(စစ်တွေစျေးကြီးအနီး ကုလားတန်မြစ်အတွင်းလက်နက်ကြီးကျည်ကျရောက်ပေါက်ကွဲမှုရှိ)

 အေးမြတ်ခိုင်- နိရဥ္စရာ၊ဇန်နဝါရီ၁၆/၂၀၂၅ 

 စစ်တွေအခြေစိုက် စစ်ကောင်စီအမှတ် (၁၂) ရဲတပ်ရင်းနှင့်ရေတပ်နေဗီများကလက်နက်ကြီးများဖြင့်ပစ်ခတ်၍ စစ်တွေမြို့နယ်နှင့် နီးကပ်စွာတည်ရှိသည့် ပုဏ္ဏားကျွန်းမြို့နယ်မှ စပါးထားကျေးရွာတွင် ကျရောက် ပေါက်ကွဲကာနေအိမ် (၉) လုံးမီးလောင် သွားကြောင်းသတင်းရသည်။ 

 ယနေ့နံနက်ပိုင်းတွင် စစ်တွေမြို့နယ်ဝါဘိုကျေးရွာအပါအဝင်၊ စစ်တွေနှင့်ပုဏ္ဏားကျွန်းမြို့နယ် ဆက်စပ်  ကျေးရွာများကိုစစ်ကောင်စီက လက်နက်ကြီး ပစ်ခတ်ခဲ့သဖြင့် စပါးထားကျေးရွာတွင် လက်နက်ကြီး ကျည်များ ကျရောက်ပေါက်ကွဲခဲ့သည်ဟု အုပ်ချုပ်ရေးပိုင်းနှင့်နီးစပ်သည့်ပုဏ္ဏားကျွန်းဒေသခံ တစ်ဦးကပြောသည်။ 

“တစ်မနက်လုံးပစ်တယ်။နေ့လယ်၁၂နာရီလောက်အထိပစ်တယ်ထင်တယ်။ဝါဘို၊ကျွဲထိုး၊အောင်ဇေယျ၊စပါးထားတို့မှာကျတယ်။စပါးထားမှာတော့အိမ်၉ဆောင်တောင်မီးလောင် သွားတယ်။”

 စစ်တွေမြို့နယ်၊ဝါဘိုကျေးရွာကိုAAက သိမ်းပိုက်လိုက်သည်ဟု သတင်းများကြောင့် ယနေ့နံနက်အာရုဏ်မှာစစ်ကောင်စီကဗုံးကြဲတိုက်ခိုက်ခဲ့ပြီးနောက်ဝါဘိုကျေးရွာအနီးတဝိုက်ကိုလက်နက်ကြီးပစ်ခတ်မှုများကိုလည်းပြုလုပ်ခဲ့သည်ဟု၎င်းကပြောသည်။ 

 ယင်းအပြင်ကုလားတန်မြစ်အတွင်းရပ်နားထားသည့်နေဗီကလက်နက်ကြီးပစ်ခတ်သည့် လက်နက်ကြီးကျည်တစ်လုံးမှာစစ်တွေမြို့ စျေးကြီးအနီးမြစ်အတွင်းမှာကျရောက်ပေါက်ကွဲခဲ့သည်ဟုစစ်တွေဒေသခံများကပြောသည်။ 

“ ပုဏ္ဏားကျွန်းဖက်ကိုလှမ်းပစ်တာ။ပစ်မှတ်မရောက်ဘဲ လမ်းတစ်ဝက်မှာမြစ်ထဲကျတာထင်တယ်။ကံကောင်းလို့အရင်တခါလိုစျေးထဲသာကျရင်ကျမလည်းသေမှာ”ဟုစစ်တွေဒေသခံစျေးရောင်းနေသူကမန်အမျိုးသမီးတစ်ဦးကပြောသည်။ 

 ဒီဇင်ဘာလကတည်းကစစ်တွေမြို့နယ် ကျေးရွာအချို့တွင် စစ်ကောင်စီတပ်နှင့်အာရက္ခတပ်တော်(AA) တို့အကြားနှစ်ဖက်ထိတွေ့တိုက်ပွဲတချို့ရှိခဲ့ပြီးစစ်ရေးတင်းမာမှုရှိလာ၍စစ်တွေမြို့အတွင်းပိတ်မိနေသည့်ဒေသခံများစိုးရိမ်မှုရှိနေသည်။ 

“အခုကနှစ်ဖက်တပ်တွေ ပစ်တာမဟုတ်ဘူး။မြို့ထဲကနေ စစ်တပ်က ပစ်နေတာ။  ဒေသခံတွေလည်းဘယ်အချိန်ဘာဖြစ်မလဲစိုးရိမ်နေကြတယ်။ဒီနေ့ဆိုလက်နက်ကြီးပစ်သံတွေရော၊ဗုံးကြဲသံတွေရော ကြားရတယ်။  ညဘက်ဘာဖြစ်လာမလဲတောင်စိတ်ပူနေရတယ်”ဟုစစ်တွေ၊ကုန်တန်းရပ်ကွက်မှဒေသခံအမျိုးသားတစ်ဦးကပြောသည်။  

နှစ်ဘက်စစ်ရေးတင်းမာနေသည့်စစ်တွေမြို့တွင်  စစ်ကောင်စီကခံစစ်အခိုင်အမာပြင်ဆင်နေကာမြို့တွင်းတွင် အရင်ကထက်လုံခြုံရေးတိုးမြင့်ချထားကြောင်းပြောသည်။

 အာရက္ခတပ်တော်(AA)သည်  ရခိုင်ပြည်အတွင်းမြို့နယ်ပေါင်း (၁၄) ခုနှင့် ပလက်၀ ဒေသ တစ်ခုလုံးကိုသိမ်းပိုက်ထားပြီးစစ်တွေ၊ကျောက်ဖြူနှင့်မာန်အောင်မြို့နယ်တို့သာကျန်ရှိတော့သည်။ 

 ပုံစာ- ပုဏ္ဏားကျွန်းမြို့နယ်ရဲရိုးပြင်ကျေးရွာကို အကြမ်းဖက်စစ်ကောင်စီ၂၀၂၃ခုနှစ် ဒီဇင်ဘာ ၃ ရက်နေ့ မွန်းလွဲပိုင်းတွင် စစ်ကောင်စီတပ်က မီးရှို့ဖျက်ဆီးနေစဉ်။