခဲ့သည့် သြဂုတ်လ အစပိုင်းတုန်းကမိုးသည်းထန်စွာရွာသွန်းကာ ရေကြီးရေလျှံမှုဖြစ်ပွားခဲ့ပြီး ရွှံ့နွံတို့နှင့် နောက်ကျိနေသည့်မသန်းရှင်းသောရေများ တင်ကျန်ခဲ့သည့်အတွက် ခြင်ပေါက်ဖွားနှုန်း ပိုများပြားလာကာငှက်ဖျားရောဂါနှင့် သွေးလွန်တုပ်ကွေးရောဂါတို့ဖြစ်ပွားနေကြသည်ဟု သိရသည်။

မြောက်ဦးမြို့နယ်၊ပညာသည်ကျေးရွာမှ ရွာသား တစ်ဦးက"ရေကြီးပြီးတဲ့နောက်ပိုင်းခြင်တွေပိုများလာတယ်။ ခြင်ကိုက်တော့ အရင်ဆုံး ဖျားတယ်။ ဆေးရုံဆေးခန်းတွေလည်း မဖွင့်တော့ ရွာတွေက ဆေးဆိုင်တွေမှာသွားပြတယ်။ ငှက်ဖျားဖြစ်တာလို့ သိရတယ်။ ဆိုင်တွေမှာလည်း ဆေးတွေမရှိတော့ဂရုတစိုက်နေနေရတယ်" ဟု ပြောသည်။

အဆိုပါသွေးလွန်တုပ်ကွေးရောဂါနှင့်ငှက်ဖျားရောဂါရောဂါကိုခံစားနေ၇သူများမှာ အသက် ၂ နှစ်မှ အသက် ၆၀ကျော်သက်ကြီးပိုင်းများအထိ ပါဝင်သည်ဟု သိရသည်။

ငှက်ဖျားရောဂါသည်ငှက်ဖျားပိုးကိုသယ်ဆောင်လာသည့်ခြင်းများကြောင့်ဖြစ်တတ်ပြီး ၎င်းခြင်များသည်အများအားဖြင့် စိမ့်စမ်းရေများ၊ ခြုံနွယ်တောထူထပ်သည့်နေရာများနှင့်အအေးဓာတ်များသော နေရာများတွင် ပေါက်ဖွားတတ်သည်။

ထို့အတူသွေးလွန်တုပ်ကွေးရောဂါကိုဖြစ်စေသည့်ခြင်များသည်လည်း ရေကြည် ရေသန့် နေရာများတွင်ပေါက်ဖွားတတ်ကြသည်။

အဆိုပါရောဂါများကိုကာကွယ်ရန် လုံခြုံသော ခြင်ထောင်များအောက်တွင် အိပ်စက်ရန် လိုအပ်သလိုခြင်ကိုက်မခံရအောင်လည်း နေထိုင်ရန်လိုအပ်ကြောင်း ကျန်းမာရေးဝန်ထမ်း တစ်ဦးဖြစ်သူဒေါ်နွယ်နွယ်ဦးက ပြောသည်။

"အဲဒီ ရောဂါဖြစ်နေတဲ့ အဆင့်အလိုက် ဆေးသောက်ဖို့လိုအပ်တယ်။ငှက်ဖျားဖြစ်နေတာကို မသိဘဲ ဖျားနေတာကနေ ဆေးလည်းမစစ်ဘူး။ဆေးမသောက်ဘူး။ ဘာကုသမှုမှလည်း မခံယူရင် ငှက်ဖျားက ဦးနှောက်ရောက်ပြီး သေစေနိုင်တယ်။သွေးလွန်တုပ်ကွေး ရောဂါကလည်း အတွင်းမှာသွေးယိုစိမ့်ပြီးသွေးခမ်းတာတွေဖြစ်တတ်တယ်။ ပထမနဲ့ ဒုတိယအဆင့်ဆို ကုသလို့ရသေးတယ်။တတိယနဲ့စတုတ္ထအဆင့်ဆိုမရတော့ဘူး။ အဲဒီရောဂါတွေဖြစ်နေတာလည်း မသိဘူး။ ဒီအတိုင်းဆေးမသောက်ဘဲ နေလိုက်ရင် အသက်သေစေတဲ့ အထိအန္တရာယ်ရှိတယ်" ဟု ပြောသည်။

အဆိုပါရောဂါဖြစ်ပွားနေသည်ဟု သံသယရှိပါက ဆေးစစ်မှုခံယူပြီး ရောဂါအဆင့်အလိုက်ဆေးဝါးကုသမှုခံယူရန် လိုအပ်ကြောင်းလည်း ၎င်းကပြောသည်။

သို့ရာတွင်စစ်ကောင်စီက တကျော့ပြန်တိုက်ပွဲဖြစ်ပွားသည့်ပြီးခဲ့သည့် ၂၀၂၃ ခုနှစ်၊ နိုဝင်ဘာလမှ စတင်ကာရခိုင်မှ ကုန်းလမ်းနှင့် ရေလမ်းတို့ကို ပိတ်ဆို့ထားသဖြင့်ရခိုင်တွင် ဆေးဝါးရှားပါးပြတ်လပ်ခြင်းတို့နှင့် ရင်ဆိုင်နေရသည်။

အရေးပေါ်ဆေးဝါးလိုအပ်ပါကလည်းဆေးရှာမရသည့်အခက်အခဲများဖြင့် ရင်ဆိုင် နေရသည်ဟု၇ခိုင်မှ ဒေသခံပြည်သူများက ပြောသည်။

ဓာတ်ပုံ- ပြီးခဲ့သည့် ၂၀၂၃ ခုနှစ်က မေတ္တာရောင်ခြည်ဖောင်ဒေးရှင်းက ငှက်ဖျားရောဂါနှင့်သွေးလွန်တုပ်ကွေးရောဂါမဖြစ်ပွားစေရန် စစ်တွေမြို့တွင် ခြင်ဆေးဖျန်းနေသည်ကိုတွေ့၇စဥ်။

ရခိုင်တွင် ငှက်ဖျားရောဂါနှင့် သွေးလွန်တုပ်ကွေးရောဂါ အဖြစ်များနေ

ဆက်စပ် အကြောင်းအရာများ

နောက်ဆုံးရသတင်းများ