နောင်မင်းသူ၊နိရဉ္စရာ၊ အောက်တိုဘာ ၂/၂၀၂၄

၇ခိုင်ပြည်၊မောင်တော နခခ(၅)တပ်ရင်းမကျစေဖို့ စစ်ကောင်စီက နခခ(၅)အနီး ဗုံးလာကြဲစဥ် နေရာမှားဗုံးကြဲမိ၍ စစ်ကောင်စီတပ်သား ၂၀ခန့်သေဆုံးသွားသည်ဟု သိ၇သည်။

စက်တင်ဘာလ၃၀ ရက်၊ မွန်းတည့် ၁၂ နာရီမှနေ့လယ် ၂ နာရီအတွင်း စစ်ကောင်စီက မောင်တောမြို့ နေရာအနှံ့အပြားနှင့် နခခ(၅)ဝန်းကျင်ရှိရုံးအဆောက်အအုံများအား Y-12 ဖြင့် ဗုံးကြဲတိုက်ခိုက်ခဲ့သည်ဟု သိ၇သည်။

ယင်းသို့ဗုံးကြဲချစဉ် နခခ(၅)အနီးရှိရုံးအဆောက်အအုံတစ်ခုတွင် စစ်ကောင်စီ တပ်သားများ နေရာယူထားသည့်ကာကင်းစခန်းတစ်ခုအား မှားယွင်း ဗုံးချခဲ့မှုကြောင့် စစ်ကောင်စီတပ်သား ၂၀ခန့်သေဆုံးခဲ့ရကြောင်း သတင်းရင်းမြစ်တစ်ဦးက ပြောသည်။

"နခခ(၅)ပတ်လည်က ရုံးအဆောက်အအုံတွေကို Y-12 နဲ့ ဗုံးချတာ နေရာမှားပြီးဗုံးချလို့စစ်ကောင်စီတပ်သား ၂၀ လောက်သေဆုံးသွားတယ်လိုတော့သိရတယ်"ဟု ပြောသည်။

မောင်တောခရိုင်တွင်စစ်ကောင်စီ၏ တစ်ခုတည်းကျန်ရှိနေသည့်နခခ(၅)တပ်ရင်းအား အာရက္ခတပ်တော်(AA)က ဝန်းရံပိတ်ဆို့ပြီးလက်နက်ကြီးများဖြင့်ပစ်ခတ်နေ၍ စစ်ကောင်စီက လေကြောင်းမှ ဂျက်တိုက်လေယာဥ်များနှင့် Y-12 တို့ဖြင့် နေ့ညမပြတ် လာရောက် စစ်ကူပေး တိုက်ခိုက်နေခြင်းဖြစ်သည်။

မောင်တောမြို့ပေါ်နှင့်နခခ(၅)ဝန်းကျင်၊ ၃ မိုင်အနီးအား ယမန်နေ့ အောက်တိုဘာ ၁ ရက်၊ ည ၁၀ နာရီကျော်မှစပြီး ယနေ့ အောက်တိုဘာ ၂ ရက်၊ ညဥ့် ၃နာရီကျော်အထိ ဂျက်တိုက် လေယာဉ်များဖြင့်ရ ကြိမ်လာရောက် ဗုံးကြဲချခဲ့ကြောင်း ဒေသခံများက ပြောသည်။

"စိုးရိမ်ထိတ်လန့်ပြီး တစ်ညလုံးမအိပ်လိုက်ကြ၇ဘူး"ဟု ဒေသခံအမျိုးသမီးတစ်ဦးက ပြောသည်။

AA က တိုက်ခိုက်နေသည့် မောင်တော နခခ (၅) တိုက်ပွဲမှာ အပြင်းထန်ဆုံးအဆင့်သို့ရောက်ရှိလာနေပြီး နခခ(၅)မကျဆုံးစေဖို့စစ်ကောင်စီကလည်း လေယာဉ်များဖြင့် အဆက်မပြတ် ဗုံးကြဲတိုက်ခိုက်နေခြင်းဖြစ်သည်။

လက်ရှိတွင်နခခ(၅)၌ စားနပ်ရိက္ခာများ၊လက်နက်ရိက္ခာများပြတ်လပ်လာနေ၍ Y-12 လေယာဉ်မှ လေထီးများဖြင့် မကြာခဏလာရောက်ချပေးလျက်ရှိနေသည်ဟု သိ၇သည်။

နေရာမှားဗုံးကြဲမိ၍ စစ်ကောင်စီတပ်သား ၂၀ခန့်သေဆုံးသွားသည့်သတင်းနှင့် ပတ်သက်ပြီး သီးခြား အတည်ပြုနိုင်ခြင်းတော့ မရှိသေးပါ။

ဓာတ်ပုံ- ပုံဟောင်း