သဉ္ဇာနွယ်၊ နိရဉ္စရာ၊ အောက်တိုဘာ ၃/၂၀၂၄

၇ခိုင်ပြည်၊ ကျောက်ဖြူမြို့နယ်တွင် ကုန်သွားဝယ်ပြီးပြန်လာသူများကိုစစ်ကောင်စီက ဒရုန်းဖြင့်ပစ်ခတ်၍ ငါးဦးခန့်ဒဏ်ရာရရှိသွားကြောင်း သတင်းရရှိသည်။

ကျောက်ဖြူမြို့နယ်၊ ကုလားမကျွန်းကျေးရွာမှ ဒေသခံ ခုနစ်ဦးသည် ပြီးခဲ့သည့်အောက်တိုဘာ ၁ ရက်တွင် စနဲမြို့မှ ကုန်သွားဝယ်ပြီး စက်လှေတစ်စီးဖြင့် ပြန်လာစဥ်စစ်ကောင်စီ၏ တောင်မော်ကြီးရေတပ်စခန်းကဒရုန်းဖြင့် ပစ်ခတ်ခဲ့၍ ဗုံး အစအနစဉ်ကာ ငါးဦးခန့် ဒဏ်ရာရရှိသွားခြင်းဖြစ်သည်ဟုစနဲဒေသခံတစ်ဦးက နိရဉ္စရာသတင်းဌာနကို ပြောသည်။

"ဈေးဝယ်လို့ရွာကို အပြန် အပစ်ခံ၇တာ။ ပစ်ခံရတုန်းက စနဲဖက်မှာပဲရှိသေးတယ်။သူတို့လှေကို ဇီးချဆိပ်ကမ်း ပိုက်ဆိပ်တောင်မော်မှာ ရပ်ထားတာ။ လှေပေါ်မတက်၇သေးဘူး။တောင်မော်ကြီးဖက်ကစစ်ကောင်စီ ဒရုန်းကပစ်တဲ့ လက်နက်အစတွေ ထိသွားကြလို့ ဒဏ်ရာ ငါးယောက်လောက်ရသွားတယ်။ဒဏ်ရာရတဲ့အထဲမှာအမျိုးသားရော အမျိုးသမီး ရောပါတယ်" ဟုပြောသည်။

ဒဏ်ရာရရှိသူများကို နီးစပ်ရာတွင် ဆေးကုသမှုပေးနေသည်ဟုကျောက်ဖြူဒေသခံအမျိုးသားတစ်ဦးက နိရဉ္စရာ သတင်းဌာနကို ပြောသည်။

"ဒဏ်ရာကတော့ အနည်းနဲ့အများထိခိုက်သွားကြတယ်။ အရမ်းကြီးစိုးရိမ်စရာမရှိဘူးလို့ သိရတယ်။ဆေးကုသမှုတော့ပေးနေကြပါတယ်။ အသေအပျောက်မရှိပါဘူး" ဟု ပြောသည်။

ဒဏ်ရာရရှိသူများ၏ အမည်နှင့်အသက်ကို လောလောဆယ် စုံစမ်းနေဆဲဖြစ်သည်။

ကျောက်ဖြူတွင်တောင်မော်ကြီးရေတပ်စခန်းနှင့်  ရပ်နားထားသည့်နေဗီများက ဇင်ချောင်းတိုက်နယ်ဖက်သို့မကြာခဏ လက်နက်ကြီးကျည်များ ပစ်ခတ်နေသည်ဟု ဒေသခံများက ပြောသည်။

ကျောက်ဖြူမြို့နယ်တွင် စစ်ကောင်စီက ဒေသခံများအားငါးဖမ်းခွင့်ပိတ်ပင်ထားခြင်း၊ မြို့ပေါ်မှ နယ်ဖက်သို့ ကုန်ပစ္စည်းတင်ပို့မှုပိတ်ပင်ထားခြင်းအပြင် နေဗီပေါ်မှ လက်နက်ကြီး/ငယ်များဖြင့် ပစ်ခတ်မှုရှိသဖြင့်ဒေသခံများအခက်တွေ့နေကြောင်း သိ၇သည်။

ဓာတ်ပုံ - ကျောက်ဖြူဆိပ်ကမ်းတစ်နေရာအား တွေ့၇စဥ်။