(AA တပ်ဖွဲ့ဝင်တစ်ဦးကျဆုံးပြီး နှစ်ဦးဒဏ်ရာ၇)

မောင်စာဂ၊ နိရဥ္စရာ၊ အောက်တိုဘာ ၈ / ၂၀၂၄

ရခိုင်ပြည်၊ ဘူးသီးတောင်မြို့နယ်တွင် လူပျောက်ရှာဖွေသည့်အာရက္ခတပ်တော် (AA)တပ်ဖွဲ့ဝင် သုံးဦးကို ARSA လက်နက်ကိုင်အဖွဲ့က ခြုံခိုတိုက်ခိုက်၍ AA တစ်ဦးကျဆုံးပြီးနှစ်ဦးဒဏ်ရာ၇သွားကြောင်း AA က ယနေ့နေ့လယ်တွင်သတင်းထုတ်ပြန်သည်။

ကျဆုံးသွားသည့် AA တပ်ဖွဲ့ဝင်မှာအုတ်တောင်ကျေးရွာမှ ဦးဇော်မြင့်ဦး(ခ)ချက်ဖား(၄၁)နှစ်ဖြစ်သည်ဟုထုတ်ပြန်ချက်တွင် ဖော်ပြထားသည်။

သူနှင့်အတူ နောက်ထပ် လုံခြုံရေးတပ်ဖွဲ့ဝင်နှစ်ဦးမှာ အာရက္ခပြည်သူ့လုံခြုံရေးနှင့်တရားဥပဒေစိုးမိုးရေးဌာန(DLEPS)မှ အာရက္ခပြည်သူ့လုံခြုံရေးအထောက်အကူပြုအဖွဲ့ဝင်များဖြစ်ကြသည်။

သူတို့သုံးဦးသည် ယမန်နေ့ အောက်တိုဘာ ရ ရက်၊ နေ့လယ် ၁ နာရီခွဲကလူပျောက်ရှာဖွေရန် ဆိုင်ကယ်ဖြင့်သွားစဥ် ဘူးသီးတောင်မြို့နယ်၊ ဂုံးနားမွတ်ဆလင်ကျေးရွာအဝင်၀အနီးသို့ ရောက်ရှိချိန်၌ ARSA ၏ခြုံခိုတိုက်ခိုက်ခံရမှုကြောင့်ကျဆုံးဒဏ်ရာရရှိခဲ့ခြင်းဖြစ်သည်ဟု AA ထုတ်ပြန်ချက်က ဆိုသည်။

"ဘူးသီးတောင်မြို့နယ်၊ ဂုံးနားမူဆလင်ကျေးရွာ အဝင်၀အနီးသို့ရောက်ရှိချိန်၌ ARSA မူဆလင်အကြမ်းဖက်လက်နက်ကိုင်အဖွဲ့မှ ခြုံခိုတိုက်ခိုက်ခံရ၍မိမိတို့၏ လုံခြုံရေးတပ်ဖွဲ့ဝင် (၁) ဦးမှာ ဦးခေါင်းနှင့် ဝမ်းဗိုက်တွင် သေနတ်ကျည်ထိမှန်ကာကျဆုံးပြီး ကျန်နှစ်ဦးမှာ ဒဏ်ရာရရှိခဲ့သည်"ဟု ဖော်ပြထားသည်။

ထို့အပြင် သူတို့စီးလာသော ဆိုင်ကယ်သည်လည်းခြုံခိုတိုက်ခိုက်ခံရသည့်နေရာ၌ပင် မီးရှို့ဖျက်ဆီးခြင်းခံခဲ့၇သည်ဟု ဖော်ပြထားသည်။

AA က သွားရောက်ရှာဖွေသည့် ပျောက်ဆုံးနေသူများမှာ ဘူးသီးတောင်မြို့၊အမှတ် (၂)ရပ်ကွက်၊ ရွာသစ်တွင်နေထိုင်ကြသော ဦးစံရွှေမောင် (၆၇)နှစ်နှင့် ဦးမြအောင်(၆၅) နှစ်တို့ဖြစ်သည်။

သူတို့သည် ယမန်နေ့ နံနက် ၈ နာရီခန့်တွင် အိမ်ဆောက်လုပ်ရန်အတွက်ဘူးသီးတောင်မြို့နယ်၊  ဂုံးနားကျေးရွာဘက်သို့ ဝါးခုတ်ရန်ထွက်သွားခဲ့ပြီးနောက် နေ့လယ်အထိ အိမ်ပြန်ရောက်မလာဟု သိ၇သည်။

ယင်းကြောင့် မိသားစုဝင်များနှင့် ဒေသခံများက ဘူးသီးတောင်မြို့နယ်ရှိအာရက္ခပြည်သူ့လုံခြုံရေး အထောက်အကူပြုအဖွဲ့ထံသို့ အသိပေး အကြောင်းကြားလာ၍သွားရောက်ရှာဖွေရာ ယခုကဲ့သို့ ARSA အဖွဲ့ကခြုံခုံတိုက်ခိုက်ခဲ့ခြင်းဖြစ်သည်။

"ခြုံခိုတိုက်ခိုက်ခဲ့သော ARSA မူဆလင်အကြမ်းဖက်လက်နက်ကိုင်အဖွဲ့အားမိမိတို့ အာရက္ခပြည်သူ့လုံခြုံရေးတပ်ဖွဲ့ဝင်များနှင့် အာရက္ခတပ်တော်တို့သည်လိုက်လံဖမ်းဆီးလျက်ရှိသည့်နည်းတူ ပျောက်ဆုံးနေသူ ရွာသားနှစ်ဦးအားလည်းရှာဖွေလျက်ရှိသည်"ဟုလည်း AA ထုတ်ပြန်ချက်တွင်ဖော်ပြထားသည်။

မောင်တောမြို့နယ်တောင်ပိုင်း ကိုင်းကြီးမြိုရွာမှ ပြီးခဲ့သည့်စက်တင်ဘာလ ၃၀ ရက်က ငါးရှာသွားရာမှ ပျောက်ဆုံးသွားသည့် ဆယ်ကျော်သက်သုံးဦး အပါအဝင်သားဖလေးဦးကိုလည်း AA တပ်ဖွဲ့ဝင်များက မေယုတောင်ကြောထဲ၌ပိုက်စိပ်တိုက်ရှာဖွေလျက်ရှိသည်။

ထိုသို့ရှာဖွေစဥ်တွင်လည်း အောက်တိုဘာလ ၄ ရက်က မေယုတောင်တန်းထဲ၌ ARSA စခန်းငယ်တစ်ခုကိုရှာတွေ့ခဲ့ပြီး မီးရှို့ဖျက်ဆီးခဲ့ကြသည်ဟု သိ၇သည်။

လူပျောက်ရှာစဥ် AA ကတွေ့ရှိခဲ့သည့် ထို ARSAစခန်း၏ ထွက်လမ်းမှာ ဘူးသီးတောင်မြို့နယ်၊ ဂူတာပြင်၊ စိမ်းညှင်းပြား၊သရက်တောင်မွတ်ဆလင်ကျေးများဖက်သို့ ဆင်းသွားသည်ကိုတွေ့ရှိခဲ့ကြောင်းလည်း လိုက်ရှာခဲ့ကြသည့် ကျေးရွာသားများက ပြောဆိုသည်။

ကိုင်းကြီးမြိုရွာမှ ပျောက်ဆုံးသွားသည့် သားဖလေးဦးကိုလည်း AAတပ်ဖွဲ့ဝင်များက ဆက်လက်ရှာဖွေလျက်ရှိသည်။

ဓာတ်ပုံ - AA Info Desk