ရခိုင်ပြည်သို့ နိုင်ငံခြားထုတ်၊ ပြည်မထုတ်၊ အရက်၊ ဘီယာ၊ ဝိုင်အပါအဝင် ယစ်မျိုးကုန်မှန်သမျှ တင်သွင်းခွင့်မပြုတော့ဟု ULA အမိန့်ထုတ်ပြန်

( လက်ရှိ ရှိနေသောရခိုင်ပြည်ရှိ အရက်များအားလုံး ၃ လအတွင်း အပြီးသတ်ရောင်းချ၇မည်)

မောင်စာဂ၊နိရဥ္စရာ၊ စက်တင်ဘာ ၂၁ /၂၀၂၄

ရခိုင်ပြည်သို့ပြည်ပမှတင်သွင်း ဝင်ရောက်နေသည့်နိုင်ငံခြားထုတ်အရက်များနှင့် ပြည်မထုတ် အရက်၊ ဘီယာ၊ ဝိုင်အပါအဝင် ယစ်မျိုးကုန်မှန်သမျှကိုတင်သွင်းခွင့်မပြုတော့ကြောင်း ရက္ခိုင်အမျိုးသားအဖွဲ့ချုပ်(ULA)က အမိန့်ထုတ်ပြန်လိုက်သည်။

စက်တင်ဘာလ၁၉ ရက်မှစ၍ ကန့်သတ်တားဆီးလိုက်ခြင်းဖြစ်သည်ဟု ULA ၏ဗဟိုဌာနရုံးချုပ် အတွင်းဝန်ရုံးမှ စက်တင်ဘာ ၁၉ ရက်နေ့စွဲဖြင့် ထုတ်ပြန်လိုက်ခြင်းဖြစ်သည်။

အမိန့်ကြေညာချက်အားအာရက္ခဒေသ၏ ပြင်ပမှ ယစ်မျိုးကုန်စည်များ တင်သွင်းနေကြသည့် လုပ်ငန်းရှင်ကုန်သည်၊ ကိုယ်စားလှယ်ယူထားသူများ၊ လက်လီ၊ လက်ကားရောင်းချနေကြသည့် စီးပွားရေးလုပ်ငန်းရှင်များသိရှိနားလည်စေရန်နှင့် လိုက်နာဆောင်ရွက်ရန် သက်ဆိုင်ရာ ဒေသ နိုင်ငံရေး၊အုပ်ချုပ်ရေးဌာနတာဝန်ရှိသူများက စနစ်တကျကြီးကြပ်ရမည်ဟုအမိန့်စာတွင် ဖော်ပြထားသည်။

ယခုအမိန့်စာထုတ်ပြန်ခြင်းမှာဟုတ်မှန်ပြီး ရခိုင်ရှိ စစ်ဒေသအလိုက်တရားဝင်ထုတ်ပြန်လိုက်ခြင်း ဖြစ်သည်ဟုလည်းရခိုင်မှ နိုင်ငံရေးမှူးတစ်ဦးက နိရဥ္စရာကို အတည်ပြု ပြောသည်။

"ပြည်သူတွေအားလုံးသိအောင်ထုတ်ပြန်တာဖြစ်တယ်။ လျှို့ဝှက်လည်း မဟုတ်ဘူး။ ရခိုင် တစ်ပြည်လုံးကိုပိတ်တာပါ"ဟု ပြောသည်။

ရခိုင်တွင်လက်ကျန်ရှိနေကြသည့် ပြည်ပမှဝင်လာသည့်နိုင်ငံခြားထုတ်၊ ပြည်မထုတ် အရက်၊ ဘီယာ၊ ဝိုင် အပါအဝင် ယစ်မျိုးကုန်မှန်သမျှကိုလည်းဤအမိန့်ကြေညာစာထုတ်ပြန်သည့်နေ့မှ (၃)လအတွင်း အပြီးသတ်ကုန်အောင်ရောင်းချကြရမည်ဟုလည်း ထုတ်ပြန်ချက်က ဖော်ပြထားသည်။

တော်လှန်ရေးကာလအတွင်း ကန့်သတ်တားဆီးထားသည့်ယစ်မျိုးကုန်များအား ထပ်မံ တင်သွင်းခြင်း လုံး၀မပြုလုပ်ရသည့်အပြင်ထပ်မံတင်သွင်းခြင်းများ ပြုလုပ်ကြောင်း တွေ့ရှိပါကထိရောက်စွာ အရေးယူခံရမည်ဟုလည်း ဖော်ပြထားသည်။

ရခိုင်မှယစ်မျိုးကုန်ရောင်းချသူအမျိုးသမီးတစ်ဦးကလည်း သူတို့ကို ULA တာဝန်ရှိသူများက ယမန်နေ့ စက်တင်ဘာ ၂၀ရက်တွင် ခေါ်ယူကာ ယခုကိစ္စအားရှင်းပြပြောဆိုခဲ့သည်ဟု နိရဥ္စရာကို ပြောသည်။

"၃ လအတွင်း အကုန်ရောင်းရမယ်။ မကုန်ရင် လွှင့်ပစ်ရမယ်။တွေ့ရင်အရေးယူမယ်ပေါ့နော်။ အဲလိုမျိုးပါ။ ဆိုတော့ ကျမတို့အတွက် ဆုံးရှုံးနစ်နာမှု၊ဟိုဟာဒီဟာဆိုကတော့ သာတယ်၊ နာတယ်ဆိုတာကတော့ ကျမတို့အတွက်သူတို့ဘက်က အဲလောက်တောင်မှ ပြတ်သားနေမှတော့ ကျမတို့ဘက်က Complain တော့ တစ်ခုမှ မရှိပါဘူး"ဟု ပြောသည်။

ရခိုင်တွင်နိုင်ငံခြားထုတ်နှင့် ပြည်မထုတ် အရက်၊ဘီယာ၊ ဝိုင်အပါအဝင် ယစ်မျိုးကုန်များအစား ရခိုင်ဒေသထွက် အရက်တစ်ခုတည်းကိုသာရောင်းချကြရမည်ဟုလည်း ULA တာဝန်ရှိသူများက ပြောဆိုခဲ့ကြောင်းသူမက ပြောသည်။

ယင်းအပြင်ဒေသထွက် အရက်ကိုလည်း ယခုထက်ပိုမို အဆင့်မီထုတ်လုပ်နိုင်ရန် ပံ့ပိုး ကူညီပေးသွားမည်ဟုပြောဆိုခဲ့ကြောင်းသိရသည်။

ယင်းနှင့်ပတ်သက်ပြီးရခိုင်မှ လူငယ်အမျိုးသားတစ်ဦးက "ပြည်တွင်းအရက်ကို သောက်ရမယ် ဆိုရင်ပြည်တွင်းအရက်ကို ဘယ်လိုပုံစံမျိုးအဆင့်မြင့်မြင်ထုတ်နိုင်မလဲ။ကျန်းမာရေးနဲ့ ညီညွတ်အောင် ဘယ်လိုမျိုးထုတ်လုပ်ဖို့စီစဉ်ထားပါလဲ။ဘယ်လောက်ထိ အဆင့်မြင့်တင်နိုင် မလဲ။ဘေးထွက်ဆိုးကျိုးမရှိအောင် စမ်းသပ်စစ်ဆေးပြီးတော့ ဈေးကွက်ထဲကိုဖြန့်မလဲစတဲ့လုပ်ထုံးလုပ်နည်းတွေကိုလည်း ပြည်သူတွေကို အသိပေးချပြသင့်တယ်"ဟု ပြောသည်။

ရခိုင်တွင်စီးပွားရေးကျဆင်းနေသော်လည်း နိုင်ငံခြားထုတ်နှင့် ပြည်မထုတ် အရက်၊ ဘီယာများသောက်သုံးမှုများမှာ လျော့မသွားသေးဟု သိရသည်။

ယင်းသို့ နိုင်ငံခြားထုတ်နှင့် ပြည်မထုတ် အရက်၊ဘီယာများကို ရခိုင်ပြည်တွင် တွင်တွင်ကျယ်ကျယ်သောက်သုံးနေခြင်းမှာ ကိုယ့်ရခိုင်ပြည်ထဲမှငွေကြေးများပြည်မဘက်သို့ စီးဆင်းသွားသလို စစ်ကောင်စီကိုလည်း အထောက်အကူပြုရာရောက်နေသဖြင့် ယခု တားဆီးပိတ်ပင်မှုမှာ ကောင်းသည်ဟုနိုင်ငံရေးလေ့လာသုံးသပ်သူ ဦးဖေသန်းက သုံးသပ်သည်။

ဦးဖေသန်းက"ကိုယ့်ပြည်ကထွက်လာတဲ့ အရက်တွေကိုကိုယ့်တိုင်းပြည်မှာရှိတဲ့ တော(ဆန်) အရက်ကုန်ကြမ်းကို အဆင့်အတန်းမီတဲ့ ကုန်ချောဖြစ်စေချင်တယ်။နိုင်ငံခြားအရက်တွေ မဝင်ဘဲ ကိုယ့်ပြည်ကလုပ်ငန်းရှင်တွေကိုအကောင်းဆုံးလုပ်စေချင်တဲ့ ရည်ရွယ်ချက်ပါ"ဟု ပြောသည်။

ULA ကယခုကဲ့သို့ကန့်သတ်တားမြစ်လိုက်မှုမှာ ရခိုင်ဒေသထွက် အရက်များကို အရည်အသွေး၊ အဆင့်အတန်းမီထုတ်လုပ်သုံးစွဲနိုင်ရန်လည်း ရည်ရွယ်သည်ဟုလည်း သူက ဆိုသည်။

စစ်တပ်ကအာဏာသိမ်းခဲ့သည့် ၂၀၂၁ ခုနှစ်၊ ဖေဖော်ဝါရီလနောက်ပိုင်းမှစတင်ကာ ပြည်တွင်းထုတ်၊အထူးသဖြင့် စစ်ကောင်စီလက်အောက်ခံကုမ္ပဏီများကထုတ်လုပ်သည့် အရက်၊ ဘီယာနှင့်ယစ်မျိုးကုန်များကိုမသုံးစွဲဘဲ ဆန့်ကျင်သပိတ်မှောက်ကြရန်အာဏာသိမ်းမှုဆန့်ကျင်သူများကတိုက်တွန်းထားကြသည်။

သို့သော်ရခိုင်အပါအဝင် တစ်နိုင်ငံလုံးတွင် သုံးစွဲမှုလျော့ကျသွားခြင်းမရှိသေးဟုလည်းသိ၇သည်။

ဓာတ်ပုံ- အင်တာနက်

( လက်ရှိ ရှိနေသောရခိုင်ပြည်ရှိ အရက်များအားလုံး ၃ လအတွင်း အပြီးသတ်ရောင်းချ၇မည်)

ဆက်စပ် အကြောင်းအရာများ

နောက်ဆုံးရသတင်းများ