အမ်းမြို့သို့ ရိက္ခာပို့ပြီး ပြန်လာသော စစ်ယာဉ်တန်း ငဖဲမြို့နယ်တွင် တိုက်ခိုက်ခံရ (စစ်ကောင်စီတပ်ဖွဲ့ဝင် ၁၀ ဦးသေဆုံးပြီး အမြောက်အများ ဒဏ်ရာရ)

လူထက်နိုင် (ဒွါရာမြီ)၊ နိရဉ္စရာ၊ အောက်တိုဘာ ၃၀ / ၂၀၂၄

မကွေးတိုင်း၊ မင်းဘူးခရိုင်၊ ငဖဲမြို့နယ်တွင် အမ်းမြို့သို့ ရိက္ခာပို့ပြီး ပြန်လာသော စစ်ယာဉ်တန်းကို တိုက်ခိုက်မှုကြောင့် စစ်တပ်ဘက်မှ ၁၀ ဦးသေဆုံးသွားကြောင်း အရှိုချင်းကာကွယ်ရေးတပ် (ACDF)က ထုတ်ပြန်ထားသည်။

စစ်ကောင်စီတပ်ဖွဲ့ဝင် အများအပြား ဒဏ်ရာရသွားသည်ဟုလည်း ACDF ၏ ယနေ့ အောက်တိုဘာလ ၃၀ ရက် ထုတ်ပြန်ချက်တွင် ဖော်ပြထားသည်။

“မင်းဘူးခရိုင်၊ ငဖဲမြို့နယ်၊ အမ်း-ပဒါန်း လမ်းပိုင်တွင် အမ်းမြို့နယ်ဘက်မှ ရိက္ခာပို့ပြီး ပြန်လာသော စစ်ကောင်စီကား(၂)စီး၊ ဆိုင်ကယ် (၂)စီးပါ ယာဉ်တန်းအား အောက်တိုဘာလ ၂၈ ရက်နေ့၊ နေ့လယ် (၁၂)နာရီအချိန်ခန့်တွင် အရှိုချင်းကာကွယ်ရေးတပ် (ACDF)နှင့် မင်းဘူးခရိုင် အမှတ်(၂)တပ်ရင်းမဟာမိတ်တို့ ပူးပေါင်း၍ တိုက်ခိုက်ခဲ့သည်”ဟု ထုတ်ပြန်ချက်တွင် ဖော်ပြထားသည်။

ACDF ပူးပေါင်းအဖွဲ့ဘက်မှ ရဲဘော်အားလုံး အထိခိုက်မရှိ ပြန်လည်ဆုတ်ခွာနိုင်ခဲ့ကြောင်း ထုတ်ပြန်ချက်တွင် ဖော်ပြထားသည်။

စစ်ကောင်စီတပ်များက ရခိုင်ပြည်၊ အမ်းမြို့ဘက်သို့ စစ်အင်အားဖြည့်တင်းရန်နှင့် ရိက္ခာပေးပို့ရန် မကွေးတိုင်း၊ ငဖဲမြို့နယ်၊ အမ်း-ပဒါန်းလမ်းပိုင်းမှ သွားလာလျက်ရှိကြောင်း ဒေသခံများထံမှ သိရသည်။

အမ်း-ပဒါန်း လမ်းပိုင်းတွင် အာရက္ခတပ်တော်(AA)နှင့် တော်လှန်ရေးအဖွဲ့များက စစ်ကောင်စီတပ်များအား မကြာခဏတိုက်ခိုက်လျက်ရှိကြောင်းသိရသည်။

ပြီးခဲ့သည့် အောက်တိုဘာ ၁၆ ရက်ကလည်း အမ်း-ပဒါန်းလမ်း၊ အမ်းမြို့အရှေ့မြောက်ဘက် မီတာ ၄၀၀၀ ခန့်အကွာတွင် ယာဉ်တစ်စီးအား AA က ပစ်ခတ်ခဲ့သည့်အတွက် အမျိုးသားလေးဦးနှင့် အမျိုးသမီးနှစ်ဦး ထိခိုက်ဒဏ်ရာရခဲ့ကြောင်း စစ်ကောင်စီက သတင်းထုတ်ပြန်ထားသည်။

ထို့ပြင် ပစ်ခတ်မှုဖြစ်စဉ်နှင့် မီတာ ၂၀၀ ခန့်အကွာ၌လည်း မော်တော်ယာဉ် ၁၀ စီးအား AA က ရပ်တန့်စေကာ အမျိုးသား ၂၄ ဦးနှင့် အမျိုးသမီး ၁၄ ဦးကို ဖမ်းဆီးသွားခဲ့ကြောင်းလည်း စစ်ကောင်စီ၏ ထုတ်ပြန်ချက်တွင် ဖော်ပြထားသည်။

လက်ရှိတွင် အမ်းမြို့အခြေစိုက် အနောက်ပိုင်းတိုင်း စစ်ဌာနချုပ် (နပခ)ကို အပြီးသတ်သိမ်းပိုက်နိုင်ရန် AA က အပြင်းအထန်ထိုးစစ်ဆင်တိုက်ခိုက်လျက်ရှိရာ တပ်ရင်းဌာနချုပ်အချို့ကို သိမ်းပိုက်ထားနိုင်ပြီဖြစ်သည်။

စစ်ကောင်စီဘက်ကလည်း နပခအပါအဝင် လေကြောင်းတို့မှ အပြင်းအထန်ခုခံလျက်ရှိသည်ဟု သိရသည်။

ဓာတ်ပုံ - ACDF