စောရှင်မေ၊နိရဉ္စရာ၊ အောက်တိုဘာ ၅/၂၀၂၄

ဧရာ၀တီတိုင်းမှ တိုက်ပွဲအပြင်းအထန်ဖြစ်ပွားနေသော ၇ခိုင်ပြည်၊ ဂွမြို့နယ်သို့ စစ်ကူလာသည့် စစ်ကား ၈ စီးအနက် ၂ စီးသည် ရိုးလမ်းပေါ်တွင် တိမ်းမှောက်ကာ စစ်သား၆ ဦး သေဆုံးပြီး အများပြား ဒဏ်ရာရရှိသွားသည်ဟု သတင်းထွက်ပေါ်နေကြောင်း ဒေသခံများက ပြောကြားသည်။

စစ်ကား ၈ စီးဖြင့် စစ်ကူလာသည့်စစ်ကြောင်းမှ စစ်ကား ၂ စီးသည် အောက်တိုဘာလ၄ ရက်၊ နေ့လယ်ခန့်တွင်ဧရာ၀တီ - ငါးသိုင်းချောင်းမှ အတက် အမြောက်တပ်ဂိတ်အလွန်သစ်ဆန်း (၁)နှင့် သစ်ဆန်း(၂) မိုင်တိုင် နှစ်ခုကြား ရိုးလမ်းပေါ်တွင် တိမ်းမှောက်သွားခဲ့သည်ဟု သိ၇သည်။

"မိုးရွာတော့ လမ်းချော်တယ်။ လမ်းတွေကလည်း ကျဉ်းပြီး အကွေ့အကောက်များတော့ အရှိန်လွန်ပြီးသစ်ဆန်း(၁) နဲ့သစ်ဆန်း (၂) မိုင်တိုင်နှစ်ခုကြားမှာကားမှောက်တာလေ။ ၆ ယောက်သေပြီး အတော်များများ ဒဏ်ရရတယ်လို့ သတင်းထွက်နေတယ်။ စစ်ကူလာတဲ့ ကားတွေပါ" ဟုပြောသည်။

အဆိုပါစစ်ကားတိမ်းမှောက်ခဲ့သည့်နေရာသည် ဂွဘက်မှ ငါးသိုင်းချောင်းသို့သွားသည့်ရိုးလမ်းပေါ်တွင် တည်ရှိပြီး ဗေဒါဂိတ်အလွန် ဂွနှင့် မိုင် ၄၀ ကျော်ခန့် အကွာအဝေးရှိကြောင်း သိရသည်။

နောက်ထပ် ဂွဒေသခံ တစ်ဦးက " အဲကားမှာ စစ်သားတွေနဲ့အတူ  ကျည်ဆံတွေ၊ ရိက္ခာတွေလည်း တင်လာတာပေါ့။ ကားမှောက်သွားတော့ လမ်းပေါ်မှာကျည်ဆံတွေ အကုန်ထွက်ကျတယ်။ စစ်သားတွေလည်း သွေးတွေနဲ့။ခြောက်ယောက်သေတယ်လို့လည်း ကြားတယ်။ သေချာတော့ မသိ၇သေးဘူး" ဟုပြောသည်။

ယခုကဲ့သို့ စစ်ကူလာသည့်ကား တိမ်းမှောက်သွားသဖြင့် နမိတ်မကောင်းဟုဆိုစစ်ကားအချို့သည် အလောင်းနှင့် ဒဏ်ရာရသူများကို တင်ဆောင်ကာ ငသိုင်းချောင်းဘက်သို့ ပြန်လှည့်သွားသည်ဟုသိ၇သည်။

ထိုသို့စစ်ကားနှစ်စီးတိမ်းမှောက်ခဲ့သည့်အတွက် ယမန်နေ့နေ့လယ်ဘက်မှ ညနေ ၅ နာရီခန့်အထိ ရိုးလမ်းပေါ်တွင် ကား၊ ဆိုင်ကယ်များအား ဖြတ်သန်းသွားလာခွင့်ပိတ်ပင်ထားခဲ့ကြောင်း ခရီးသွားပြည်သူများကပြောသည်။

သံတွဲမြို့ဘက်ကနေ သံတွဲ- ဂွ ကားလမ်းအတိုင်း ထိုးစစ်ဆင်လာသည့်အာရက္ခတပ်တော် စစ်ကြောင်းများသည် သံတွဲတောင်ဘက် မိုင် (၂၀) အကွာ ကျိန္တလီမြို့ကို လွန်လာပြီးဒယ်ဘုတ်၊ ကြွေချိုင်ဘက်သို့  ရောက်ရှိလာပြီဖြစ်ကာစစ်ကောင်စီက ကြည်း၊ရေ၊ လေကို အသုံးပြုပြီး အပြင်းအထန် ခုခံကာကွယ်နေသည်ဟု သိ၇သည်။  

ဓာတ်ပုံ- ပုံဟောင်း