နောင်မင်းသူ၊နိရဉ္စရာ၊ အောက်တိုဘာ ၃/၂၀၂၄

၇ခိုင်ပြည်၊မောင်တောမြို့ ပြင်တွင် ၂၀၂၄ ခုနှစ် ဇွန်လ တိုက်ပွဲပြင်းထန်စွာဖြစ်ပွားတုန်းကမောင်တော၄ မိုင် သာယာကုန်းကျေးရွာမှကျောင်းထိုင်ဆရာတော်နှင့် ရဟန်းတစ်ပါး အပါအဝင် ဒေသခံရွာသား ခုနစ်ဦးကို စစ်ကောင်စီက ဖမ်းဆီးသွားခဲ့ပြီး အဆိုပါ ၇ ဦးထဲမှ အသက် ၁၄နှစ်အရွယ်နှင့် အသက် ၇၈ နှစ်အရွယ် လူကြီး တစ်ဦးတို့၏ အလောင်းကို တွေ့ရှိခဲ့ပြီး  ကျန် ၅ ဦးမှာ ယနေ့ထိ ပျောက်ဆုံးနေသည်ဟု ကျေးရွာသားများကပြောသည်။

ပျောက်ဆုံးနေသူ ၅ဦးမှာ သာယာကုန်းကျေးရွာမှကျောင်းထိုင်ဆရာတော် ဦးသုန္ဒရ (ဓမ္မစရိယအောင်)၊ ၇ဟန်းဦးဥာဏဝံသ၊ ဦးထွန်းနုစိန်(၄၂)နှစ်၊ဦးလှထွန်း(၅၀)နှစ်၊ ဦးကျန်အောင်(၆၀)နှစ်တို့ဖြစ်ကြပါတယ်။

အလောင်းတွေ့ရှိသူ ၂ ဦးကတော့ မောင်သန်းရီ(၁၄)နှစ်နဲ့ မကျည်းကုန်းကျေးရွာမှ ထွက်ပြေးလာသူ ဦးချဘူအောင် (၇၈)နှစ်တို့ ဖြစ်ကြောင်း ရွာသားများထံမှ သိ၇သည်။

ထိုအထဲမှ မောင်သန်းရီ (၁၄) နှစ်နှင့် ဦးချဘူအောင် (၇၈) နှစ်တို့၏အလောင်းများကို ရှာတွေ့ခဲ့ပြီး ကျန်သူများမှာ ယနေ့ထိ ပျောက်ဆုံးနေသဖြင့် အသတ်ခံလိုက်ရပြီဟုရွာသားများက ယုံကြည်နေကြသည်။

ဒေသခံတစ်ဦးက "သာယာကုန်းရွာမှာ စစ်တပ်က ရက်စက်စွာပစ်သတ်ခဲ့တဲ့  ၂ ဦးရဲ့ အလောင်းကိုရှာတွေ့ထားတာ ရှိပါတယ်။ ရွာဆရာတော် အပါအဝင် ကျန်တဲ့ ၅ဦးကိုလည်း သတ်ဖြတ်လိုက်ပြီလို့ ကျွန်တော်တို့ ယုံကြည်ထားတယ်။အသတ်ခံရတဲ့ အထဲမှာမကျည်းကုန်းရွာက ထွက်ပြေးလာတဲ့အသက်(၇၈)နှစ်အရွယ် ဦးချဘူအောင်ပါဝင်တယ်။ သူက မကျည်းကုန်းရွာကပါ။ ရွာထဲမှာသေဆုံးနေတဲ့ ရုပ်အလောင်းတွေ့တာက ဦးချဘူအောင်နဲ့ မောင်သန်းရီတို့ အလောင်းတွေပါ။ သူတို့ကရွာနီးချင်းတွေပါ"ဟု ပြောဆိုသည်။

ပြီးခဲ့သည့်ဇွန်လ ၉ ရက်တွင် ၄ မိုင်သာယာကုန်းရွာထဲ၌ ပုပ်ပွနေသည့် ဦးချဘူအောင်နှင့် ၆ တန်းကျောင်းသားမောင်သန်းရီတို့နှစ်ဦး၏ ရုပ်အလောင်းနှစ်ခုအားရွာသားများက ရှာဖွေတွေ့ရှိခဲ့ကြသည်။

ကျောင်းထိုင်ဆရာတော်နှင့်ရဟန်းတစ်ပါးအပါအဝင် ကျန် လူ ငါးဦးအား ယနေ့အချိန်ထိ ရှာမတွေ့သေးဟု ဆိုသည်။

ဇွန်လအတွင်းသာယာကုန်းရွာအနီးတိုက်ပွဲများပြင်းထန်ခဲ့စဥ် သူတို့သည် ရွာထဲမှ ထွက်မပြေးဘဲ ရွာတွင် ကျန်နေခဲ့ကြသူများဖြစ်ပြီး စစ်ကောင်စီတပ်က ဖမ်းဆီးသွားသည်ဟု ရွာသားများက ပြောကြသည်။

လက်ရှိတွင်ရွာသားများသည် နေရပ်သို့ပြန်လည်ဝင်ရောက်နေထိုင်ကြပြီဖြစ်ပြီးအသတ်ခံလိုက်ရသူများကို လိုက်လံရှာဖွေကြသော်လည်း ယခုထိ လုံး၀ရှာမတွေ့တော့ဟုပြောသည်။

မောင်တော၄ မိုင် နခခ(၂)တပ်ရင်း-မကျည်းကုန်း-သာယာကုန်း-ငွေတောင်-ရွှေတောင် ကျေးရွာများမှာတစ်ဆက်တည်းတည်ရှိနေသည့် ကျေးလက်ကျေးရွာများလည်းဖြစ်သည်။

ထိုကျေးရွာများသို့ဇွန်လ ၁ ရက်၌ မောင်တောမြို့ ၄ မိုင်ရှိနယ်ခြားစောင့်ရဲတပ်ဖွဲ့ခွဲ နခခ(၂)မှ အင်အား ၁၀၀ခန့်ရှိစစ်ကောင်စီ စစ်ကြောင်းတစ်ခု မကျည်းကုန်းကျေးရွာသို့စတင် ဝင်ရောက်လာခဲ့သည့်အတွက်ရွာသူရွာသားအချို့ထွက်ပြေးခဲ့ကြရသည်ဟု သိ၇သည်။

ဇွန်လ၂ ရက်၊ နေ့လယ် နှစ်နာရီကျော်တွင် စစ်ကောင်စီ စစ်ကြောင်းမှာ သာယာကုန်းကျေးရွာသို့ ဆက်လက်ဝင်ရောက်လာ၍သာယာကုန်းကျေးရွာမှ ရွာသူ၊ ရွာသားများလည်း ထွက်ပြေးခဲ့ကြရသည်။

သာယာကုန်းဒေသရွာခံသားတစ်ဦးက"ကျွန်တော်တို့ထွက်ပြေးချိန်မှာ ဘုန်းကြီးကျောင်းနားကို သွားပြီးဆရာတော်ကိုခေါ်ခဲ့ကြတယ်။ ဆရာတော်က ဘာမှမဖြစ်ဘူး။ သူမပြေးဘူးလို့ ပြောတယ်။ခေါ်လို့မရခဲ့ကြပါဘူး"ဟု ပြောဆိုသည်။

သာယာကုန်းကျေးရွာ၌အိမ်ခြေ ၇၀ ခန့်နှင့် လူဦးရေ ၃၅၀ခန့်ရှိပြီး မကျည်းကုန်းကျေးရွာ၌ အိမ်ခြေ ၁၇၀ ကျော်နှင့် လူဦးရေ ၁၀၀၀ကျော်နေထိုင်သည့်ကျေးရွာများဖြစ်ကြသည်။

သာယာကုန်းကျေးရွာတွင် ရခိုင်လူမျိုးများနေထိုင်ပြီးမကျည်းကုန်းရွာတွင် ရခိုင်နှင့် ၇ခိုင်မျိုးနွယ်စုဝင်သက်လူမျိုးများနေထိုင်ကြသည်။

ပုံစာ- ၄ မိုင် ကျေးရွာအုပ်စု သာယာကုန်းကျေးရွာမူလတန်းကျောင်းအား တွေ့၇စဉ်။