ယခင်ရက်များကမြို့ဟောင်းနှင့် မြို့သစ်ရပ်ကွက်ကိုသွားသည့် လမ်းမကြီးကိုစစ်ကောင်စီတပ်က ဖွင့်ပေးထားသော်လည်းမြို့ပေါ်အထိတိုက်ပွဲဖြစ်ပွားလာသဖြင့်  ယနေ့ နိုဝင်ဘာ ၉ ရက်နေ့ နံနက်အစောပိုင်းမှစ၍ပိတ်လိုက်ပြီဟု မြို့ခံအမျိုးသားတစ်ဦးက နိရဉ္စရာကိုပြောသည်။

“ မြို့ဟောင်းကလူတွေ မြို့သစ်ကိုပြေး၊ မြို့သစ်ကလူတွေ မြို့ဟောင်းကိုအဲလိုပြေးနေကြရတာ။ လေယာဥ်ကွင်းဖက်ကို ဒိုင်ကြီး၊ ဒိုင်ကလေးရွာဖက်ကလက်နက်ကြီးငယ်တွေနဲ့လှမ်းပစ်နေတယ်။ မြို့ခံတွေလည်း ဆောက်တည်ရာမရတော့ဘူး။ ရှိတဲ့ လမ်းတစ်လမ်းကိုလည်း ပိတ်လိုက်ပြီ။အကုန် အခက်အခဲတွေ့နေပြီ” ဟု ပြောသည်။

အမ်းမြို့ပေါ်တွင်စစ်ဘေးရှောင်အပါအဝင် မြို့ခံများအပါအဝင်စစ်ဘေးရှောင်ထောင်နှင့်ချီရှိပြီးစားနပ်ရိက္ခာပြတ်တောက်မှု၊ လမ်းပိတ်ဆို့ခံရမှု၊ တိုက်ပွဲကြားတွင်ပိတ်မိနေမှုတို့ကြောင့်အလွန်စိုးရိမ်စရာဖြစ်နေသည်ဟုမြို့ခံများက ပြောသည်။

လက်ရှိတွင်အမ်းမြို့ရှိ စစ်ကောင်စီ၏ စစ်တပ် တစ်စခန်း ၇၅ ရာနှုန်းကို အာရက္ခတပ်တော် (AA)က သိမ်းပိုက်ထားနိုင်ပြီး အနောက်ပိုင်းတိုင်း စစ်ဌာနချုပ်အပါအဝင် လက်ကျန်တပ်စခန်းများနှင့် ဌာနချုပ်ကိုတိုက်ခိုက်နေဆဲဖြစ်၍ ​တိုက်ပွဲမှာ ပြင်းထန်နေကြောင်း သိရသည်။

ယင်းအပြင် အမ်းမြို့တွင် နာမည်ဆိုးဖြင့် ကျော်ကြားနေသည့် ပဲပဒုံဂိတ်ကိုလည်း နိုဝင်ဘာ ၇ ရက်နေ့က AA သိမ်းပိုက်ထားပြီဖြစ်ပြီး လေးဘက်လေးတန်ကနေ AA က တိုက်ခိုက် နေသည်ဟု ဆိုသည်။

စစ်ကောင်စီမှလက်နက်အင်အား၊ ပြည်သူ့စစ်များဖြင့် အပါအဝင်စစ်သည်အင်အားအများအပြား ဖြည့်တင်းကာလေကြောင်းစစ်ကူများဖြင့် ခုခံတိုက်ခိုက်နေသော်လည်းအကျအဆုံးများနေပြီးစစ်ကောင်စီတပ်သား  ရာနှင့်ချီပြီး စစ်မြေပြင်ကို စွန့်ခွာ ထွက်ပြေးနေကြသည်ဟု သိရသည်။