(၁၅) ကြိမ်မြောက် " ခမီအမျိုးသားနေ့ " အထိမ်းအမှတ်ထိုင်းနိုင်ငံတွင် ဘောလုံးပြိုင်ပွဲကျင်းပ
စောရှင်မေ၊ နိရဥ္စရာ၊ မတ် ၂၃/ ၂၀၂၅
(၁၅) ကြိမ်မြောက် " ခမီအမျိုးသားနေ့ "အထိမ်းအမှတ်အား ကြိုဆိုသည့်အနေဖြင့် ထိုင်းနိုင်ငံတွင် ဘောလုံးပြိုင်ပွဲကျင်းပခဲ့ကြောင်း သိရသည်။
အဆိုပါ ဘောလုံးပြိုင်ပွဲကို ယနေ့ မတ်လ ၂၃ ရက်နေ့ နံနက် ၇ နာရီတွင် ထိုင်းနိုင်ငံ၊ ကထုန်ဘန်မြို့နယ်၊ ဖိကစင် (၉၉) လမ်းအုန်းနိုးနိုးဘောလုံးကွင်းတွင် ကျင်းပခဲ့ကြောင်းလည်း သိသည်။
ယခုကျင်းပသည့်ဘောလုံးပွဲသည်ထိုင်းနိုင်ငံ၌ (၄) ကြိမ်မြောက်ကျင်းပခြင်းဖြစ်သည်။
" ခမီအမျိုးသားနေ့ "အထိမ်းအမှတ်နေ့အဖြစ် ဘောလုံးပြိုင်ပွဲကျင်းပ ရခြင်းသည် ထိုင်းနိုင်ငံရောက်ခမီလူမျိုး လူငယ်မောင်မယ်များ တစ်ဦးကိုတစ်ဦး ညီကိုမောင်နှမစိတ်ဓာတ်နှင့်ရိုင်းပင်းကူညီလိုမှု မျိုးချစ်စိတ်ဓာတ် ရှင်သန်ခိုင်မာရေး၊သွေးစည်းညီညွှတ်ရေး၊ ဘက်စုံဖွံ့ဖြိုးတိုးတက်သည့်အမျိုးသားရေးသွင်ပြင်လက္ခဏာမပျောက်ပျက်ရေး၊ ဘာသာစာပေယဥ်ကျေးမှုရေရှည်တည်တံ့မှုကို ရည်ရွယ်ပြီး ပြုလုပ်ရခြင်းဖြစ်ကြောင်းဘောလုံးပွဲကော်မတီအဖွဲ့ဝင် ကိုကောင်းထိုက်ကပြောသည်။
" အကြောင်းအမျိုးမျိုးကြောင့် ရခိုင်ပြည်မှ ပြည်ပကိုရောက်နေကြတဲ့ခမီများအပြင် ဌာနေတိုင်းရင်းသားများအားလုံး စည်းလုံးညီညွှတ်စေဖို့အတွက်လည်းရွယ်ရွယ်ပါတယ်။ ဧပြီလ ၂၇ ရက်နေ့ကိုရာက်တိုင်း မိမိတို့လူမျိုး၏နေ့ထူးနေ့မြတ်ဖြစ်သော မိမိတို့ ခမီအမျိုးသားနေ့တစ်နေ့ဖြစ်သည်ကို မမေ့မလျော့ဖို့ မှာကြားချင်ပါတယ် " ဟု နိရဥ္စရာကို ပြောသည်။
၎င်းပြိုင်ပွဲတွင် ဆုရရှိသည့် အမျိုးသားများအား ပထမဆု ဘတ် ၆၀၀၀၊ဆုဖလားနှင့် ရွှေဆွဲပြား၊ ဒုတိယဆု ဘတ် ၃၅၀၀၊ ဆုဖလားနှင့် ငွေဆွဲပြား၊တတိယဆု ဘတ် ၁၀၀၀ တို့ချီးမြှင့်ပေးခဲ့ကြောင်း သိရသည်။
ထို့အတူ ၎င်းပြိုင်ပွဲတွင် ဆုရရှိသည့် အမျိုးသမီးများကိုလည်း ပထမဆု ဘတ်၃၀၀၀၊ ဆုဖလားနှင့် ရွှေဆွဲပြား၊ ဒုတိယဆု ဘတ် ၂၅၀၀၊ ဆုဖလားနှင့်ငွေဆွဲပြားတို့အား ချီးမြှင့်ပေးခဲ့ကြောင်းလည်း သိရသည်။
အမျိုးသားပထမဆု စိုင်ဟ - B၊ ဒုတိယဆု စိုင်ဟ - A၊ တတိယဆု ကထုန်ဘန် - FC တို့က ရရှိသွားခဲ့သည်။
အမျိုးသမီးအသင်းများမှာ 93 - FC၊ စမူပါကန် - FC၊ မော်စီ FC၊ ဝပ်အုန်းယိုင် - FC၊ အိုနိုးနိုး FC၊ ရခိုင်သူချေ FC တို့ ခြောက်သင်းပါဝင်ယှဥ်ပြိုင်ခဲ့ကြသည်။
အမျိုးသမီးပထမဆုကို ရခိုင်သူချေအသင်း၊ ဒုတိယဆု ဝပ်အုန်းယိုင် - FC တို့က ရရှိသွားခဲ့သည်။
အဆိုပါ ဘောလုံးပြိုင်ပွဲကို ရခိုင်၊ ခမီရိုးရာဝတ်စုံဖြင့် ကွင်းဖွင့်ခဲ့ပြီးထိုင်းနိုင်ငံရောက် မြို့နယ်ပေါင်းစုံမှ ခမီလူမျိုးနှင့် ရခိုင်လူမျိုးအပါအဝင် တိုင်းရင်သားလူမျိုးပေါင်းစုံတို့က လူဦးရေ ၃၀၀ ကျော်ခန့် လာရောက်အားပေးခဲ့ကြောင်းလည်း သိရသည်။
ပြီးခဲ့သည့် ၂၀၂၄ ခုနှစ် မတ်လ ၂၄ ရက်နေ့တွင် ခမီအမျိုးသားနေ့အထိမ်းအမှတ်အနေဖြင့် ဘောလုံးပွဲအား ထိုင်းနိုင်ငံ၊ ကထုန်ဘန်မြို့နယ်ဖိကစင်(၉၉)လမ်း အုန်နိုးနိုးဘောလုံးကွင်းတွင် (၃)ကြိမ်မြောက်ကျင်းပခဲ့ကြောင်းလည်း သိရသည်။
ရခိုင်မျိုးနွယ်စုဝင်ဖြစ်သော ခမီလူမျိုးတို့ကိုယခင်က ခမွီး၊ ခမွေး၊ ခမီး၊ ခမီ၊ ချင်းနှင့် တောင်သားစသည်ဖြင့်အမျိုးမျိုးခေါ်ဝေါ်ခဲ့ကြသည့်အတွက် "ခမီ"ဟု တစ်မျိုးတည်းသာခေါ်ရန် ၁၉၇၂ ခုနှစ်၊ ဧပြီ ၂၇ ရက်နှင့် ၂၈ တို့တွင် မြောက်ဦးမြို့နယ်၊လောင်းရှည်ချောင်း (မြို့ဟောင်းမြို့နယ်)၌ ပြုလုပ်ခဲ့သည့် ညီလာခံကြီးတွင်မြို့နယ်ပေါင်းစုံမှ ခမီကိုယ်စားလှယ်တို့က တစ်ညီတစ်ညွတ်တည်း ဆုံးဖြတ်ခဲ့ကြောင်းသိရသည်။
ယင်းညီလာခံကြီးစတင်ကျင်းပသော ဧပြီ၂၇ ရက်ကို ခမီအမျိုးသားနေ့အဖြစ်သတ်မှတ်ကာ ၂၀၁၁ ခုနှစ်၊ ဧပြီလ ၂၇ ရက်မှစ၍တခမ်းတနားဖြင့်ကျင်းပခဲ့သည်ဟု သိရသည်။
ခမီလူမျိုးတို့သည် ရခိုင်ပြည်နယ်အတွင်းအမ်း၊ ကျောက်တော်၊ မြောက်ဦး၊ပုဏ္ဏားကျွန်း၊ ဘူးသီးတောင်၊ပေါက်တော၊ ရသေ့တောင်စသည့် မြို့နယ်တို့တွင် စုစုပေါင်း လူဦးရေ ၈ သောင်းကျော်ခန့် နေထိုင်ကြသည်ဟု သိရသည်။
ဓာတ်ပုံ - ပေးပို့
လှူရန်