ကံ့ကော်နီနီ၊နိရဉ္စရာ၊ အောက်တိုဘာ ၂ / ၂၀၂၄

ဧရာ၀တီတိုင်းထဲကိုစစ်ဘေးရှောင်ရန်ရောက်ရှိနေသည့် ရခိုင်စစ်ဘေးရှောင်ပြည်သူများမှာ စစ်ကောင်စီထံသံသယနှင့်စောင့်ကြည့်ခံနေရပြီး တစ်ပတ်တစ်ကြိမ် ဧည့်စာရင်းစစ်ဆေးမှု ခံယူနေကြရကြောင်းပြောသည်။

ဧရာ၀တီတိုင်းဒေသကြီး၊ကျုံပျော်ခရိုင်ထဲမှ ကျုံပျော် ရေကြည်၊ အသုတ်၊ ငသိုင်းချောင်း စသည့်မြို့နယ်များသို့စစ်ဘေးရှောင်ခိုလှုံနေသော ရခိုင်ပြည်သူများကို အဓိကထား စောင့်ကြည့်ကာဧည့်စာရင်း စစ်ဆေးမှုခံယူနေရခြင်းဖြစ်သည်ဟုရခိုင်စစ်ဘေးရှောင် အမျိုးသားတစ်ဦးကပြောသည်။

"ကျုံပျော်ခရိုင်ထဲက မြို့နယ်တွေမှာ ရခိုင်စစ်ဘေးရှောင်တွေကို စကစက သံသယနဲ့ အမြဲစောင့်ကြည့်နေတယ်။ နေရထိုင်ရတာလွတ်လပ်မှုမရှိဘူး။အတော်တင်းကျပ်ထားတယ်။ တစ်ပတ်တစ်ကြိမ်ဧည့်စာရင်းစစ်တယ်"ဟု ပြောသည်။

တစ်ပတ်တစ်ကြိမ်ဧည့်စာရင်းစစ်ဆေးရာတွင်ယခင်တိုင်ကြားထားသည့် ဧည့်စာရင်းမှ လူများလျော့သွားခြင်းရှိမရှိနှင့်အသစ်ရောက်ရှိနေသူများရှိမရှိတို့ကို အဓိက စစ်ဆေးနေကြောင်းသိရှိရသည်။

"သတင်းတွေထွက်နေတာကတော့ စကစအနေနဲ့ဧရာ၀တီတိုင်းထဲကို AA တွေရောက်လာမှာ အထူးကြောက်နေတယ်။စစ်ဘေးရှောင်တွေကိုစစ်ဆေးတဲ့အခါလည်း လူငယ်လူရွယ်တွေ ဆိုရင်တင်းတင်းကျပ်ကျပ်စစ်ဆေးတယ်"ဟု အဆိုပါရခိုင်စစ်ဘေးရှောင်အမျိုးသားကပြောသည်။

သံတွဲမြို့နယ်တိုက်ပွဲများနှင့် ဧရာ၀တီတိုင်းနယ်စပ်ဂွမြို့နယ်တိုက်ပွဲများအတွင်း ရခိုင်ပြည်သူ အများအပြားမှာဧရာ၀တီတိုင်းထဲသို့ စစ်ဘေးရှောင်ခိုလှုံရောက်ရှိနေကြခြင်းဖြစ်သည်။

လက်ရှိတွင်လည်းဂွမြို့နယ်၊ ကျိန္တလီမြို့အနီးရှိကုလားပြင်းကျေးရွာအနီးတို့တွင် စစ်ကောင်စီနှင့် အာရက္ခတပ်တော်(AA)တို့ တိုက်ပွဲများဖြစ်ပွားလျက်ရှိသည်။

စစ်ကောင်စီအနေဖြင့်AA ၏ထိုးစစ်ကြောင့်ရခိုင်ကမ်းရိုးတန်းတောင်ဘက် သံတွဲကို လက်လွှတ်ခဲ့ရပြီး ဖြစ်သလိုဂွမြို့နယ်အထိ တိုက်ပွဲများကျယ်ပြန့်လာသည်နှင့်တပြိုင်နက်ဧရာ၀တီတိုင်းဘက်ရောက်ရှိလာသည့် ရခိုင်ပြည်သူများအပေါ် စစ်ရေး၊ နိုင်ငံရေး အငြိုးအတေးဖြင့်ချိုးနှိမ်ဆက်ဆံနေခြင်းဖြစ်နိုင်ကြောင်း ထင်ကြေးပေး ပြောဆိုမှုများလည်း ရှိနေသည်။

ဓာတ်ပုံ- ပုံဟောင်း