မောင်တော နခခ(၅)အား AAမှ အပြတ်အသတ်ထိုးစစ်ဆင်တိုက်ခိုက်ရာမှ တိုက်ပွဲပြင်းထန် (စစ်ကောင်စီမှ ဂျက်တိုက် လေယာဉ် ၄ စီးဖြင့် တုံ့ပြန်တိုက်ခိုက်)

နောင်မင်းသူ နိရဉ္စရာ၊စက်တင်ဘာ ၂၈/၂၀၂၄

ရခိုင်ပြည် အနောက်ဘက်နယ်စပ် မောင်တောမြို့မှ တစ်ခုတည်းသော နောက်ဆုံး လက်ကျန်စခန်း နယ်ခြားစောင့်တပ်ခွဲ နခခ (၅) ဌာနချုပ်အား အာရက္ခတပ်တော် ( AA) မှ အပြီးသတ် ထိုးစစ်ဆင် တိုက်ခိုက်ရာ စစ်ကောင်စီမှလည်း ဂျက်တိုက်လေယာဉ် ၄ စီးထိ အသုံးပြုကာ ပြန်လည် ခုခံ တိုက်ခိုက်ခဲ့သည်ဟု သိရသည်။

အာရက္ခတပ်တော် AAမှ စက်တင်ဘာလ ၂၇ ရက် ညအချိန်မှစပြီး မနက်ပိုင်းအထိ အပြတ်အသတ် ထိုးစစ်ဆင်တိုက်ခိုက်ခဲ့ပြီးနောက် ယနေ့ စက်တင်ဘာ ၂၈ ရက်  နံနက် ၈ နာရီ ၃၀ မိနစ်ခန့်တွင် စစ်ကောင်စီက ဂျက်လေယာဉ် ၄ စီးဖြင့် ဗုံးကြဲတိုက်ခိုက်ခဲ့သည်ဟု အနီးအနားရှိ ရွာသာယာ ကျေးရွာ ဒေသခံတစ်ဦးက ပြောသည်။

" မနေ့ ညနေကနေ တစ်ညလုံးမိုးလင်းတဲ့အထိ တိုက်ပွဲကအပြင်းအထန်ဖြစ်ခဲ့ကြတာ။ နခခ(၅)ကို AA က အပြတ်အသတ် တိုက်ခိုက်တာလို့သိရတယ်။ လက်နက်ကြီးသံလက်နက်ငယ်သံ‌ တွေဆူညံစွာ ကြား‌နေခဲ့ရတယ်။ ကျွန်တော်တို့ ရွာသားတွေတစ်ညလုံးမအိပ်လိုက်ရဘူး။ တိုက်ပွဲက တော်တော်  ပြင်းပြင်းထန်ထန်ဖြစ်ခဲ့ကြတယ်။ "

ယခုတိုက်ပွဲသည် အာရက္ခတပ်တော်မှ မောင်တောမြို့ပြင်၌ တစ်ခုတည်းကျန်ရှိနေ သည့် ဖက်ဆစ် အကြမ်းဖက် စစ်ကောင်စီ၏ နခခ (၅) စခန်းအား အပြီးသတ်သိမ်းပိုက်ရယူရေးအတွက် ထိုးစစ်များကို ဆက်လက် အရှိန် အဟုန်မြှင့်တင်သွားမည်ဟု AA က စက်တင်ဘာ ၂၇ ရက် ထုတ်ပြန်သည့်နေ့တွင်ပင် အပြင်းအထန် တိုက်ပွဲ ဖြစ်ပွားလာခဲ့ခြင်းဖြစ်သည်။

" အေအေက သတင်းထုတ်ပြန်ပြီး နခခ(၅) ကိုတစ်ညလုံး ထိုးစစ်ဆင်တိုက်ခိုက်တာ စခန်းအခြေအနေ မလှတော့ ဘူးပါထင်တယ်။ စစ်တပ်က အထိနာ ကျဆုံးမူများလာတာကြောင့် ဒီနေ့ မနက် ၈နာရီ ကျော်လောက်မှ ာဂျက်တိုက်‌ လေယာဉ်တွေတစ်စီးပြီး တစ်စီးဆက်တိုက်လာကြတာ။ ‌၄ စီးလာပြီး ဗုံးလာချတာတွေ့ရတယ်။ တော်တော်လေး ပြင်းထန်တယ်။ မြေကြီးတွေလည်း တုန်လှုပ် သွားတယ်။ နခခ(၅)ဝန်းကျင်နဲ့ မြို့‌ပေါ်ကိုပါဗုံးချတယ်လို့တော့ သိရတယ်။ အထိအခိုက်တွေကတော့ မသိရသေးပါ။"ဟုဒေသခံတစ်ဦးကပြောဆိုသည်။

စစ်ကောင်စီ၏နောက်ဆုံးလက်ကျန်နယ်ခြားစောင့်ရဲတပ်ဖွဲ့ခွဲနခခ(၅)အား အာရက္ခတပ်တော် AAမှ ဝိုင်းရံပတ်ဆို့ထားပြီး လက်နက်ချအလံဖြူထောင်ရန်ညွန်ကြားထားခဲ့သည်။

ထိုသို့လက်နက်ချအလံဖြူ ထောင်ရန်ညွန်ကြားထားခဲ့သော်လည်း လက်နက်ချ အလံဖြူထောင်လာခြင်း မရှိသည့် အတွက် AAဖက်မှနခခ(၅) တပ်ရင်းအားအပြီး သတ်ထိုးစစ်ဆင် တိုက်ခိုက်နေခြင်းဖြစ်သည်။

စစ်ကောင်စီသည် ၎င်းစခန်း မကျစေရန် ဂျက်တိုက် လေယာဉ်အများဆုံးအသုံးပြုပြီးခုခံကာကွယ်‌ နေခြင်းဖြစ်သည်။

အာရက္ခတပ်တော်၏ စက်တင်ဘာ ၂၇ ရက်နေ့ ထုတ်ပြန်ချက်အထဲတွင် မောင်တောမြို့အား အလုံးစုံသိမ်းပိုက်ရရှိရန်အတွက် မောင်တောမြို့အတွင်း၌ ကစဉ့်ကလျားထွက်ပြေးပြီး တိုက်တာ အဆောက်အအုံ၊ လူနေအိမ်အချို့၌ အယောက်ကျထွက်ပြေးပုန်းခိုလွတ်မြောက်နေသေးသော ဖက်ဆစ်အကြမ်းဖက် စစ်ကောင်စီတပ်ဖွဲ့ဝင်အချို့၊ ၎င်းတို့သင်တန်းပေးထားသော မူဆလင် အကြမ်းဖက် အချို့ နှင့် ARSA၊ RSO၊ ARA အစရှိသော မူဆလင်အကြမ်း ဖက်လက်နက်ကိုင်များအား လိုက်လံရှင်းလင်းလျက်ရှိသည်။

တစ်ပြိုင်နက်တည်းတွင် မောင်တောမြို့ပြင်၌ တစ်ခုတည်းကျန်ရှိနေသော ဖက်ဆစ်အကြမ်းဖက် စစ်ကောင်စီ၏ နခခ (၅) စခန်းအား အပြီးသတ်သိမ်းပိုက်ရယူရေးအတွက် ထိုးစစ်များကို ဆက်လက်အရှိန်အဟုန်မြှင့်တင်သွားမည်ဖြစ်ကြောင်း ဖော်ပြထားသည်။ ဓါတ်ပုံ- အင်တာနက်