အမ်းမြို့ပေါ်ရပ်ကွပ်မှ အမျိုးသားတစ်ဦးကို စစ်ကောင်စီ ဖမ်းဆီးကာမျက်နှာဖုံးစွပ်ကာ ဖမ်းဆီးခေါ်ဆောင်သွား (တောင်ကုတ်တွင်လည်း လမ်းသွားလမ်းလာတစ်ဦးအဖမ်းခံရ)

မင်းသျှင်စော နိရဉ္စရာ ၊အောက်တိုဘာ ၇ ၊၂၀၂၄

ရခိုင်ပြည်၊ အမ်းမြို့၊ မြို့ပေါ်ရပ်ကွက်တစ်ခုမှ အမျိုးသားတစ်ဦးကို စစ်ကောင်စီ စရဖအဖွဲ့နှင့် ရဲတပ်ဖွဲ့ဝင်များ ပူးပေါင်းဖမ်းဆီးပြီး မျက်နှာဖုံးစွပ်ကာ ခေါ်ဆောင်သွားခဲ့သည်ဟု သတင်းရရှိ သည်။

ဖမ်းဆီးခံရသူမှာ  အမ်းမြို့သစ် (၃) ရပ်ကွက်၊ ကညင်တောင်ရွာမှ ဦးညီဆန်း (၄၃)နှစ်ဖြစ်ကြောင်း သိရသည်။

အမ်းဒေသခံတစ်ဦးက " သူ့ကို အောက်တိုဘာ ၆ နေ့ ညနေ ၇ နာရီအချိန်ခန့်မှာ စစ်ကောင်စီစရဖနဲ့  ရဲအင်အား ၇ ယောက်လောက်က သူ့အိမ်ကို ကားနဲ့ လာတယ်ပြီးတော့ ဖမ်းဆီးသွားပါတယ်။  သူ့ကို မျက်နှာဖုံး စွပ်ပြီး ကားပေါ်တင်ခေါ်ယူသွားပါတယ် "ဟု နိရဉ္စရာသတင်းဌာနကို ပြောဆိုသည်။

လက်ရှိ အချိန်ထိ သူ့ကို မည်သည့်နေရာသို့  ခေါ်သွားသည်ကို မသိရသေးဟု မိသားစုဝင် အမျိုးသမီးငယ်တစ်ဦးက နိရဉ္စရာကိုပြောသည်။

“ သူတို့ ယူသွားတဲ့ ကားနောက်ကလိုက်ပြီး စုံစမ်းတော့ ဘယ်ကို ခေါ်သွားမှန်း မသိကြဘူး။ ရဲစခန်းကို လိုက်သွားတော့လည်း မဝင်ရဘူး။ သူ့ကို AA နဲ့ ဆက်စပ်ပြီး ဆေးပစ္စည်းတွေ ပို့နေတယ်လို့ စွပ်စွဲ ဖမ်းသွားတယ်လို့ သိရတယ်” ၎င်းက ပြောဆိုသည်။

အလားတူ တောင်ကုတ်မြို့နယ်၊ မအီတိုက်နယ်မှ အပြစ်မဲ့ကျေးရွာသား တစ်ဦးကို တောင်ကုတ်မြို့ စစ်ကောင်စီ တပ်ဖွဲ့ဝင်များမှ အောက်တိုဘာ ၃ ရက်နေ့က ဖမ်းဆီးလိုက်သည်ဟု သတင်းရရှိသည်။

ဖမ်းဆီးခံရသည့် ဒေသခံအမျိုးသားမှာ မအီတိုက်နယ်၊ သဒွန်ရွာမှ ဦးမောင်ဝင်း (၃၆)နှစ် ဖြစ်သည်ဟု သူ၏ သူငယ်ချင်းတစ်ဦးက  နိရဉ္စရာသို့ ပြောာကြားသည်။

၎င်းသည် တောင်ကုတ်မြို့မှ စျေးဝယ်ပြီး မော်တော်ဆိုင်ကယ်နှင့် အပြန်တွင်  တောင်ကုတ် တက္ကသိုလ်ဂိတ်တွင် စစ်ကောင်စီ တပ်ဖွဲ့ဝင်များ၏ ဖမ်းဆီးခံလိုက်ရသည်ဟု ပြောသည်။