(စစ်ကောင်စီလေတပ်ကနခခ(၅)အနီးရှိ ခရိုင်တရားရုံးနှင့် အခြားရုံးများကိုဗုံးလာကြဲ)

နောင်မင်းသူ၊နိရဉ္စရာ၊ အောက်တိုဘာ ၁၂/၂၀၂၄

ရခိုင်ပြည်၊အနောက်ဘက်နယ်စပ် မောင်တောမြို့အနီးရှိ စစ်ကောင်စီ၏ တစ်ခုတည်းသော ကျန်ရှိသည့်နခခ(၅)တပ်ရင်းအား အာရက္ခတပ်တော် (AA)ကအပြင်းထန်ဆုံး ထိုးစစ်ဆင် တိုက်ခိုက်နေရာ စစ်ကောင်စီကလည်း လေကြောင်းကနေ ဗုံးကြဲချကာ အပြင်းအထန် ခုခံကာကွယ်နေသည်ဟု သတင်းရရှိသည်။

စစ်ကောင်စီဖက်ကလည်း နခခ(၅)ဝန်းကျင်အား ယမန်နေ့ အောက်တိုဘာ၁၁ ရက်၊ ညနေ ၃ နာရီ ၁၅ မိနစ်၌ ဂျက်တိုက်လေယာဉ်တစ်စီးဖြင့်ဗုံးလေးလုံး ကြဲချ ခုခံခဲ့ကြောင်း သိရသည်။

ဒေသခံပြည်သူတစ်ဦးက"AA ဖက်က လက်နက်ကြီးတွေနဲ့ ဆက်တိုက် ပစ်နေတာ ကြား၇တယ်။ဒီနေ့ မနက်လည်း ပစ်နေတယ်။ မနေ့ကတစ်ညလုံးလည်းမြေပြင်တိုက်ပွဲပြင်းထန်စွာဖြစ်ခဲ့ကြတယ်"ဟုပြောကြားသည်။

နခခ(၅)ပတ်ဝန်းကျင်ဖြစ်သည့် ခရိုင်တရားရုံးအပါအဝင် ထိုအနီးအနားရှိရုံးများနှင့် ဧတေလီယာ(မွတ်ဆလင်)ရွာကိုပါဗုံးကြဲချခဲ့ကြခြင်းဖြစ် ကြောင်း သတင်းရင်းမြစ်ထံမှသိရသည်။

ထိုခရိုင်တရားရုံးနှင့် အခြားရုံးများအား စစ်ကောင်စီကနခခ(၅)တပ်ရင်း၏ ကာကင်းများ အဖြစ်ပြုလုပ်ထားပြီးထိုကာကင်းများအား AA ကပြီးခဲ့သည့်ဩဂုတ်လ ၁၂ရက်တွင် အပြီးသတ်တိုက်ခိုက်သိမ်းပိုက်ခဲ့သည်။

နခခ(၅)တပ်ရင်းအားAA က လနှင့်ချီကြာမြင့်စွာဝိုင်းရံပိတ်ဆို့ပြီးထိုးစစ်ဆင် တိုက်ခိုက်လျက် ရှိနေသော်လည်းယနေ့အချိန်အထိ မသိမ်းပိုက်နိုင်သေးဘဲရှိနေသေးကြောင်းသိ၇သည်။

"နခခ(၅)တပ်ရင်းကို ဘာကြောင့်အခုအထိမသိမ်းပိုက်နိုင်သေးတာလဲဆိုတော့ နခခ(၅)ထဲမှာစကခ(၁၅)စစ်ဆင်ရေးကွပ်ကဲရေးမှူး ဗိုလ်မှူးချုပ်သူရိန်ထွန်းနဲ့ အမှတ်(၂၂) ခြေမြန်တပ်မ ဌာနချုပ်ကဒုတပ်မမှူးတို့ရှိနေတယ်လို့ သိရတယ်။ သူတို့ လိုအပ်တဲ့အချိန်မှာ လေကြောင်းကို အချိန်မရွေးခေါ်ယူနိုင်တယ်။သူတို့လိုအပ်တဲ့လက်နက်နဲ့ စားနပ်ရိက္ခာတွေကို လေထီးတွေနဲ့ ချပေးခိုင်းလို့ရနေတယ်" ဟု စစ်ရေးလေ့လာသူတစ်ဦးက ပြောကြားသည်။

ထိုနခခ(၅)တပ်ရင်းထဲ၌ဘူးသီးတောင်မြို့အခြေစိုက် ခြေလျင်တပ်ရင်းများမှ တပ်ဖွဲ့ဝင်များ၊ မောင်တောသို့ကမ်းထိုးရေယာဉ်ဖြင့် စစ်ကူရောက်ရှိလာခဲ့ကြသည့်တပ်မ(၂၂)နှင့် တပ်မ(ရရ)မှ အထူးကွန်မန်ဒိုများ၊ နယ်ခြားစောင့်ရဲတပ်ဖွဲ့များ၊စစ်သင်တန်းဆင်း မွတ်ဆလင် လက်နက်ကိုင်များ အပါအဝင် စုစုပေါင်းအင်အား ၆၀၀ ခန့်ဖြင့် ခုခံနေကြကြောင်း သတင်းရင်းမြစ်မှသိ၇သည်။

နခခ(၅)တပ်ရင်းဘေးပတ်လည်၌လယ်ကွင်းပြင်များသာရှိနေပြီး တပ်ခြံစည်းရိုးအားလည်း သုံးထပ်ကာရံကာမိုင်းမျိုးစုံ ထောင်နှင့်ချီ ထောင်ထားသည့်အတွက် AA အနေဖြင့်အနီးကပ်ထိုးစစ်ဆင်တိုက်ခိုက်ရန်ခက်ခဲနေပြီး တပ်ရင်းထဲသို့ ဝင်ရောက်သိမ်းပိုက်ရန် မလွယ်ကူ ဖြစ်နေရကြောင်းစစ်ရေးလေ့လာသူတစ်ဦးက ပြောဆိုသည်။

"ပထဝီအနေအထားအ၇ နခခ(၅)ပတ်လယ်မှာ တောင်ကုန်းတောင်တန်းတွေမရှိဘူး။လယ်ကွင်းပြင်ကြီးဖြစ်နေတယ်။ နောက်ပြီးတပ်ရင်းခြံစည်းရိုးကိုသုံးထပ်ကာရံထားတယ်။ခြံစည်းရိုးသုံးထပ်ကြား တွေထဲမှာမြေမြှုပ်မိုင်းအမျိုးစုံ ထောင်နဲ့ချီပြီး ထောင်ထားကြတယ်။ အဲဒါကြောင့် အာရက္ခတပ်တော်(AA)အနေနဲ့ အနီးကပ်ထိုးစစ်ဆင် တိုက်ခိုက်ဖို့ ခက်ခဲနေတာ ဖြစ်တယ်"ဟုပြောဆိုသည်။

ထိုနောက်နခခ(၅)တပ်ရင်း၏ကတုတ်ကျင်းများအား ကွန်ကရစ်တုံးများဖြင့် တည်ဆောက် ထားသလိုအခိုင်အမာတည်ဆောက်ထားသည့် မြေအောက်ခန်းအချို့ပါရှိနေသည့်အတွက် AA က လက်နက်ကြီးများဖြင့်ပစ်ခတ်တိုက်ခိုက်သော်လည်း ခုံခံကာကွယ်နိုင်နေခြင်းဖြစ်ကြောင်း သူကဆက်လက်ပြောဆိုသည်။

ထိုသို့အခိုင်အမာတည်ဆောက်ထားပြီး အင်အားအများအပြားဖြင့်မဆုတ်တမ်းခုံခံနေကြသလို လေကြောင်းဖြင့် အပြင်းထန်ဆုံးဗုံးကြဲမှုများပြုလုပ်ပေးနေ၍ ထို နခခ(၅)တပ်ရင်းမှာ ယခုအချိန်အထိ မသိမ်းပိုက်နိုင်ဘဲအချိန်ကြာမြင့်နေခြင်းဖြစ်သည်ဟု သိ၇သည်။

ဓာတ်ပုံ- ပုံဟောင်း