(ဆယ်နှစ်အောက်ကလေးငယ်လေးဦးအပါအဝင် စစ်ရှောင် ၁၃ ဦး ဒဏ်ရာရ)

ကြိုင်ဟိန်းလင်း၊ နိရဉ္စရာ၊ မတ် ၂၆/ ၂၀၂၅

ရခိုင်ပြည်၊ ပုဏ္ဏားကျွန်းမြို့နယ်၊ အောင်ဖြူပြင်ကျေးရွာကို စစ်ကောင်စီက ဗုံးကြဲမှုကြောင့် စစ်ဘေးရှောင်လေးဦးသေဆုံးပြီး ဆယ်နှစ်အောက်ကလေးငယ်လေးဦးအပါအဝင် စစ်ရှောင် ၁၃ ဦး ဒဏ်ရာရသွားခဲ့သည်ဟု မြေပြင်သတင်းရင်းမြစ်များက နိရဉ္စရာကို ပြောသည်။

သေဆုံးသွားသည့်စစ်ဘေးရှောင်များမှာ ပုဏ္ဏားကျွန်းမြို့၊ လိပ်ကုန်းပြင်ရပ်ကွက်မှ ဖခင်ဖြစ်သူ ဦးသန်းမောင် (၅၃)နှစ်၊ မိခင် ဒေါ်မယေ (၄၅)နှစ်၊ သား မောင်သက်ကျော် (၁၉) နှစ်တို့မိသားစုသုံးဦးနှင့် အောင်ဖြူပြင်ရွာတွင် ဖုန်းအရောင်းဆိုင်ဖွင့်ထားသည့် ပုဏ္ဏားကျွန်းမြို့နယ်၊ ယိုးတရုပ်ကျေးရွာမှ ကိုရဲလင်းစိုး(၂၅)နှစ်တို့ဖြစ်သည်ဟု မြေပြင်ဒေသခံများက အတည်ပြုသည်။

ဒဏ်ရာရရှိသွားသည့် ကလေးငယ်လေးဦးမှာ ပုဏ္ဏားကျွန်းမြို့မှ မရွှေရီဝင်း (၂)နှစ်၊ မောင်မျိုးမြတ်ကျော် (၆)နှစ်၊ တန်းခိုးကျေးရွာမှ မောင်ဘိုနိုင်ငြိမ်း (၃)နှစ်နှင့် မဦးဆန်းမေ (၉)နှစ်တို့ဖြစ်ကြသည်။

ထို့အပြင် နောက်ထပ်ဒဏ်ရာရရှိသွားသူများမှာ ပုဏ္ဏားကျွန်းမြို့မှ မမိမိုးချေ (၂၃)နှစ်၊ ဒေါ်လှလှရီ (၅၃)နှစ်၊ မဖြူဖြူကျော် (၁၉)နှစ်၊ ကိုစောနိုင်သန်း (၂၉)နှစ်၊ ကိုလှမြင့်ရွှေ (၂၇)နှစ်၊ မစိုးစိုးလှိုင် (၂၅)နှစ်၊ အောင်ဖြူပြင်ကျေးရွာမှ ဒေါ်ဦးလှနု (၄၈)နှစ်၊ မအေးမြတ်ဝေ (၁၅)နှစ်နှင့် တန်းခိုးကျေးရွာမှ မဆန်းရီ (၃၀) နှစ်တို့ ဖြစ်ကြသည်။

“ဒဏ်ရာရရှိသွားသူတွေထဲက တချို့ကတော့ ဒဏ်ရာပြင်းထန်ပြီး စိုးရိမ်ရတဲ့အခြေအနေရှိပါတယ်”ဟုလည်း ကိုင်တိုင်သွားရောက်ကြည့်ရှုခဲ့သည့် မြေပြင်သတင်းရင်းမြစ်တစ်ဦးက ပြောသည်။

ဓာတ်ပုံ - အောင်ဖြူပြင်ရွာကို စစ်ကောင်စီဗုံးကြဲအပြီး မတ်လ ၂၆ ရက်၊ နံနက်ပိုင်းက တွေ့ရစဉ်။

အောင်ဖြူပြင်ရွာကို ယမန်နေ့ မတ်လ ၂၅ ရက်၊ ညနေ ၇ နာရီကျော်တွင် စစ်ကောင်စီလေတပ်က ဂျက်ဖိုက်တာဖြင့် ပေါင် ၅၀၀ ဗုံးတစ်လုံးကြဲချခဲ့မှုကြောင့် ယခုကဲ့သို့ သေဆုံး၊ ဒဏ်ရာရမှုများရှိခဲ့ခြင်းဖြစ်သည်။

ယမန်နေ့က စစ်ကောင်စီကြဲချခဲ့သည့် ပေါင် ၅ဝဝ ဗုံးသည် အောင်ဖြူပြင်ကျေးရွာဘုန်းတော်ကြီးကျောင်းအနီး တောင်စောင်းတွင် ကျရောက်ပေါက်ကွဲခဲ့ခြင်းဖြစ်သည်ဟုလည်း ဒေသခံများက ပြောသည်။

ယင်းကျောင်းတွင် ပုဏ္ဏားကျွန်းမြို့ပေါ်နှင့် အနီးတဝိုက်ကျေးရွာများမှ စစ်ဘေးရှောင် ပြည်သူ ၁၂၀ ကျော် ခိုလှုံနေထိုင်လျက်ရှိသည်ဟုလည်း ဆိုသည်။

ဗုံးကြဲချမှုကြောင့် စစ်ရှောင်ပြည်သူများ သေဆုံးဒဏ်ရာရရှိသည့်အပြင် ဓမ္မာရုံနှင့် ကျောင်းဆောင်အချို့နှင့် အနီးအနားရှိ နေအိမ်တစ်ဆောင်လည်း ပျက်စီးခဲ့ရသည်။

ဓာတ်ပုံ - အောင်ဖြူပြင်ရွာကို စစ်ကောင်စီဗုံးကြဲအပြီး မတ်လ ၂၆ ရက်၊ နံနက်ပိုင်းက တွေ့ရစဉ်။

---
ကျနော်တို့မီဒီယာဆက်လက်ရှင်သန်ရပ်တည်နိုင်ရေးအတွက် လူကြီးမင်းတို့ရဲ့ အားပေးမှုနဲ့ အကူအညီတွေကို အထူးလိုအပ်နေပါတယ်။ ဒီလင့် https://donorbox.org/narinjara-news ကနေတဆင့် ကူညီနိုင်ပါတယ်။ လူကြီးမင်းတို့ရဲ့ ကူညီထောက်ပံ့မှုအတွက် ကျေးဇူးအထူးတင်ပါတယ်။