(လူနှင့် တိရစ္ဆာန်ထိခိုက်မှုမရှိခဲ့)

သဥ္ဇာနွယ်၊နိရဥ္စရာ၊ အောက်တိုဘာ ၇ /၂၀၂၄

ရခိုင်ပြည်နယ်၊ကျောက်ဖြူမြို့နယ်၊ စိုင်ခြုံကျေးရွာအနီးရှိ ဝက်အင်းနဂါးရွှံ့မီးတောင်ပေါက်ကွဲမှုဖြစ်ပွားခဲ့ရာ မီးတောင်ပတ်လည်တွင် ပေ ၃၀၀ ခန့်ချော်ရည်များဖုံးလွှမ်းသွားခဲ့သည်ဟု သိရသည်။

အဆိုပါရွှံ့မီးတောင်သည် အောက်တိုဘာ ၅ ရက်၊ နံနက် ၁၁ နာရီခန့်က နာရီဝက်အကြာ ပေါက်ကွဲခဲ့ခြင်းဖြစ်သည်။

အမြင့်၁၀ ပေခန့်အထိ ရွှံ့ရည်ပူများ လွင့်စင်ပေါက်ထွက်ခဲ့သလို မီးတောင်ဘေးပတ်လည်၏ ပေ ၃၀၀ခန့်အားဖုံးလွှမ်းသွားခဲ့သည်ဟု သိရသည်။

သို့သော်မီးတောင်ပေါက်ကွဲမှုကြောင့် လူ၊ တိရစ္ဆာန်နှင့် လယ်ယာမြေစိုက်ခင်းများပျက်စီးဆုံးရှုံးမှုမရှိခဲ့ဟု ဒေသခံများက ပြောသည်။

ကျောက်ဖြူဒေသခံကိုအောင်အောင်က "အထိအခိုက်တော့ မရှိခဲ့ဘူး။ အဲဒီမီးတောင်ကဓည၀တီရေတပ်စခန်းနဲ့အနီးဆုံးမှာရှိတာ။ အဲဒီနားက စစ်တပ်ဧရိယာမို့မိုင်းတွေထောင်ထားတော့ လူတွေအသွားအလာမရှိဘူး"ဟု ပြောသည်။

အဆိုပါရွှံ့မီးတောင်သည်မီးတောင်လေးခုပါ မီးတောင်အုပ်စုဖြစ်ပြီး ယခု ပေါက်ကွဲမှုဖြစ်ပွားခဲ့သောမီးတောင်မှာမြောက်ဘက်အစွန်ဆုံးမှမီးတောင်ဖြစ်သည်ဟု သိ၇သည်။

ယခုပေါက်ကွဲခဲ့သောမီးတောင်မှာ ၂၀၂၃ ခုနှစ်၊ နိုဝင်ဘာ ၅ ရက်တွင်နောက်ဆုံးအကြိမ် ပေါက်ကွဲခဲ့ပြီး ၂၀၁၆ ခုနှစ်မှ ၂၀၂၄ ခုနှစ်အထိ(၆)ကြိမ်ပေါက်ကွဲခဲ့ပြီဟု သိရသည်။

ကျောက်ဖြူမြို့နယ်၊စိုင်ခြုံကျေးရွာအနီးတွင် ဝက်အင်းနဂါးရွှံ့မီးတောင်အုပ်စု၊ ပန်းရှည်နဂါးရွှံ့မီးတောင်အုပ်စုနှင့်သပြေတောနဂါးရွှံ့မီးတောင်အုပ်စုတို့ရှိသည်ဟု သိရသည်။

ယင်းအနက်ပန်းရှည်နဂါးရွှံ့မီးတောင်အုပ်စုနှင့် ဝက်အင်းနဂါးရွှံ့မီးတောင်အုပ်စုတို့မှာအများဆုံးပေါက်ကွဲလေ့ရှိတတ်ကြသည်။

ရွှံ့မီးတောင်များ၏အမြင့်မှာပင်လယ်ရေမျက်နှာပြင်အထက် ၅၀ မီတာမှ ၆၀ မီတာခန့်အထိရှိပြီးမီးတောင်ပေါက်ကွဲရန်ပံ့ပိုးပေးသည့် ကုန်းမြေထုလှုပ်ရှားမှုနှင့်မြေအောက်ဓာတ်ငွေ့များစု စည်းကာ ပေါက်ကွဲခဲ့ခြင်းဖြစ်သည်ဟု သိ၇သည်။ (ဓာတ်ပုံ- ပုံဟောင်းသာ)ေ