ဆလိုင်းမိုးအောင်၊နိရဉ္စရာ၊ စက်တင်ဘာ ၃၀/၂၀၂၄

ရခိုင်မှလူငယ်များသည်ယခုနောက်ပိုင်း မူးယစ်ဆေးဝါးသုံးစွဲမှု များပြားလာနေကြောင်း စုံစမ်းသိရသည်။

ရခိုင်မှာလက်ရှိဖြစ်ပွားနေသော တိုက်ပွဲများကြောင့်ကျောင်းသားအရွယ် လူငယ်များမှာ ကျောင်းမတက်ရဘဲ ကျောင်းရပ်နားလိုက်ရခြင်း၊အလုပ်အကိုင်ရှားပါးကာ အလုပ်လက်မဲ့ ဖြစ်ရခြင်းတို့ကြောင့်ရုပ်ပိုင်းနှင့် စိတ်ပိုင်းဆိုင်ရာများ ထိခိုက်နစ်နာနေသည့် အတွက်စိတ်ထွက်ပေါက် တစ်ခုအနေဖြင့်မူးယစ်ဆေးဝါးများသုံးစွဲမှုများပြားလာနေခြင်းဖြစ်သည်ဟု ဒေသခံများက ပြောသည်။

မြောက်ဦးမြို့နယ်မှလူငယ်တစ်ဦးက "အခုအခြေအနေက ရခိုင်မှာတက္ကသိုလ်ကျောင်းသား အများစုက ကျောင်းမတက်ရဘူး။အလုပ်အကိုင်ကလည်းမရှိနဲ့ စိတ်တွေလေနေကြတယ်။ ဆိုတော့ ညနေဘက်တွေဆို အပေါင်းအသင်းတွေနဲ့စုပြီးအရက်သေစာ သောက်စား လာကြတယ်။အဲဒီကနေ ဆေးခြောက်တွေဝယ်ပြီးမူးယစ်ဆေးဝါးတွေ သုံးစွဲမှု များပြားလာနေတာ။နယ်ဘက်ကလူငယ်တွေရဲ့ အရက်ဝိုင်းတွေမှာ ဆေးခြောက်နဲ့ တခြားမူးယစ်ဆေးတွေ မပါမဖြစ်ဖြစ်နေတာကို မြင်တွေ့နေရပါတယ်"ဟု ပြောသည်။

အဆိုပါမူးယစ်ဆေးဝါးသုံးစွဲသည့်ရခိုင်မှ လူငယ်များမှာ အသက်မပြည့်သေးသည့် ဆယ်ကျော်သက် အရွယ်လူငယ်များ၊တက္ကသိုလ်ကျောင်းသားလူငယ်များနှင့် အသက် ၃၅ နှစ်မှ အသက် ၄၀ကျော်အရွယ်လူကြီးများလည်းပါဝင်ကြောင်း စုံစမ်းသိရသည်။

အသက်မပြည့်သေးသည့်ဆယ်ကျော်သက်အရွယ်လူငယ်များမှာ ဆေးခြောက်များကို အများအားဖြင့် သုံးစွဲကြပြီးတက္ကသိုလ်ကျောင်းသားလူငယ်များနှင့် သက်ကြီးပိုင်း အရွယ်လူကြီးများမှာWY စိတ်ကြွရူးသွပ်ဆေးပြားများကိုသုံးစွဲမှုများပြားနေကြောင်းလည်း သိရသည်။

ကျောက်တော်မြို့မှကိုခိုင်ဇော်လင်းက "လူငယ်တွေ မူးယစ်ဆေးဝါး သုံးစွဲနေတာကို အိမ်ကမိသားစုတွေသိပုံမရကြဘူး။ ဒီအခြေအနေမှာ ' ဝိ'လို့ခေါ်ကြတဲ့ ဆေးခြောက်တွေလည်းရခိုင်မှာ ဖောဖောသီသီရတယ်။ အဲဒီဆေးခြောက်တွေကိုလည်းဖက်ကြမ်းဆေးလိပ်တွေမှာ ထည့်ပြီးသောက်ကြတာလည်းတွေ့ရတယ်။တခါသုံးမိရင် ဆိုးကျိုးတွေအများကြီးမရှိပေမဲ့ဆက်တိုက်သုံးနေရင်တော့ ဆိုးကျိုးတွေရှိတယ်။ ပြီးတော့အုပ်စုလိုက် ပလက်စတစ် အအေးပုလင်းတွေကို ဖောက်ပြီးပိုက်တံတွေနဲ့ ဆေးရှူတာတွေလည်းရှိတယ်။ဒီကာလမှာ စိတ်ထွက်ပေါက်တခုအနေနဲ့ မူးယစ်ဆေးသုံးစွဲတယ်ဆိုတာကလုံး၀မဖြစ်သင့်တာပါ။ မိသားစုဝင်တွေအနေနဲ့ ကိုယ့်သားသမီးကိုအနီးကပ်လေ့လာစောင့်ကြည့်နေဖို့လိုအပ်တယ်" ဟု ပြောသည်။

လက်ရှိတွင်ရခိုင်မှ မြို့ပေါ်နှင့် မြို့နယ်ကျေးရွာများအထိမူးယစ်ဆေးသုံးစွဲမှုတွင်ကျယ် များပြားလာပြီး ဆယ်ကျော်သက်ကျောင်းသားလူငယ်များအနေဖြင့်မူးယစ်ဆေးဝါးများကို ငွေကျပ်တန်ဖိုး ၅၀၀၀၊ ၁၀၀၀၀ ကျပ်ဖြင့်အလွယ်တကူဝယ်ယူသုံးစွဲနိုင်သည့်အတွက်လည်း ယခုကဲ့သို့ပိုမိုသုံးစွဲမှုများပြားလာနေခြင်းဖြစ်သည်ဟု သိရသည်။

ထို့အတူမူးယစ်ဆေးဝါးသုံးစွဲနေသူများကို အထူးသဖြင့် မှောင်သည့်နေရာများတွင်တွေ့ရပြီးတံတားများ၊ လူသူအရောက်နည်းပါးသည့် ကျေးရွာသင်္ချိုင်းကုန်းနေရာများ၊ တောစပ် နေရာများနှင့်လူမနေသည့် အဆောက်အအုံများတွင်လည်း တွေ့ရတတ်ကြောင်း ဒေသခံများက ပြောသည်။

ယင်းအပြင်မူးယစ်ဆေးဝါးရောင်းချသူများလည်း ဒေသတွင်းတရားဥပဒေစိုးမိုးမှုမရှိသည်ကိုအခွင့်ကောင်းယူပြီး ယခင်ကထက်ပိုမိုများပြားလာကာ ပေါ်ပေါ်ထင်ထင် ရောင်းချ ဖြန့်ဝေမှုများရှိသည်ဟုလည်းစုံစမ်းသိရသည်။

မင်းပြားမြို့နယ်မှ လူငယ်တစ်ဦးဖြစ်သူ ကိုကောင်းက"ရခိုင်မှာ မူးယစ်ဆေးဝါးနဲ့ပတ်သက်လို့ အရေးယူတာမျိုးအားနည်းနေသေးတယ်။ မူးယစ်ဆေးရောင်းချလို့ ဖမ်းတယ်။ ပြန်လွတ် လာရင်လည်းရောင်းမြဲတိုင်းရောင်းနေကြတယ်။ အရေးယူတဲ့နေရာမှာ အမျိုးမျိုးရှိတယ်။ရောင်းချတဲ့သူကိုအရေးယူတာတစ်မျိုး။ သုံးစွဲတဲ့သူကိုအရေးယူတာတစ်မျိုး။ အဓိကတော့ ရောင်းချတဲ့သူရော၊ သုံးစွဲသူကိုပါ ဖမ်းဆီးအရေးယူပြီးပြုပြင်လိုက်မယ်ဆိုရင် ရခိုင်ပြည် အတွက် အသုံးဝင်နိုင်တယ်။သုံးစွဲသူကိုအရေးယူရင် ရောင်းချသူကနောက်ထပ် လူငယ်တွေကိုရောင်းချနိုင်သေးတယ်။ ဒီတော့ ရောင်းချဖြန့်ဝေသူတွေကို အဓိက ဖမ်းဆီးအရေးယူသင့်တယ်" ဟုသူ၏အမြင်ကိုပြောသည်။

ယခုကဲ့သို့လူငယ်များမူးယစ်ဆေးဝါးသုံးစွဲမှုများပြားလာနေခြင်းမှာ ရခိုင်ပြည် အနာဂတ် အတွက်စိုးရိမ်စရာကောင်းပြီး ရာဇဝတ်မှုများ ပိုမိုဖြစ်လာနိုင်ကြောင်းလည်း သူကဆက်ပြောသည်။

ရခိုင်ဒေသအတွင်းယခုကဲ့သို့ မူးယစ်ဆေးဝါးရောင်းချဖြန့်ဝေသုံးစွဲနေကြသူများကို သက်ဆိုင်ရာ ဒေသအာဏာပိုင်များကထိရောက်ပြင်းထန်စွာ တားမြစ်ဖမ်းဆီးအရေးယူရန် လိုအပ်နေသည်ဟုလည်း ဒေသခံများကပြောဆိုကြသည်။

အာရက္ခတပ်တော်(AA)ကလည်း ရခိုင်တွင်ပြည်သူ့လုံခြုံရေး ကိစ္စရပ်များကို ဦးစားပေး ဆောင်ရွက်နေရသည့်အတွက်မူးယစ်ဆေးဝါးကိစ္စများကိုဖြေရှင်းရန် အချိန်တစ်ခုလိုဦးမည်ဟု ပြီးခဲ့သည့် ၂၀၂၂ခုနှစ်၊ မတ်လ ၅ ရက်နေ့က အွန်လိုင်းမှပြုလုပ်သည့် ပထမဆုံးအကြိမ် သတင်းစာရှင်းလင်းပွဲ၌AA ပြောခွင့်၇သူ ဦးခိုင်သုခကပြောဆိုခဲ့သည်။

ဓာတ်ပုံ- ပုံဟောင်း