ကံ့ကော်နီနီ၊ နိရဉ္စရာ ၊ အောက်တိုဘာ ၅ / ၂၀၂၄

စစ်ကောင်စီကတောင်ကုတ်မြို့နယ်တွင် အရပ်သားများကို ဦးတည်ဗုံးကြဲတိုက်ခိုက်နေ၍  ဩဂုတ်လမှ ယခုအောက်တိုဘာ ပထမပတ်အထိအရပ်သား ၁၁ ဦးသေဆုံးပြီး ၂၆ ဦးထက်မနည်းဒဏ်ရာရရှိခဲ့သည်။

သေဆုံးသူနှင့်ဒဏ်ရာရရှိသူများမှာ တောင်ကုတ်မြို့နယ်၊ ကင်းတောင်စံပြကျေးရွာ၊ တန်းလွဲရွာမမြို့၊ ခေါင်းလောင်းတူကျေးရွာ၊ခရိုင်ကျေးရွာ၊ မီးကျောင်းထိုးကျေးရွာ၊ နေပူတောင် စီမံကိန်းအနီးမှဒေသခံအရပ်သားများဖြစ်ကြောင်း သိရှိရသည်။

သေဆုံးမှု အများဆုံးမှာ အရပ်သားပြည်သူများ  ညဥ့်အချိန်အိပ်မောကျနေစဥ် စစ်ကောင်စီလေယာဥ်ဖြင့်ဗုံးကြဲတိုက်ခိုက်၍ ဖြစ်သည်ဟု သိ၇သည်။

ယမန်နေ့ အောက်တိုဘာလ ၄ ရက်ကတောင်ကုတ်မြို့မြောက်ဘက် ၁၁ မိုင်ကျော်အကွာ တောင်ကုတ်-မအီကားလမ်းဘေးမှကင်းတောင်စံပြကျေးရွာကို စစ်ကောင်စီက ညဥ့်အချိန်ရော၊နေ့လယ်ပါ တစ်နေ့တည်းတွင် နှစ်ကြိမ်ဗုံးကြဲတိုက်ခိုက်ခဲ့သည်။

ယင်းဖြစ်စဥ်အတွင်း အသက်(၁၀)နှစ်အရွယ်ကလေးငယ်တစ်ဦး၊ မအိခိုင်ဖြိုး(၁၅)နှစ်၊ဦးမောင်လှတင်(၆၅)နှစ်၊ ဒေါ်မြရီ(၅၆)နှစ်၊ ဒေါ်မြကြည်(၇၄)နှစ်တို့ငါးဦး ပွဲချင်းပြီးသေဆုံးခဲ့၇သည်။

မောင်ဇင်လင်းထက်(၁၁)နှစ်၊ ကျောင်းဆရာ ဦးစိုးထိုက်(၄၈)နှစ်ဒေါ်မတင်ရွှေ(၈၉)နှစ်၊ ဒေါ်မြင့်မြင့်ကြူ (၅၂)နှစ်နှင့်ကိုပြည်သိမ်းစံ (၂၃)နှစ်၊ ဒေါ်ကြွေရုပ် (၅၃)နှစ်၊ ဦးသာဟန်၊ ဒေါ်သိန်းတင်၊ မခင်ချိုဇင်၊ဦးမောင်မြင့်ခင်(၃၈)နှစ်၊ ဦးတင်ဝင်း၊ဒေါ်မေကြန်၊ဦးတက်ထွန်း၊ ဦးမောင်ကြီးအောင်၊ ဒေါ်နွယ်နွယ်(၃၀)နှစ်၊ ဒေါ်စမ်းမြင့်နှင့်မနေဇင်ထွဋ်တို့အပါအဝင် ၂၀ ဦး ဒဏ်ရာရရှိခဲ့သည်။

အောက်တိုဘာလ ၂ ရက် ၊ ည ၁၁ နာရီကျော်ကလည်းတောင်ကုတ်မြို့နှင့် ရ မိုင်ခန့်အကွာခေါင်းလောင်းတူကျေးရွာအနီးရှိလေးတောင်ဗွေကျွန်းကို လေကြောင်းဗုံးကြဲတိုက်ခိုက်၍ဆယ်ကျော်သက်လူငယ်တစ်ဦး ဦးခေါင်းဗုံးစထိမှန်ဒဏ်ရာရရှိခဲ့သည်။

စက်တင်ဘာလ ၂၄ ရက်၊ ည ၈ နာရီက တောင်ကုတ်ခရိုင် ၊တန်းလွဲရွာမမြို့ လေကြောင်း ဗုံးကြဲတိုက်ခိုက်ခံရမှုအတွင်းစစ်ဘေးရှောင်တက္ကသိုလ်ကျောင်းသား ကိုအောင်သူရနှင့်နောက်ထပ်အရပ်သားတစ်ဦးတို့သေဆုံးပြီး နောက်ထပ်အရပ်သားသုံးဦးဒဏ်ရာရရှိကာရဲစခန်းနှင့် အနီးဝန်းကျင်နေအိမ်တချို့အပြင် ရေသန့်စက်တို့ဗုံးထိမှန်ပျက်စီးသွားကြောင်းသိ၇သည်။

စက်တင်ဘာလ ၁၉ ရက် ၊ မနက်အစောကြီး ၂နာရီဝန်းကျင်ကလည်း ရခိုင်ရိုးမပေါ်ကနေပူတောင်ကျောက်ထုတ်လုပ်ရေးစီမံကိန်းကို ဗုံးကြဲတိုက်ခိုက်၍ အလုပ်သမားတန်းလျားတွင်နေထိုင်သည့်ဒေါ်တင်တင်လှ(၄၅)နှစ်မှာ ပွဲချင်းပြီးသေဆုံးခဲ့သည်။

ဩဂုတ်လ ၃၁ ရက်ကလည်း တောင်ကုတ်မြို့နယ်၊ခရိုင်ကျေးရွာကို စစ်ကောင်စီက ဗုံးကြဲတိုက်ခိုက်၍မောင်မိုးသက်နိုင်(၁၅)နှစ်နှင့် (၁၈)နှစ်အရွယ်လူငယ်ဦးသေဆုံးပြီး၅ ဒဏ်ရာရရှိခဲ့သည်။

ဩဂုတ် ၂၂ ရက် ၊ နေ့လယ် တစ်နာရီခွဲကတောင်ကုတ်မြို့နှင့် ၅ မိုင်အကွာအဝေးအတွင်းရှိသည့်မိကျောင်းထိုး၊ မိုးတောင်၊ ရွှေကွမ်းစမ်း၊ မီးကျောင်းထိုးကျေးရွာ၊ဇိမ်ခံထွေကျေးရွာများအနီးသို့ စစ်ကောင်စီဂျက်ဖိုက်တာဖြင့်ဗုံးကြဲတိုက်ခိုက်ခဲ့ရာမီးကျောင်းထိုးကျေးရွာမှ မခင်ယုနန္ဒာထွန်း(၂၇) ပွဲချင်းပြီး သေဆုံးခဲ့သည်။

ဩဂုတ် ၁၉ ရက်၊ မနက်သုံးနာရီခွဲတွင်ကျောက်ကြီးကွင်းကျေးရွာအနီးရှိ ကျောက်ကြီးကွင်းတောင်ကိုဗုံးကြဲတိုက်ခိုက်၍ တောင်ခြေအနီးဝန်းကျင်မှ နေအိမ် ၁၀ ကျော်ဗုံးစထိမှန်ပျက်စီးခဲ့သည်။

ဩဂုတ်လ ၁၆ ရက်၊ မနက်အစောကြီး ၃ နာရီအချိန်ကလည်းတောင်ကုတ်မြို့နှင့် ၈ မိုင်ခန့်ကွာဝေးသည့်မိုးတောင်နှင့် မိုးပညာဒါနကျောင်းကို စစ်ကောင်စီက ဗုံးကြဲတိုက်ခိုက်၍မိုးပညာဒါနကျောင်းဗုံးထိမှန်ပျက်စီးခဲ့ကြောင်း သိ၇သည်။

ဩဂုတ်လ ၁၅ ရက်၊ မနက်အစောကြီး ၃နာရီခွဲအချိန်ကလည်း တောင်ကုတ်မြို့နယ်၊ ဆားပြင်ကျေးရွာနှင့်ကမာကျေးရွာကြားရှိ အောင်မင်္ဂလာကျေးရွာအနီးရှိကွမ်းခြံစိုက်ခင်းတဲကိုစစ်ကောင်စီလေယာဥ်က ဗုံးနှစ်လုံးကြဲချတိုက်ခိုက်ခဲ့ပြီးလူနှင့်တိရစ္ဆာန်ထိခိုက်ဒဏ်ရာရမှုမရှိခဲ့ပေ။

ရခိုင်ပြည်တွင်စစ်ကောင်စီ၏ စစ်ဆင်ကွပ်ကဲရေးဌာနချုပ်သုံးခုရှိရာ ဘူးသီးတောင် စကခ(၁၅)နှင့် ကျောက်တော်စကခ(၉)တို့ကို AA ကသိမ်းပိုက်ထားပြီးဖြစ်ကာတောင်ကုတ်အခြေစိုက် စကခ(၅) ဌာနချုပ်တစ်ခုသာကျန်ရှိနေခြင်းဖြစ်သည်။

စကခ(၅) လက်အောက်တွင် ခမ၇(၃၄၆)နှင့် ခမ၇(၅၄၄)တပ်ရင်းတို့ရှိပြီး ထိုတပ်ရင်းများတွင်စစ်ကောင်စီစုဆောင်းထားသည့် မွတ်ဆလင်စစ်သားများကိုပါ အင်အားဖြည့်တင်းထားကြောင်း သိ၇သည်။

စကခ(၅)အခြေစိုက် တောင်ကုတ်အပါအဝင် ကျောက်ဖြူ၊ ဂွ၊ မာန်အောင်၊ အမ်း၊ မောင်တော၊စစ်တွေတို့ကို ဆက်လက်ထိုးစစ်ဆင်တိုက်ခိုက်မည်ဟု AA က တရားဝင်ကြေညာထားသည်။

အလားတူ တောင်ကုတ်၏မြောက်ဘက် မအီမြို့နှင့်တောင်ဘက် သံတွဲမြို့တို့ကို AA ကသိမ်းပိုက်ထားသလိုပန်းတောင်း-တောင်ကုတ်လမ်း ရခိုင်ရိုးမပေါ်တွင်ခြေကုပ်ယူထားပြီးပဲခူးတိုင်းမှ စစ်ကောင်စီစစ်ကူလမ်းကြောင်းကိုပိတ်ဆို့ဖြတ်တောက်ထားသည်။

စစ်ကောင်စီအနေဖြင့်ယနေ့ အောက်တိုဘာလ ၅ ရက်မနက်ပိုင်းတွင် တောင်ကုတ်မြို့နယ်၊နတ်မော်ရွာနှင့်သလိန်ပြင်ရွာတို့ကို အင်အားအပြည့်အစုံဖြင့်စစ်ကြောင်းထိုးပြီးကျေးရွာဘုန်းတော်ကြီးကျောင်းတချို့တွင် ဝင်ရောက်နေထိုင်နေကြောင်း ဒေသခံများကနိရဥ္စရာကိုပြောသည်။

ဓာတ်ပုံ- အောက်တိုဘာ ၄ ရက်က ကင်းတောင်စံပြကျေးရွာ ဗုံးကြဲတိုက်ခိုက်ခံရ၍ပျက်စီးသွားသည့်နေအိမ်တစ်လုံးအား တွေ့၇စဥ်။(ပေးပို့)