ဂွတိုက်ပွဲတွင် AAက ခြေရာဖျောက်နေ၍ စစ်ကောင်စီက ဒရုန်းဖြင့် ကင်းထောက်နေ

နိရဉ္စရာ၊ အောက်တိုဘာ ၂၄/၂၀၂၄

ဂွမြို့နယ်မြောက်ဘက် ကြွေချိုင်စစ်စခန်းကို သိမ်းပြီးနောက်ပိုင်း အာရက္ခတပ်တော်က ခြေရာဖျောက်နေသဖြင့် စစ်ကောင်စီက ဒရုန်းလွှတ်ကာထောက်လှမ်းနေသည်ဟု ဒေသခံများက ပြောကြားသည်။

“ မနေ့ကတည်းက သေနတ်သံမကြားရဘူး။ အောက်တိုဘာ ၂၄ ရက် ဒီနေ့ မနက်ထိ အသံတိတ်နေတယ်။ အေအေ ဘယ်နားကနေ ဝင်ချမလဲဆိုတာကို မသိတော့ စစ်တပ်ဘက်က သတိထားပြီး စောင့်ကြည့်နေတယ်။ စိုးရိမ်တာလည်း ပါမှာပေါ့။ ကြွေချိုင်စခန်းကို သိမ်းပြီးကတည်း သေနတ်သံတွေ တိတ်နေတယ်။ ဒရုန်းတွေနဲ့ ကင်းထောက်တာတွေကို စစ်တပ်ဘက်က လုပ်နေတယ်” ဟု ဒေသခံတစ်ဦးက ပြောသည်။  

ဆပ်သွားတံတားထိပ်တွင် နေရာယူထားသည့် စစ်ကောင်စီတပ်သည် ယမန်နေ့က နံနက် ၁၁ နာရီတစ်ကြိမ်၊ မွန်းလွဲ ၂ နာရီတွင် တစ်ကြိမ် ဒရုန်းဖြင့် လွှတ်ပြီး ကင်းထောက်နေသည်ဟု ၎င်းက ပြောသည်။

“ စစ်တပ်ကလည်း ကြွေချိုင်နဲ့ တိုင်ကျိုးကြားမှာ နေရာယူထားတယ်။ ကြွေချိုင်နဲ့ တိုင်ကျိုးရွာကြား ချောင်းသာရွာဘက်မှာ စစ်သားတချို့ ကင်းပုန်းဝပ်လို့ ရှိတယ်လို့ သတင်းရတယ်။ တိုင်ကျိုးမှာဆိုရင် ရွာမြောက်ဘက် အစွန်ဆုံး ပုဂံဘုရားတောင်မှာတော့ အမြောက်တပ်မရှိတော့ဘူး။ စစ်ကား နှစ်စီးတော့ရှိနေတယ်လို့ သိရတယ်” ဟု ၎င်းကပြောကြားသည်။

အာရက္ခတပ်တော်၏ ဗျူဟာကို စစ်တပ်က မခန့်မှန်းတတ်ဖြစ်နေပြီး အေအေက အဖွဲ့ငယ်များခွဲပြီး ပြောက်ကျားစနစ်ဖြင့် တိုက်ခိုက်ကာ စနှိုက်ပါဖြင့်လာပစ်မည်ကို စစ်သားအများအကြား  စိုးရိမ်နေကြသည်ဟု ဆိုသည်။

“အေအေရဲ့ ဗျူဟာကို စစ်တပ်က လိုက်မမီဘူး။ သူတို့ (အေအေ) က ရုတ်ခြည်းပေါ်လာပြီး အင်အားအနည်းပြပြီး တိုက်တယ်။ တကယ်နင်လားငါလား ဖြစ်လာတဲ့အခါဆိုရင် အင်အား အများအပြားနဲ့ ဝိုင်းတိုက်တော့ စစ်တပ်က နောက်လှန်ကျတာသွားတာများတယ်။ အေအေဗျူဟာ မခန့်မှန်းတတ်လို့ စစ်တပ်က တိုက်ပွဲတိုင်းရှုံးတယ်။ အေအေက အပိုင်ရမှာ တိုက်တာ” ဟု ၎င်းက ပြောကြားသည်။ 

အေအေက တိုင်ကျိုးအနီးတွင် စနိုက်ဘာဖြင့် ပစ်ခတ်၍ စစ်ကောင်စီတပ်က ပွိုင့်ကား ညာဘက်မီးသီးဘက်ခြမ်းကို ကျည်ထိမှန်ခဲ့ပြီးနောက် စစ်တပ်က ကားများထက် ခြေကျင် လျှောက်သွားသည်က ပိုများသည်ဟု ဆိုသည်။

“ တိုင်ကျိုးကိုကျော်ရင် ဂျိုင်ကောက်ရွာကို ရောက်မယ်။ ဂျိုင်ကောက်မှာ​တော့ စစ်တပ်က ညဘက်ဆိုရင် ကင်းလှည့်ပြီး ဧည့်စာရင်းစစ်တယ်။ ကင်းပုန်းဝပ်တာတွေလည်း ရှိတယ်လို့ သိရပါတယ်။ ဂျိုင်ကောက်လွန်ရင်တော့ ဆပ်သွားကိုရောက်မယ်။ ဆပ်သွားမှာတော့ ဗျူဟာမှူးထိုင်တယ်လို့ သိရတယ်။ အေအေက ဂျိုင်ကောက်ကို ကျော်ပြီး ဆပ်သွားရွာကို ဝင်ရောက်လာမှာကို လူတိုင်း စိုးရိမ်နေကြတယ်” ဟု ပြောသည်။

ယနေ့နံနက်ထိ သေနတ်သံများရပ်နေပြီး တိုင်ကျိုးပတ်ဝန်းကျင်တွင် တိတ်ဆိတ်နေသော်လည်း အခြေအနေမှာ မုန်တိုင်းမလာမီ လေငြိမ်နေသလို တိုက်ပွဲမဖြစ်မီ ငြိမ်သက်နေသလိုမျိုး ဖြစ်နေသည်ဟု ၎င်းက ပြောကြားသည်။

ပုံစာ- ဆပ်သွားတံတား ဆပ်သွားဘက်ခြမ်းတွင် စစ်ကောင်စီစစ်ဆေးရေးဂိတ်ကို တွေ့စဉ်။ (သတင်းနှင့် ဓာတ်ပုံ-CJ)