နိရဉ္စရာ၊ အောက်တိုဘာ ၁၃/၂၀၂၄

ဂွမြို့မြောက်ပိုင်း ကျိန္တလီမြို့ဘက်ကနေ ထိုးစစ်ဆင်လာသည့်အာရက္ခတပ်တော် ( AA) တပ်ဖွဲ့သည် ဂွမြို့ဘက်သို့တစ်ဖြည်းဖြည်း ချဉ်းကပ်လာနေသဖြင့် ဂွမြို့ဘက်သို့ AA ကျော်လာနိုင်သည့်  တောလမ်းများတစ်လျှောက်ကို စစ်ကောင်စီတပ် စစ်ကြောင်းထိုးနေသည်ဟုသတင်းရရှိသည်။

စစ်ကောင်စီတပ် စစ်ကြောင်းထိုးနေသည့် နေရာများမှာ ဆပ်သွားအနီးရှိဆားချက်ကြီး၊ ဆင်ကူး၊ ကျောင်းတောင်ဘက်ကို ဖြစ်သည်ဟု ဒေသခံတစ်ဦးက ပြောဆိုသည်။

၎င်းပြင် စစ်ကောင်စီတပ်သည် ဆပ်သွားတံတားအား မိုင်းခွဲရန်မိုင်းများ အဆင်သင့် တပ်ဆင်ထားပြီဟုလည်း ဒေသခံများက ပြောသည်။

ယခု AAထိုးစစ်မှာ ကြွေချိုင်အနီးထိ ရောက်ရှိလာပြီး အဲအင်း၊ ဒယ်ပုတ်တို့ကိုကျော်လွန်လာပြီဟု သိရသည်။ ကြွေချိုင်နှင့် တိုင်ကျိုးကို ကျော်လွန်လာလျှင် စစ်ကောင်စီအထိုင်တပ်စခန်းချထားသည့် ဆပ်သွားကို ရောက်လာနိုင်သဖြင့် ဆပ်သွားတံတားကို မိုင်းခွဲဖျက်ဆီးရန်စစ်ကောင်စီတပ်က စီစဉ်နေခြင်းဖြစ်သည်ဟု ၎င်းက ပြောသည်။

ယမန်နေ့က တိုက်ပွဲဖြစ်နေသည့်  ဂွမြို့နယ်မှကူးတို့လေးကျေးရွာအနီးက တောင်တန်းများမှ စစ်ကောင်စီတပ်များသည် AA ထိုးစစ်ကို ရင်မဆိုင်နိုင်ဘဲ လေယာဉ်ပစ်ကူများကို အကာအကွယ်ယူကာနောက်ဆုတ်သွားပြီဟု ဒေသခံများက ပြောသည်။

လေယာဉ်များဖြင့် ပစ်ကူပေးစဉ် ကူးတို့လေရွာကို ဗုံးကြဲ၍ အသက်၆၀ ကျော် အမျိုးသမီးတစ်ဦး အပါအဝင် ရွာသား ၃ ဦးသေဆုံးခဲ့၇သည်။

သေဆုံးသူများမှာ  ကူးတို့လေးကျေးရွာမှ ဦးဝင်းဗိုလ်(၄၅)နှစ်၊ ဒေါ်ခင်မာကြည် (၆၂)နှစ်နှင့် ကိုပေါက်စီ (၃၃) နှစ်တို့ဖြစ်ကြသည်။  

ဆပ်သွားကိုကျော်လျှင် ကမ်းသာယာ၊ ကမ်းသာယာပြီးလျှင် ဂွမြို့အထိရောက်လာနိုင်ဖြင့် စစ်ကောင်စီသည် ဧရာ၀တီတိုင်းမှ တပ်အင်အားများကို အကြီးအကျယ်ဖြည့်တင်းကာဂွမြို့ ကျမသွားစေရန် စစ်ရေးပြင်ဆင်နေသည်ဟု သိ၇သည်။ (သတင်းပေးပို့-CJ)