ဂွမြို့နယ် တိုင်ကျိုး၊ ကြွေချိုင်နှင့် ချောင်းသာ ၃ ရွာအကြား စစ်ကောင်စီဗုံးကြဲ

နိရဉ္စရာ၊ အောက်တိုဘာ ၁၇/ ၂၀၂၄

ရခိုင်ပြည်နယ် တောင်ဘက်အစွန်ဆုံး ဂွမြို့နယ်တွင် တိုက်ပွဲများ ဆက်လက်ပြင်းထန်စွာဖြစ်ပွားနေပြီး ယနေ့ ညနေတွင် စစ်ကောင်စီလေတပ်က တိုင်ကျိုး၊ ကြွေချိုင်နှင့် ချောင်းသာ ၃ ရွာအကြားကို လေယာဉ်ဖြင့် ဗုံးကြဲခဲ့သည်ဟု သိရသည်။

“ ညနေ ၇ နာရီလောက်မှာ အဲဒီရွာ ၃ ရွာအကြားကို လေယာဉ်နဲ့ နှစ်ကြိမ် ဗုံးလာကြဲသွားပါတယ်။ တိုင်ကျိုး၊ ကြွေချိုင်နဲ့ ချောင်းသာ ရွာအကြား တောင်တန်းတွေ၊ တောတန်းတွေ နေရာတွေကိုပါဘဲ။ ရွာသားတွေကတော့ မရှိတော့ဘူး။ အကုန်ထွက်ပြေးကုန်ပြီ”ဟု ဒေသခံ တစ်ဦးက ပြောသည်။

ယနေ့ အောက်တိုဘာ ၁၇ ရက်နေ့ နံနက်က စပြီး ကြွေချိုင်နှင့် ချောင်းသာရွာတို့တွင် တိုက်ပွဲဖြစ်ပွားနေပြီး ကြွေချိုင်ရွာသစ်ကိုလည်း စစ်ကောင်စီက ဗုံးလာကြဲခဲ့သည်ဟု သိရသည်။

“  ကြွေချိုင်ရွာသစ်ကို ကြဲပါတယ်။ ကြွေချိုက်နဲ့ တိုင်ကျိုးရွာ အကြား နောက်ကြောဘက်မှာ ချောင်းသာဆိုတဲ့ ချင်းအမျိုးသား ကျေးရွာတစ်ရွာရှိပါတယ်။ အဲဒီရွာအကြားနေရာတွေကို ကြဲနေတာပါ။ အေအေရှိတယ်ထင်ပြီး ကြဲပုံရပါတယ်။ လေယာဉ်နဲ့ ပစ်ခတ်တာတွေ မနက်ကတည်းက လုပ်နေပါတယ် ” ဟု ၎င်းက ဆက်လက်ပြောကြားသည်။

ရခိုင်ပြည်၊ ဂွမြို့နယ် မြောက်ဘက် ကြွေချိုင်ကျေးရွာမှာသာမက ကြွေချိုင်ရွာအလွန် ချောင်းသာမှာ စခန်းချထားသည့် စစ်ကောင်စီ လက်နက်ကြီးအထိုင်တပ်ကို အာရက္ခတပ်တော် (AA) က ဝင်တိုက်ခိုက်သည့် အတွက် တိုက်ပွဲပြင်းထန်စွာ ဖြစ်ပွားနေပြီး စစ်ကောင်စီက လေယာဉ်များ၊ ရေတပ်နေဗီများကပါ စစ်ကူတိုက်ခိုက်နေသည်ဟု နောက်ထပ် ဒေသခံ တစ်ဦးကလည်း ပြောကြားသည်။

" ဒီနေ့မနက် ၅ နာရီကတည်းက ချောင်းသာ ချင်းကျေးရွာမှာတိုက်ပွဲဖြစ်နေပါတယ်။ နှစ်ဖက်တိုက်ပွဲက ပြင်းထန်နေတယ်။ ကျေးရွာသားတွေကတော့ စဖြစ်ကတည်းက လေယာဉ်လာမှာကို ကြောက်လို့ထွက်ပြေးကုန်ကြပြီ။ လေယာဉ်နဲ့လည်းဗုံးကြဲတယ်။ အဓိကနီးစပ်ရာ ဘေးလွတ်ရာကို ရှောင်နေရတယ်။"

လက်ရှိ ရခိုင်ပြည် နေရာ ၃ ခုတွင် တိုက်ပွဲပြင်းထန်နေပြီး မောင်တောတွင် တစ်ခုတည်းသော ကျန်ရှိနေသည့် နခခ (၅) ကို အပြီးသတ် သိမ်းပိုက်နိုင်ရေးအတွက် AAက ထိုးစစ်ဆင် တိုက်ခိုက်နေသလို အမ်းအခြေစိုက် အနောက်ပိုင်းတိုင်းစစ်ဌာနချုပ်ကိုလည်း ထိုးစစ်ဆင် တိုက်ခိုက်နေရာ ခမရ ၃၇၃  အပါအဝင် စစ်ရေးအရ အရေးပါသော နေရာများကို သိမ်းပိုက်ထားပြီဟု သိရသည်။

AA ထိုးစစ် နီးကပ်လာချိန် အမ်း နပခဌာချုပ်တွင် ယတြာချေကာ အမ်းရှင်မကို နတ်ကနား ပေးပြီး ပူဇော်ပသဟု သတင်းထွက်များလည်း ထွက်ပေါ်နေသည်။

အာရက္ခတပ်တော် (AA) ထိုးစစ် အမ်းမြိုရှိ အနောက်တိုင်းစစ်ဒေသ (နပခ)  ဌာနချုပ်သို့ နီးကပ် လာချိန်တွင် ယခုလ ၁၅ ရက် နံနက် ၉ နာရီ အချိန်က အနောက်ပိုင်းတိုင်းမှူး ဗိုလ်မှူးချုပ် သောင်းထွန်း ဦးစီးပြီး  သံဃာ ၉ပါးကို ပင့်ဖိတ်ပြီး ယတြာချေကာ အမ်းမြို့ရှင်မကိုလည်း နတ်ကနား ပေးကာ ပူဇော်ပသခဲ့သည်ဟု ဒေသခံ သတင်းရင်းမြစ်များက ပြောဆိုသည်။ (သတင်း ပေးပို့- CJ and ဓာတ်ပုံ- အင်တာနက်)