သဉ္ဇာနွယ်၊ နိရဉ္စရာ၊ ဧပြီ ၁/၂၀၂၅

တစ်နိုင်ငံလုံး ငလျင်ဘေးဒဏ်ကြောင့် ဝမ်းနည်းပူဆွေးနေချိန်တွင် စစ်ကောင်စီက အရပ်သားကျေးရွာများကို ဗုံးကြဲတိုက်ခိုက်နေသည့်အတွက် အာရက္ခတပ်တော်(AA)ကလည်း ရခိုင်ပြည်၊ ကျောက်ဖြူမြို့နယ်ရှိ စစ်ကောင်စီတပ်စခန်းတစ်ခုကို ထိုးစစ်ဆင်တိုက်ခိုက်လျက်ရှိသည်ဟု သိရသည်။

AA က ထိုးစစ်ဆင်တိုက်ခိုက်လျက်ရှိသည့် တပ်စခန်းမှာ ကျောက်ဖြူမြို့နယ်၊ ဂုံးချွိန်တိုက်နယ်၊ အမှတ် (၃၂)ရဲတပ်ရင်းနှင့်မနီးမဝေးရှိ ပြင်ရှည်ကျေးရွာတွင် စစ်ကောင်စီဝင်ရောက်တပ်စွဲထားသည့်နေရာဖြစ်ပြီး ယနေ့ ဧပြီ ၁ ရက်၊ အရုဏ်တက်အချိန်မှစ၍ ထိုးစစ်ဆင်တိုက်ခိုက်နေခြင်းဖြစ်သည်ဟု မြေပြင်ဒေသခံစစ်ရေးသတင်းရင်းမြစ်တစ်ဦးက နိရဉ္စရာကို ပြောသည်။

"သူတို့(စစ်ကောင်စီ)က အဲဒီရွာကို မလကျွန်းရွာကိုဝင်တဲ့နေ့ကတည်းက ပြင်ရှည်ကျေးရွာကို ဝင်ရောက်နေရာယူထားတာရှိတယ်။ ပြီးတော့ ရွာမှာ တပ်စွဲထားတယ်။ တပ်စွဲထားတဲ့စစ်ကောင်စီတွေကို AA က တိုက်လို့ လက်ရှိ မနက် ၉ နာရီကျော်လောက်ထိ တိုက်ပွဲပြင်းနေတယ်" ဟု ပြောသည်။

ယခုတိုက်ပွဲတွင် စစ်ကောင်စီဖက်မှအထိနာပြီး ဒဏ်ရာအများအပြားဖြင့်ဆုတ်ခွာနေရ၍ စစ်ကောင်စီဖက်မှ နေဗီနှင့် ဒရုန်းများဖြင့် အဆိုပါတိုက်ပွဲဖြစ်သည့်နေရာများကို ပစ်ခတ်နေကြောင်း သိရသည်။

ပြင်ရှည်ကျေးရွာတွင် စစ်ကောင်စီက တပ်စွဲနေရာယူထားသည့်အတွက် ရွာသူ/ရွာသားတချို့ ပိတ်မိနေကြသည်ဟု ကျောက်ဖြူဒေသခံအမျိုးသားတစ်ဦးက နိရဉ္စရာကို ပြောသည်။

"AA ဝင်မတိုက်ခင်က စစ်ကောင်စီက ဒီရွာတွေကို အကြောင်းမဲ့ဝင်ရောက်နေထိုင်ပြီး တပ်စွဲတယ်။ ရွာသားတွေကို ထွက်ခွင့်မပေးဘူး။ ဒါကြောင့် AA က ဒီစစ်ကောင်စီတွေကို ရှင်းလင်းတာ။ ဒါမှ ရွာသားတွေကိုကယ်ထုတ်နိုင်မှာလေ" ဟု ပြောသည်။

မြန်မာနိုင်ငံတွင် အင်အားပြင်းငလျင်လှုပ်ခတ်ခဲ့သည့် ပြီးခဲ့သည့် မတ်လ ၂၈ ရက်ကလည်း ပြင်ရှည်ကျေးရွာအနီးအနားတဝိုက်ကို စစ်ကောင်စီက ဂျက်ဖိုက်တာဖြင့် ဗုံးကြဲတိုက်ခိုက်ခဲ့ကြောင်း သိရသည်။
 
ယမန်နေ့ မတ်လ ၃၁ ရက်ကလည်း ကျောက်ဖြူမြို့နယ်၊ ဇင်ချောင်းကုန်းဘွေရွာနှင့် ကုလဘာရွာကို စစ်ကောင်စီ၏နေဗီက ဒရုန်းနှင့် လက်နက်ကြီးကျည်များဖြင့်ပစ်ခတ်ခဲ့သည်ဟု ဒေသခံများက ပြောသည်။

ယင်းသို့ပစ်ခတ်မှုကြောင့် ဇင်ချောင်းကုန်ဘွေကျေးရွာတွင် ရဟန်းတော်တစ်ပါးပျံလွန်တော်မူပြီး ရွာသားတစ်ဦးသေဆုံးသွားခဲ့သလို ကျောင်းထိုင်ဆရာတော်နှင့် ကိုယ်ရင်ငယ်တစ်ပါးအပါအဝင် ခုနစ်ဦး ထိခိုက်ဒဏ်ရာရရှိခဲ့သည်ဟု သိရသည်။

အလားတူ ကုလဘာကျေးရွာတွင်လည်း ကျည်ထိမှန်ပြီး နေအိမ်အဆောက်အဦအချို့ ပျက်စီးသွားခဲ့သည်ဟု သိရသည်။

တစ်နိုင်ငံလုံး ငလျင်ဘေးသင့်နေချိန်တွင် စစ်ကောင်စီက ယင်းသို့ အရပ်သားပြည်သူများနေထိုင်ရာကျေးရွာများကို ဗုံးကြဲတိုက်ခိုက်နေ၍ AA က ယခုကဲ့သို့ တန်ပြန်တိုက်ခိုက်နေရခြင်းဖြစ်သည်ဟုလည်း ဒေသခံများက ပြောသည်။

ပြီးခဲ့သည့် မတ်လနောက်ဆုံးပတ်မှစ၍ ကျောက်ဖြူအမှတ် (၃၂)ရဲတပ်ရင်းအနီးရှိ နှမ်းဖဲတောင်ရွာနှင့် ပြိုင်းစေ့ကေရွာအထိ AA ထိုးစစ်ရောက်ရှိခဲ့ပြီး လက်ရှိတွင် စစ်ကောင်စီဝင်ရောက်နေရာယူထားသည့် ကျေးရွာများကို AA က တိုက်ခိုက်နေကြောင်း သိရသည်။

လက်ရှိတိုက်ပွဲများရှိနေသည့်နေရာများနှင့် ကျေးရွာများသည် အမှတ် (၃၂)ရဲတပ်ရင်းအနီးအနားရှိကျေးရွာများတွင် ဖြစ်ပွားနေခြင်းဖြစ်သည်ဟု သိရသည်။

အဆိုပါရဲတပ်ရင်းအနီးအနားရှိ ပြိုင်းစေ့ကေ၊ ပြင်ရှည်၊ ကုလဘာ၊ နှမ်းဖဲတောင်စသည့်ကျေးရွာအပါအဝင် ကျောက်ဖြူ-ရမ်းဗြဲကားလမ်းအနီးအနားရှိ ဒေသခံများမှာ စစ်ဘေးရှောင်နေရကြောင်း သိရသည်။

ဓာတ်ပုံ - AA Info Desk(ပုံဟောင်း)

---
ကျနော်တို့မီဒီယာဆက်လက်ရှင်သန်ရပ်တည်နိုင်ရေးအတွက် လူကြီးမင်းတို့ရဲ့ အားပေးမှုနဲ့ အကူအညီတွေကို အထူးလိုအပ်နေပါတယ်။ ဒီလင့် https://donorbox.org/narinjara-news ကနေတဆင့် ကူညီနိုင်ပါတယ်။ လူကြီးမင်းတို့ရဲ့ ကူညီထောက်ပံ့မှုအတွက် ကျေးဇူးအထူးတင်ပါတယ်။