မောင်စာဂ၊ နိရဉ္စရာ၊ ဒီဇင်ဘာ ၃၁ /၂၀၂၄

ရခိုင်ပြည်၊ ပုဏ္ဏားကျွန်းမြို့နယ်၊ ယိုးတရုပ်ကျေးရွာကို စစ်ကောင်စီလေတပ်က ယနေ့နေ့လယ်တွင် ဗုံးလာကြဲ၍အမျိုးသမီးနှစ်ဦးအပါအဝင် ၃ ဦး ပွဲချင်းပြီး သေဆုံးကာ ဆရာတော် တစ်ပါးအဝင်  ၁၀ ဦးဒဏ်ရာရရှိသွားကြောင်း သိရသည်။

ယနေ့ဒီဇင်ဘာလ ၃၁ ရက်၊ နေ့လယ် ၁ နာရီကျော်တွင် စစ်ကောင်စီသည် ဂျက်ဖိုက်တာတစ်စီးဖြင့်နှစ်ကြိမ်တိုင် လူနေရပ်ကွက်အတွင်းရှိ ဘုန်းတော်ကြီးကျောင်းနှင့် စစ်ရှောင်များနေထိုင်သည့် စာသင်ကျောင်းကို  ဗုံးနှစ်လုံးလာရောက်ပစ်ခတ်ခဲ့ခြင်းဖြစ်သည်ဟု သိရသည်။

သေဆုံးခဲ့ရသူမျာမှာ ပုဏ္ဏားကျွန်းမြို့နယ်၊ ယိုးတရုပ်ရွာမှ  ဒေါ်မသာလှ(၇၆နှစ်)၊ ၊ တန်းခိုးရွာက မဦးဆန်းနွယ်(၂၅ နှစ်)၊ ယိုးတရုပ်ရွာတွင်စစ်ရှောင်နေသူ  ကွမ်းတောင်ရွာမှ ကိုမျိုးဇော်ထွန်း(၁၈နှစ်)တို့ဖြစ်ကြောင်းသိရသည်။

ဒဏ်ရာရရှိသွားသူများမှာ ကျောင်းထိုင်ဆရာတော်တစ်ပါး၊ အမျိုးသမီးသုံးနှင့် အမျိုးသား ခြောက်ဦးတို့ဖြစ်ကြသည်။  

ဒေသခံတစ်ဦးက"လူနေရပ်ကွက်ထဲကို ဗုံး နှစ်လုံး ချတာ။ ဘုန်းတော်ကြီးကျောင်း၊ စာသင်ကျောင်းကို ချတာ။ အပြစ်မဲ့ပြည်သူတွေသေဆုံးကြရတာ "ဟုပြောသည်။

ယခုဖြစ်စဥ်ကြောင့်ယိုးတရုပ်ရွာစာသင်ကျောင်းအပါအဝင် ဘုန်းကြီးကျောင်းနှင့် လူနေအိမ်တစ်လုံး ပျက်စီးသွားခဲ့သည်ဟုလည်း သူက ပြောသည်။

ယိုးတရုပ်ရွာကို ဗုံးကြဲခဲ့စဥ်နယ်မြေချင်းထိစပ်နေသည့် ကျောက်တော်မြို့နယ်ရှိ ကျေးရွာအချို့မှလည်းဂျက်လေယာဥ်ပေါ်မှ ဗုံးကြဲသံများကို ကျယ်ကျယ်လောင်လောင်ကြားခဲ့ရသည်ဟု ကိုယ်တိုင်ကြားသိခဲ့ရသူအချို့က ပြောသည်။

အေးချမ်းတည်ငြိမ်နေသည့်ယိုးတရုပ်ရွာသည် ပုဏ္ဏားကျွန်းမြို့နယ်အတွင်းရှိပြီး ပုဏ္ဏားကျွန်းမြို့နယ်ကို အာရက္ခတပ်တော်(AA)က ပြီးခဲ့သည့် မတ်လ ၄ ရက်တွင် အပြီးသတ်သိမ်းပိုက်ရရှိထားပြီဖြစ်သည်။